ଟିକେଟ ଉପରେ ଭୁଲ ତାରିଖ ଲେଖା ହୋଇଥିବା କାରଣରୁ ସହରଣପୁରର ଉପଭୋକ୍ତା ଅଦାଲତ ଭାରତୀୟ ରେଳବାଇ ବିରୋଧରେ ଜରିମାନା ଲଗାଇଛି । ବାସ୍ତବରେ ଏହି ଘଟଣାଟି ହେଉଛି ୨୦୧୩ ମସିହାର । ଦୀର୍ଘ ୫ ବର୍ଷ ପରେ ଏହି ମାମଲାର ଶୁଣାଣି କରି ଏଭଳି ରାୟ ଦେଇଛନ୍ତି ଅଦାଲତ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ବିଷ୍ଣୁକାନ୍ତ ଶୁକ୍ଳା ନାମକ ଜଣେ ବ୍ୟକ୍ତି ତାଙ୍କ ସାଙ୍ଗ ଘରକୁ ଯିବା ପାଇଁ ୨୦୧୩ ମସିହାରେ ସହାରଣପୁରରୁ ଜୟପୁର ଯିବା ପାଇଁ ଟିକେଟ କରିଥିଲେ । ସେହି ଟିକେଟ ଉପରେ ୨୦୧୩ ବଦଳରେ ୩୦୧୩ ତାରିଖ ଲେଖାଯାଇଥିଲା । ଶୁକ୍ଳା ଏହାକୁ ନଦେଖି ଜୟପୁର ଯାତ୍ରା ପାଇଁ ଟ୍ରେନରେ ବସିଥିଲେ । ପରେ ଟିଟି ଆସି ଟିକେଟ ଯାଞ୍ଚ କରିଥିଲେ । ଶୁକ୍ଳାଙ୍କ ଟିକେଟ ଉପରେ ଲେଖା ହୋଇଥିବା ଭୁଲ ତାରିଖକୁ ଦେଖି ଟିଟି ବିଷ୍ଣୁକାନ୍ତଙ୍କ ମଜା ଉଡାଇବା ସହ ୮୦୦ ଟଙ୍କା ଜୋରିମାନା ମଧ୍ୟ କରିଥିଲେ । ଶୁକ୍ଳା ୮୦୦ ଟଙ୍କା ଜୋରିମାନା ଦେବା ପରେ ମଧ୍ୟ ଟିଟି ତାଙ୍କୁ ମୁରାଦାବାଦ ଷ୍ଟେସନ ଓହ୍ଲାଇ ଦେଇଥିଲେ । ଏହି ଘଟଣା ଶୁକ୍ଳାଙ୍କ ମନକୁ ବହୁତ କଷ୍ଟ ଦେଇଥିଲା । କାରଣ ଶୁକ୍ଳାଙ୍କର ଏହି ଯାତ୍ରା ଏକ ମହତ୍ୱପୂର୍ଣ୍ଣ ଯାତ୍ରା ଥିଲା । ତାଙ୍କ ସାଙ୍ଗର ସ୍ତ୍ରୀ ମୃତ୍ୟୁବରଣ କରିଥିଲେ ସେଥିପାଇଁ ଶୁକ୍ଳା ଜୟପୁର ଯାଉଥିଲେ । କିନ୍ତୁ ରେଳବାଇର ଏପରି ଖାମଖିଆଲି କାର୍ଯ୍ୟ ପାଇଁ ସେ ତାଙ୍କ ସାଙ୍ଗଙ୍କ ପାଖକୁ ଯାଇପାରିନଥିଲେ ।
ଶୁକ୍ଳା ସହାରଣପୁର ଫେରି ରେଳବାଇ ବିରୋଧରେ ଉପଭୋକ୍ତା କୋର୍ଟରେ ଅଭିଯୋଗ କରିଥିଲେ । କିନ୍ତୁ ଏହି ମାମଲାର ସମାଧାନ ହେବା ପାଇଁ ଶୁକ୍ଳାଙ୍କୁ ୫ ବର୍ଷ ଅପେକ୍ଷା କରିବାକୁ ପଡିଥିଲେ ମଧ୍ୟ କୋର୍ଟ ପକ୍ଷରୁ ଉଚିତ ନ୍ୟାୟ ପାଇଥିଲେ । କୋର୍ଟ ରେଳବାଇ ଉପରେ ୧୦ ହଜାର ଟଙ୍କା ଜରିମାନା ଲଗାଇବା ସହ ଶୁକ୍ଳାଙ୍କୁ ୩ ହଜାର ଟଙ୍କା କ୍ଷତିପୁରଣ ଦେବାକୁ ନିର୍ଦ୍ଦେଶ ଦେଇଥିଲା ।