କ’ଣ ଏତେ ତଳକୁ ଖସିପାରେ ମଣିଷ ! କୁକୁର ଭୋକିଲା ବୋଲି ମଦନିଶାରେ ନିରୀହ କୁକୁର ଛୁଆଙ୍କ ମୁଣ୍ଡ କାଟିଲା ସଇତାନ ।
ସମାଜରେ ମଣିଷ ଯେତେ ଆଗକୁ ବଢୁଛି ନିଜ ମଧ୍ୟରୁ ମାନବିକତାକୁ ସେତେ ଦୂରେଇ ଦେଉଛି । ଯେଉଁଠି ପଶୁ ବିଶ୍ୱସ୍ତ ପାଲଟୁଛି ସେଠାରେ ମଣିଷ ସଇତାନ ସାଜି ସମସ୍ତଙ୍କୁ ଆଘାତ ଦେବାରେ ଲାଗିଛି । ହାଇଦ୍ରାବାଦରୁ ଏଭଳି ଏକ ହୃଦୟ ବିଦାରକ ଖବର ଆସି ପହଞ୍ଚିଛି ଯାହାକୁ ଶୁଣିଲେ ଆପଣଙ୍କ ମଧ୍ୟ ଚିନ୍ତା କରିବାକୁ ବାଧ୍ୟ ହେବେ ଯେ କ’ଣ ଦୁନିଆରେ ଏବେ ମଣିଷତ୍ୱ ବୋଲି କିଛି ନାହିଁ ! ତେବେ ହାଇଦ୍ରାବାଦର ହୁସେନୀ ଅଲମ୍ ନାମକ ଏକ ଅଞ୍ଚଳରେ ପାଞ୍ଚୋଟି କୁକୁର ପିଲାଙ୍କ ମୁଣ୍ଡ ଏକ ବ୍ୟାଗରୁ ବାହାରିଥିଲା । ଏହାସହ କିଛି କୁକୁର ଛୁଆଙ୍କ ଶରୀରର କଟାଅଂଶ ମଧ୍ୟ ଦେଖିବାକୁ ମିଳିଥିଲା । ତେବେ ସେଠାକାର ସ୍ଥାନୀୟ ବାସିନ୍ଦା ଗୋଟିଏ କୁକୁରକୁ ଡଷ୍ଟବିନରୁ ଏକ ବ୍ୟାଗ୍ ଭିଡୁଥିବାର ଦେଖି ବ୍ୟାଗରେ କ’ଣ ଅଛି ବୋଲି ଖୋଲିବାରୁ ସେମାନେ ଯାହା ଦେଖିଥିଲେ ସେଥିରେ ତାଙ୍କ ହୋସ୍ ଉଡିଯାଇଥିଲା । ମୁଣ୍ଡବିହୀନ ପାଞ୍ଚୋଟି କୁକୁରଛୁଆଙ୍କ ରକ୍ତ ଜୁଡୁବୁଡୁ ଅବସ୍ଥା ଦେଖି ମା’ କୁକୁରଟି ମଧ୍ୟ ସେଠାରୁ କେଉଁଆଡେ ଯାଉନଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ଆଖପାଖର ଲୋକମାନଙ୍କ କହିବାନୁସାର କ୍ରାନ୍ତି ନାମକ ଜଣେ ଯୁବକ ପୂର୍ବରାତିରେ ନିଶାସକ୍ତ ଅବସ୍ଥାରେ ଥିଲା ଏବଂ କୁକୁରମାନଙ୍କ ଭୋକିବା କାରଣରୁ ବ୍ୟସ୍ତ ହୋଇ ସେ କୁକୁର ପିଲାଙ୍କ ମୁଣ୍ଡକୁ ଶରୀରରୁ ଅଲଗା କରି ଦେଇଥିଲା । ତେବେ ସେଠାକାର ଲୋକମାନେ ଏନେଇ ପୋଲିସକୁ ଖବର ଦେବାପରେ ଉକ୍ତ ଯୁବକକୁ ପୋଲିସ୍ ଗିରଫ କରିଛି ।