କେଉଁଠି ଜନ୍ମ ହୋଇଥିଲେ ସାଇ ବାବା ? ଉଦ୍ଧବ ଠାକରେଙ୍କ ବୟାନ ପରେ ବଢ଼ିଲା ବିବାଦ । ରବିବାର ଶିରିଡ଼ି ବନ୍ଦ କଥାକୁ ଗୁଜବ କହିଲେ ମନ୍ଦିରର କାର୍ଯ୍ୟ ନିର୍ବାହୀ ଅଧିକାରୀ ।
କନକ ବ୍ୟୁରୋ: ବନ୍ଦ ହେବନି ସାଇ ବାବାଙ୍କ ଦରବାର । କେବଳ ଶିରିଡିରେ ପାଳନ ହେବ ବନ୍ଦ । ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ବୟାନକୁ ଜୋରଦାର ବିରୋଧ । ରବିବାର ଠାରୁ ଶିରିଡି ସାଇ ବାବାଙ୍କ ଦରବାର ଓ ଦର୍ଶନ ବନ୍ଦ ହେବା ନେଇ ଯେଉଁ ପ୍ରଚାର ଚାଲିଥିଲା ତାକୁ ଖଣ୍ଡନ କରିଛି ଶରିଡି ସାଇ ଟ୍ରଷ୍ଟ । ଏନେଇ ଏକ ବିବୃତି ଜାରି କରାଯାଇଛି । ଏଥିରେ ରବିବାର ଓ ଏହାପରେ ମଧ୍ୟ ବାବାଙ୍କ ଆରତି ଠାରୁ ଆରମ୍ଭ କରି ଅନ୍ୟାନ୍ୟ ପୂଜାନୀତି ପୂର୍ବପରି ଚାଲୁ ରହିବ ବୋଲି କୁହାଯାଇଛି । ଏପରିକି ଟ୍ରଷ୍ଟ ପକ୍ଷରୁ ପ୍ରସାଦାଳୟ, ଭକ୍ତ ନିବାସ ଓ ହସ୍ପିଟାଲ ନିୟମିତ ଭାବେ କାର୍ଯ୍ୟ କରିବ ବୋଲି ସ୍ପଷ୍ଟ କରାଯାଇଛି । ଶିରିଡି ସାଇ ମନ୍ଦିରର ମୁଖ୍ୟ ପରିଚାଳନା ଅଧିକାରୀ ଦୀପକ ମୁଗଲିକର ଏହି ପ୍ରେସ ବିବୃତି ଜାରି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଏକ ବୟାନକୁ ବିରୋଧ କରି ରବିବାର ଠାରୁ ଅନିର୍ଦ୍ଦିଷ୍ଟ କାଳ ଯାଏଁ ଶିରିଡି ସାଇ ମନ୍ଦିର ବନ୍ଦ ରହିବ ବୋଲି ଚର୍ଚ୍ଚା ହେଉଥିଲା । ହେଲେ ଟ୍ରଷ୍ଟ ପକ୍ଷରୁ ଏହାକୁ ଗୁଜବ ବୋଲି ସ୍ପଷ୍ଟ କରାଯାଇଛି ।
ସେପଟେ ଉଭୟ ହିନ୍ଦୁ ଓ ମୁସଲମାନ ସଂପ୍ରଦାୟର ଲକ୍ଷ ଲକ୍ଷ ଭକ୍ତ ସାଇ ବାବାଙ୍କୁ ବିଶ୍ୱାସ କରିଥାନ୍ତି । ବାବାଙ୍କ ସାନିଧ୍ୟ ଲାଭ କରିବାକୁ ମହାରାଷ୍ଟ୍ର ଅହମଦନଗରରେ ଥିବା ଶିରିଡି ଗାଁକୁ ଧାଇଁ ଆସନ୍ତି ଦେଶ ବିଦେଶରୁ ଭକ୍ତ । ଏକ ଆକଳନ ଅନୁସାରେ ପ୍ରତିଦିନ ଶିରିଡିକୁ ଦେଶ, ବିଦେଶରୁ ପ୍ରାୟ ୬୦ ହଜାର ଭକ୍ତ ଆସିଥାନ୍ତି । ଛୁଟିଦିନ ମାନଙ୍କରେ ଏହି ସଂଖ୍ୟା ୧ ଲକ୍ଷ ମଧ୍ୟ ପାର କରିଯାଏ । ଗୁରୁପୂର୍ଣ୍ଣିମା, ଦଶହରା ଓ ରାମନବମୀ ଭଳି ଦିନରେ ଏହି ସଂଖ୍ୟା ବହୁଗୁଣିତ ହୁଏ । ସ୍ୱତନ୍ତ୍ର ଦିନମାନଙ୍କରେ ଶିରିଡିରେ ଭକ୍ତ ସଂଖ୍ୟା ୫ ଲକ୍ଷ ମଧ୍ୟ ଛୁଇଁଥାଏ ।
ସିରିଡିକୁ ନେଇ ପୁରା ବିବାଦ ଆରମ୍ଭ ହୋଇଥିଲା ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ଏକ ବୟାନକୁ ନେଇ । ସାଇ ବାବାଙ୍କ ଜନ୍ମ ସ୍ଥାନକୁ ନେଇ ଉଦ୍ଧବ ଠାକରେଙ୍କ ବୟାନକୁ ବିରୋଧ କରୁଛନ୍ତି ଶିରିଡି ବାସିନ୍ଦା । ମହାରାଷ୍ଟ୍ର ଅହମଦନଗରରେ ଥିବା ଶିରିଡି ଗାଁ ହିଁ ବାବାଙ୍କ ଜନ୍ମ ଓ କର୍ମ ସ୍ଥଳୀ ବୋଲି ଭକ୍ତମାନଙ୍କ ଭିତରେ ମାନ୍ୟତା ରହିଆସିଛି ।
ହେଲେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ କହିଛନ୍ତି ଶିରିଡିଠାରୁ ୨୭୫ କିଲୋମିଟର ଦୂର ପାଥରିରେ ଜନ୍ମ ହୋଇଥିଲେ ସାଇ ବାବା । ତେଣୁ ଏହି ଅଂଚଳର ବିକାଶ ପାଇଁ ୧୦୦ କୋଟି ଟଙ୍କାର ଅନୁଦାନ ମଧ୍ୟ ଘୋଷଣା କରିଥିଲେ । ପାଥରିର ବିକାଶ ହେଲେ ଶିରିଡି ଏହାର ଆଧ୍ୟାତ୍ମିକ ଗୁରୁତ୍ୱ ହରାଇବ ବୋଲି ଆଶଙ୍କା କରି ବିରୋଧ କରୁଛନ୍ତି ଶିରିଡିବାସୀ ।