ଆଜି ପବିତ୍ର ସ୍ନାନପୁର୍ଣ୍ଣିମା । ମହାପ୍ରଭୂ ଶ୍ରୀ ଜଗନ୍ନାଥ, ବଡଭାଇ ବଳଭଦ୍ର ଓ ଭଉଣୀ ସୁଭଦ୍ରା ଆଜି ସ୍ନାନ ବେଦୀରେ ଗାଧୋଇବେ । ୧୦୮ ଗରା ଜଳରେ ଶ୍ରୀ ଜିଉ ମାନଙ୍କୁ ଗାଧୋଇ ଦିଆଯିବ । ଗତ ରାତିରୁ ରତ୍ନସିଂହାସନରେ ଚାରମାଳ ପଡିସାରିଛି । କୋଠସୁଆଁସିଆ ସେବକମାନେ ଏହି ଚାରମାଳ ବ୍ୟବସ୍ଥା କରିଛନ୍ତି । ତା’ଛଡା ଶ୍ରୀଅଙ୍ଗ ଲାଗି ଦଇତାପତି ସେବକମାନେ ଶ୍ରୀଅଙ୍ଗରେ ସେନାପଟା ଲାଗି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀବିଗ୍ରହ ସ୍ନାନ ବେଦୀରେ ଅଧିଷ୍ଠିତ ହେବା ପରେ ସୁନା ଗୋସାଇଁଙ୍କ ପରିବାର ସଦସ୍ୟମାନେ ଉତ୍ତର ଦ୍ୱାରା ବାହାର ବେଢ଼ାସ୍ଥିତ ମା ଶୀତଳାଙ୍କ ମନ୍ଦିର ସମ୍ମୁଖ ସୁନା କୂଅରୁ ୧୦୮ ଗରା ଜଳକୁ ଅଧିବାସ ଘର ‘ଘେନାଳ ଘର’କୁ ଆଣିବେ । ଏଥିପାଇଁ ପରମ୍ପରା ମୁତାବକ ଶ୍ରୀମନ୍ଦିର ଉତ୍ତର ଦ୍ୱାର ନିକଟସ୍ଥ ଶୀତଳା ମନ୍ଦିର ସମ୍ମୁଖ ଏହି ସୁନା କୂଅ ବର୍ଷକୁ ଥରେ ଖୋଲିବ ।
ମହାପ୍ରଭୂଙ୍କ ସ୍ନାନ ଜଳ ସଂଗ୍ରହ ପରେ ସୁନାକୂଅକୁ ପୁଣି ବନ୍ଦ କରିଦିଆଯିବ । ଘେନାଳ ଘରେ ଗରାବଡୁ ସେବାୟତମାନେ ଏହି ଜଳକୁ ଚନ୍ଦନ, କର୍ପୂର,ଚୁଆରେ ଅଧିବାସ କରି ରଖିବେ । ଏହି ଜଳକୁ ପୂଜାପଣ୍ଡା ଷୋଡଶ ଉପଚାରରେ ପୂଜା କରିବେ । ପ୍ରଭୂ ଜଗନ୍ନାଥ ବାଡରେ ୩୫ ଗରା, ବଳଭଦ୍ରଙ୍କ ବାଡରେ ୩୩ ଗରା, ମା ସୁଭଦ୍ରାରଙ୍କ ବାଡରେ ୨୨ ଗରା ,ସୁଦର୍ଶନଙ୍କ ବାଡରେ ୧୮ ଗରା ଏଭଳି ୧୦୮ ଗରା ପାଣିରେ ମହାପ୍ରଭୂ ସ୍ନାନ କରିବେ ।