ଦେଶରେ ସବୁଠୁ ଅଧିକ ହାତୀ ଓଡିଶାରେ ମରିଛନ୍ତି । ୫ ବର୍ଷରେ ବିଦ୍ୟୁତ ସଂସ୍ପର୍ଶରେ ମଲେଣି ୪୯ ହାତୀ, ଅନ୍ୟପଟେ ହାତୀ ମୃତ୍ୟୁ ଘଟଣାରେ ଆରମ୍ଭ ହେଲା କ୍ରାଇମବ୍ରାଞ୍ଚ ତଦନ୍ତ
କନକ ବ୍ୟୁରୋ : ବିଦ୍ୟୁତ ତାର ସଂସ୍ପର୍ଶରେ ଆସି ୭ ହାତୀ ପ୍ରାଣ ହରାଇବା ଘଟଣାର କ୍ରାଇମବ୍ରାଂଚ ତଦନ୍ତ ଆରମ୍ଭ ହୋଇସାରିଛି । ସେପଟେ ନ୍ୟାସନାଲ ଗ୍ରୀନ ଟ୍ରିବ୍ୟୁନାଲ, ରାଜ୍ୟରେ ୧୪ଟି ହାତୀ କରିଡର ଚିହ୍ନଟ କରିଥିବା ବେଳେ ରାଜ୍ୟ ସରକାର ଏହି କରିଡରକୁ ହାତୀ କରିଡର ବୋଲି ନୋଟିଫାଏ କରିନାହାନ୍ତି । ଯାହାକି ହାତୀ ମୃତ୍ୟୁ ପଛର ଆଉ ଏକ କାରଣ ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଢେଙ୍କାନାଳର ମେରାମୁଣ୍ଡଳୀରେ ପଡିରହିଥିବା ୭ଜଣ ହାତୀଙ୍କ ଏହି ଶବ ଚିକ୍ରାର କରି କହୁଛି ଯେ ସେମାନଙ୍କ ସୁରକ୍ଷା ପ୍ରତି କେତେବଡ ବିପଦ ରହୁଛି । ୨୦୧୨ରୁ ୨୦୧୭ ନଭେମ୍ବର ମଧ୍ୟରେ ମାତ୍ର ୫ବର୍ଷ ଭିତରେ, ଆପଣ ଅନୁମାନ ବି କରିପାରିବେନି ଯେ ୪୯ଟି ହାତୀଙ୍କର କେବଳ ବିଦ୍ୟୁତ ସଂସ୍ପର୍ଶରେ ମୃତ୍ୟୁ ଘଟିଛି । ତେଣୁ କୌଣସି ଅଧିକାରୀ ଏହି ବାହାନା ନେଇପାରିବେନି ଯେ ଏଭଳି ବିପଦ ପ୍ରତି ସେମାନେ ଅବଗତ ନଥିଲେ ।
ଆପଣ ଜାଣିଲେ ସରକାରଙ୍କ ଅବହେଳା କଥା ସହଜରେ ଅନୁମାନ କରିପାରିବେ । ନ୍ୟାସନାଲ ଗ୍ରିନ ଟ୍ରିବ୍ୟୁନାଲ ଓଡିଶାରେ ୧୪ଟି ହାତୀ କରିଡରକୁ ଚିହ୍ନଟ କରିଛି । ୱାଇଲ୍ଡ ଲାଇଫ ଓଡିଶାର ପକ୍ଷରୁ ୮୭୦.୬ କିଲୋମିଟର ଜଙ୍ଗଲ ମଧ୍ୟରୁ ହାତୀ କରିଡର ଅଂଚଳ ୪୨୧ କିଲୋମିଟର ବୋଲି ଦର୍ଶାଯାଇଛି । ହେଲେ ସରକାର ଏହି ସବୁ ଚିହ୍ନଟ ହୋଇଥିବା କରିଡରକୁ ହାତୀ କରିଡର ବୋଲି ନୋଟିଫାଏ କରୁନାହାନ୍ତି । ଫଳରେ ଏସବୁ ସ୍ଥାନରେ ହାତୀ କରିଡରର ନିୟମ ପାଳନ ହେଉନଥିବା ଅଭିଯୋଗ ହୋଇଛି । ଏହା ବ୍ୟତୀତ ୱାଇଲ୍ଡ ଲାଇଫ ସୋସାଇଟି ଅଫ ଓଡିଶା ପକ୍ଷରୁ ରାଜ୍ୟରେ ୨୦୦ଟି ଏପରି ସ୍ଥାନ ଚିହ୍ନଟ ହୋଇଛି ଯେଉଁଠାରେ ବିଦ୍ୟୁତ ତାର କମ ଉଚ୍ଚତାରେ ଝୁଲନ୍ତା ଅବସ୍ଥାରେ ରହିଛି । ଯାହାକି ରାଜ୍ୟରେ ହାତୀ ମୃତ୍ୟୁର ଏକ ପ୍ରମୁଖ କାରଣ ବୋଲି ସନ୍ଦେହ କରାଯାଉଛି ।
ଦେଶରେ ସବୁଠୁ ଅଧିକ ହାତୀ ମୃତ୍ୟୁ ଓଡିଶାରେ ହୋଇଛି । ମିଳିଥିବା ସୂଚନା ଅନୁସାରେ ୨୦୧୨ରୁ ୨୦୧୭ ମଧ୍ୟରେ ୪୧୯ଟି ହାତୀ ପ୍ରାଣ ହରାଇଛନ୍ତି । ୪୯ ଟି ହାତୀର କେବଳ ବିଦ୍ୟୁତ ସଂସ୍ପର୍ଶରେ ମୃତ୍ୟୁ ହୋଇଥିବା ଜଣାପଡିଛି । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଆଉ ଏସବୁ ଭିତରେ ବନ୍ୟଜନ୍ତୁ ସୁରକ୍ଷା ପାଇଁ ରାଜ୍ୟ ସରକାର କେତେ ତତ୍ପର ତାହା ଏବେ ସବୁଠାରୁ ବଡ ପ୍ରଶ୍ନବାଚୀ ହୋଇ ଛିଡା ହୋଇଛି ।
ଏହା ଭିତରେ ଢେଙ୍କାନାଳ ହାତୀ ମୃତ୍ୟୁ ଘଟଣାର ଛାନଭିନ ଆରମ୍ଭ କରିଛି କ୍ରାଇମବ୍ରାଂଚ । ମୁଖ୍ୟମନ୍ତ୍ରୀଙ୍କ ତଦନ୍ତ ନିର୍ଦ୍ଦେଶ ପରେ କ୍ରାଇମବ୍ରାଂଚର ୫ ଜଣିଆ ଟିମ ଘଟଣାସ୍ଥଳରେ ପହଁଚି ତଦନ୍ତ ଆରମ୍ଭ କରିଛନ୍ତି । କ୍ରାଇମବ୍ରାଂଚ ଡିଏସପିଙ୍କ ନେତୃତ୍ୱରେ ଏହି ୫ ଜଣିଆ ଟିମ ଢେଙ୍କାନାଳ କମଳାଙ୍ଗ ଗାଁକୁ ଗସ୍ତ କରିଛନ୍ତି । ତଦନ୍ତ ପରେ ରାଜ୍ୟ ସରକାରଙ୍କୁ ରିପୋର୍ଟ ପ୍ରଦାନ କରିବ ଏହି ଟିମ । ସେପଟେ ହାତୀ ମୃତ୍ୟୁ ନେଇ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଟ୍ୱିଟ୍ କରି କେନ୍ଦ୍ର ମନ୍ତ୍ରୀ ଲେଖିଛନ୍ତି ସରକାରର ଗୋଟିଏ ହାତ କଣ କରୁଛି ଆଉ ଗୋଟେ ହାତ ଜାଣୁନି । ଜଙ୍ଗଲ ବିଭାଗ ଓ ବିଜୁଳି ବିଭାଗ ଅଧିନରେ ଥିବା ସେସୁ ଉଭୟଙ୍କ ମଧରେ ସାମାନ୍ୟତମ ଯୋଗସୂତ୍ର ନରହିବା ଓଡିଶାର ଅମୂଲ୍ୟ ସଂପଦକୁ ନଷ୍ଟ କରୁଥିବା ଧର୍ମେନ୍ଦ୍ର କହିଛନ୍ତି ।