କନକ ବ୍ୟୁରୋ : ବ୍ଲକ୍ ଓ ପଂଚାୟତ ସ୍ତରରେ ଚାଲିଛି ବ୍ୟାପକ ପିସି କାରବାର । ସ୍ୱତନ୍ତ୍ର ହେଲ୍ପଲାଇନ ନମ୍ବର ଜାରିହେବା ପରଠାରୁ ଲାଂଚ କାରବାର ନେଇ ପ୍ରାୟ ୩ଶହ ଅଭିଯୋଗ ଆସିଛି । ଏପରିକି ବର୍ତ୍ତମାନ ପର୍ଯ୍ୟନ୍ତ ୫ଶହ ୬୦ଟି ଅଭିଯୋଗ ଆସିଥିବାବେଳେ ୧୯୭ଟି ମାମଲାର ଅଚାନକ ଯାଂଚ କରାଯାଇଛି । ଯେଉଁଥିରୁ ୩୮ଟି କ୍ଷେତ୍ରରେ ମକଦ୍ଦମା ହୋଇଛି । ଏପରିକି ଗତ ୨୦ ତାରିଖରେ ହେଲ୍ପଲାଇନ ନମ୍ବର ଜାରିହେବା ପରଠାରୁ ୨ଶହ ୮୯ଟି ଅଭିଯୋଗ ଆସିଥିବା ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜିଲ୍ଲାପାଳ ସମ୍ମିଳନୀରେ ବ୍ଲକ ସ୍ତରରେ ପିସି କାରବାର ବନ୍ଦ କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଅଭିମୁଖ୍ୟ କଡା କରିଛନ୍ତି ସରକାର । ପିସି କାରବାରକୁ ଆଦୌ ବରଦାସ୍ତ କରାଯିବ ନାହିଁ ବୋଲି କୁହାଯାଇଛି । ଏଥିପାଇଁ ବ୍ଲକସ୍ତରରେ ସମସ୍ତ ପଂଚାୟତ ପ୍ରତିନିଧି ଓ ସରକାରୀ କର୍ମଚାରୀଙ୍କୁ ଦୁର୍ନୀତିର କୁପରିଣାମ ସଂପର୍କରେ ସଚେତନ କରାଯିବ । ଏଥିସହ ବ୍ଲକ ଓ ଜିଲ୍ଲାସ୍ତରୀୟ କମିଟି ସରକାରଙ୍କ ବିକାଶ ଓ ଜନକଲ୍ୟାଣକାରୀ ଯୋଜନାର କାର୍ଯ୍ୟକାରିତାରେ ସ୍ୱଚ୍ଛତାକୁ ତଦାରଖ କରିବେ । ମୁଖ୍ୟମନ୍ତ୍ରୀଙ୍କ ଅଧ୍ୟ କ୍ଷତାରେ ଆଜି ସଚିବାଳୟରେ ବସିଥିବା ବୈଠକରେ ଏହି ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଭିଜିଲାନ୍ସ ୬ଟି ଡିଭିଜନ୍ ପାଇଁ ଜାରି କରିଥିବା ଟେଲିଫୋନ୍ ନମ୍ବର ଗୁଡିକ ହେଲା-
କଟକ- ୨୩୦୫୯୮୮/ ୨୩୦୫୬୮୨
ଭୁବନେଶ୍ୱର- ୨୩୯୭୭୪୮
ବ୍ରହ୍ମପୁର- ୨୨୮୨୩୦୦
ସମ୍ବଲପୁର- ୨୪୧୨୧୧୫
ବାଲେଶ୍ୱର- ୨୫୫୦୦୫
କୋରାପୁଟ- ୨୩୩୩୩୦
ଗୃହ ନିର୍ମାଣରେ ଲାଂଚ ସଂପର୍କରେ ଯେକେହି ବ୍ୟକ୍ତି ସକାଳ ୮ଟାରୁ ରାତି ୮ଟା ପର୍ଯ୍ୟନ୍ତ ଏହି ସ୍ୱତନ୍ତ୍ର ନମ୍ବରଗୁଡ଼ିକୁ ଫୋନ୍ କରିପାରିବେ । ଅନ୍ୟପଟରେ ଭିଜିଲାନ୍ସ ବା ଅନ୍ୟ କାହାଠାରୁ ଏ ନେଇ ସହାୟତା ନପାଇଲେ ଅଭିଯୋଗକାରୀମାନେ ଟଙ୍କାରେ ଦସ୍ତଖତ କରି ଲାଂଚ କାରବାରକୁ ଧରନ୍ତୁ ବୋଲି ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି ।
ଏହା ପୂର୍ବରୁ ଗ୍ରାମାଂଚଳରେ ପିସି କାରବାର ରୋକିବାକୁ ସମସ୍ତ ଜିଲ୍ଲାର ଜିଲ୍ଲାପାଳମାନଙ୍କୁ ଚିଠି ଲେଖିଥିଲେ ରାଜ୍ୟର ମୁଖ୍ୟ ଶାସନ ସଚିବ । କିଛି ଦୁର୍ନୀତିଖୋର ଅମଲା ଓ ନେତାଙ୍କ ଯୋଗୁଁ ସରକାରଙ୍କ ଛବି ଖରାପ ହେଉଛି ବୋଲି ସେ ଜିଲ୍ଲାପାଳମାନଙ୍କୁ ଲେଖିଥିଲେ । ବ୍ଲକ ଓ ପଂଚାୟତ ସ୍ତରରେ କିଭଳି ଖୋଲାଖୋଲି ପିସି କାରବାର ଚାଲିଛି ସେନେଇ କନକ ନ୍ୟୁଜ୍ କାମ୍ପେନ୍ କରିବା ସହ ସାରା ରାଜ୍ୟର ବିଭିନ୍ନ ଅଂଚଳରୁ ଖବର ପ୍ରସାରଣ କରିଥିଲା ।
ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ ପିସି କାରବାର ରୋକିବା ପାଇଁ ଦରକାର ପଡ଼ିଲେ, ଟଙ୍କାରେ ଦସ୍ତଖତ କରି ଧରନ୍ତୁ ବୋଲି ଆହ୍ୱାନ ଦେବା କେତେ ଦୂର ଠିକ୍ ସେ ନେଇ ପ୍ରଶ୍ନ ଉଠିଛି । ଟଙ୍କାକୁ ସବୁବେଳେ ସଫା ରଖିବା ପାଇଁ ରିଜର୍ଭ ବ୍ୟାଙ୍କ୍ ସର୍ବସାଧାରଣଙ୍କୁ ସଚେତନ କରୁଛି । ଏଭଳି ସ୍ଥିତିରେ ମନ୍ତ୍ରୀଙ୍କ ବିବୃତିର କି ପ୍ରଭାବ ପଡ଼ିବ ତାହା ସ୍ପଷ୍ଟ ହୋଇନାହିଁ ।