ଜିଏସଟି ପ୍ରଭାବ ! ୩ ମାସ ପୂର୍ବରୁ ଇଦ୍ ସହିତ ପାଳନ କରନ୍ତୁ ଦିପାବଳୀ
ଦୀପାବଳୀ ଆଉ ମାତ୍ର ୩ମାସ ବାକି କିନ୍ତୁ ଏହାର ଲାଭ ଏବେଠାରୁ ଉଠାଲେଣି ଗ୍ରାହକ । କାରଣ, ଦୀପାବଳୀରେ ଉତ୍ସବରେ ବିଭିନ୍ନ ବୈଦ୍ୟୁତିକ ଉପକରଣ ଉପରେ ଲାଗୁ କରାଯାଉଥିବା ଅଫରଗୁଡିକୁ ଏବେଠାରୁ କଂପାନୀମାନେ ଭେଟି ଦେଲେଣି ଗ୍ରାହକଙ୍କୁ । ଅର୍ଥାତ୍ ୩ ମାସ ପୂର୍ବରୁ ହିଁ କଂପାନୀମାନେ ଏଭଳି ପଦକ୍ଷେପ ନେଇସାରିଲେଣି । ଏଥିସହିତ ଚଳିତ ମାସର ଶେଷ ସପ୍ତାହରେ ହେବାକୁ ଯାଉଥିବା ‘ଇଦ୍’ ପାଇଁ ମଧ୍ୟ ଜିନିଷପତ୍ର କିଣାବିକା ଆରମ୍ଭ ହୋଇସାରିଛି । ତେବେ ଏହାର ମୁଖ୍ୟ କାରଣ ହେଲା ଜିଏସଟିର ପ୍ରଭାବ । କାରଣ, ଜୁଲାଇ ୧ ଠାରୁ ଦେଶରେ ଜିଏସଟି ଲାଗୁ ହୋଇଯିବ । ଯାହାଦ୍ୱାରା ବିଭିନ୍ନ ବୈଦ୍ୟୁତିକ ସରଞ୍ଜାମଗୁଡିକ ଉପରେ କଂପାନୀମାନଙ୍କୁ କ୍ଷତି ସହିବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ତେଣୁ ବୈଦ୍ୟୁତିକ ଉପକରଣ ନିର୍ମାଣ କରୁଥିବା କଂପାନୀମାନେ ଜିଏସଟି ଲାଗୁ ହେବା ପୂର୍ବରୁ ନିଜ ଗଚ୍ଛିତ ପ୍ରଡକ୍ଟକୁ ବିକ୍ରୀ କରିବାରେ ଲାଗି ପଡିଛନ୍ତି । ଯେଉଁଥିପାଇଁ ଦୀପାବଳୀ ଅଫର ୩ ମାସ ବାକି ରହିଥିଲେ ମଧ୍ୟ କଂପାନୀମାନେ ଗ୍ରାହକଙ୍କୁ ଅଧିକରୁ ଅଧିକ ପ୍ରଲୋଭନ ଦେଖାଇ ୨୦ରୁ ୩୦ ପ୍ରତିଶତ ରିହାତିର ଅଫରମାନ ଘୋଷଣା କରିଛନ୍ତି ।
ଟିଭି ସେଟ୍, ରେଫ୍ରିଜରେଟର୍, ୱାସିଂ ମେସିନ୍ ଏବଂ ଏୟାର କଣ୍ଡିସନର’ର ମୂଲ୍ୟକୁ ବହୁତ କମାଇ ଦେଇଛନ୍ତି କଂପାନୀମାନେ । କାରଣ ଜିଏସଟି ଲାଗୁ ହେବାପରେ ଏହି ସମସ୍ତ ଉପକରଣଗୁଡିକୁ ବିକ୍ରୀ କରିବାକୁ ରିଟେଲରଙ୍କୁ ପାଖାପାଖି ୬ରୁ ୧୪ ପ୍ରତିଶତ କ୍ଷତି ସହିବାକୁ ପଡିପାରେ ।
ତେବେ ଜିଏସଟିକୁ ୧ ଜୁଲାଇଠାରୁ ଦେଶରେ ଲାଗୁ କରିବାକୁ ଯୋଜନା ରହିଛି । ଏହାଦ୍ୱାରା ପାଖାପାଖି ୧୨ ଶହ ବସ୍ତୁ ଏବଂ ୫ ଶହ ସେବା ଉପରେ ପ୍ରଭାବ ପଡିଛି । ଯେଉଁଥିରେ ରହିଛି ଅତ୍ୟାବଶ୍ୟକୀୟ ସାମଗ୍ରୀଗୁଡିକ ଜିଏସଟିଦ୍ୱାରା ଶସ୍ତା ହେବାସହତି ତାଜା ଫଳ, ପନିପରିବା, ଡାଲି , ବ୍ରେଡ୍ ଏବଂ କ୍ଷୀର ଆଦିକୁ ଏଥିରୁ ବାଦ୍ ଦିଆଯାଇଛି ।