ଆଜି ଲୋକାର୍ପଣ ହେବ ‘ସମ୍ବାଦ ଡିଜିଟାଲ’ । ଆରମ୍ଭ ହେବ ପୁନଶ୍ଚ ପୃଥିବୀ ଅଭିଯାନ ।
କନକ ବ୍ୟୁରୋ : ସମ୍ବାଦ ଗ୍ରୁପ, ଓଡ଼ିଶାର ବୃହତ୍ତମ ଗଣମାଧ୍ୟମ ସଂସ୍ଥା ପକ୍ଷରୁ ଆଜି ‘ସମ୍ବାଦ ଡିଜିଟାଲ’ର ଲୋକାର୍ପଣ କରାଯିବ । ଏହି ଲୋକାର୍ପଣ ସମାରୋହ ମାଧ୍ୟମରେ ସମ୍ବାଦ ଗ୍ରୁପର ବିଭିନ୍ନ ଡିଜିଟାଲ ଓ ସୋସିଆଲ ମିଡିଆ ପ୍ଲାଟଫର୍ମ – ସମ୍ବାଦ ଡଟ୍ ଇନ, କନକ ନ୍ୟୁଜ, ମଞ୍ଜରୀ ଟିଭି, ରେଡିଓ ଚୋକୋଲେଟ୍ ଆଦିର ସଫଳତାକୁ ପାଳନ କରାଯିବ । ସମ୍ବାଦର ବିଭିନ୍ନ ଡିଜିଟାଲ ପ୍ଲାଟଫର୍ମଗୁଡ଼ିକର ସମ୍ମିଳିତ ‘ଏନଗେଜମେଣ୍ଟ’ ଏବେ ମାସିକ ୧୦୦ ନିୟୁତ ଟପିଯାଇଛି । ଏହା ସମ୍ବାଦ ଡିଜିଟାଲର ବଢିଚାଲିଥିବା ଲୋକପ୍ରିୟତାକୁ ଦର୍ଶାଉଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଭର୍ଚୁଆଲ ସମାବେଶରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପିନ୍ଦର ଯାଦବ ଏବଂ ସେଣ୍ଟର ଫର ସାଇନ୍ସ ଏଣ୍ଡ ଏନଭାରମେଣ୍ଟର ମହାନିର୍ଦ୍ଦେଶିକା ସୁନୀତା ନାରାୟଣ ଯୋଗ ଦେବେ । ଏହି ଅବସରରେ ସମ୍ବାଦ ଗ୍ରୁପ ପକ୍ଷରୁ ପୁନଶ୍ଚ ପୃଥିବୀ ନାମକ ଅଭିଯାନ ଆରମ୍ଭ କରାଯିବ । ଏହା ମାଧ୍ୟମରେ ମଣିଷ ସମାଜ ପ୍ରତି ବିପଦ ସୃଷ୍ଟି କରିଥିବା ପରିବେଶ ପ୍ରଦୂଷଣ, ଜଳବାୟୁ ପରିବର୍ତ୍ତନ ଆଦି ପ୍ରସଙ୍ଗ ଉପରେ ସଚେତନତା ସୃଷ୍ଟି କରାଯିବ । ସମ୍ବାଦଗ୍ରୁପ ନିଜର ସମସ୍ତ ମଲଟିମିଡିଆ ପ୍ଲାଟଫର୍ମର ବ୍ୟବହାର କରି ଏସବୁ ପ୍ରସଙ୍ଗରେ ସଚେତନତା ସୃଷ୍ଟି କରିବ । ଜଣାଶୁଣା ପରିବେଶବିତମାନଙ୍କୁ ନେଇ ଗଠିତ ଏକ ସ୍ୱତନ୍ତ୍ର ପ୍ୟାନେଲ ମାଧ୍ୟମରେ ଏସବୁ ପ୍ରସଙ୍ଗରେ ଆଲୋଚନା କରାଯିବ ।
ଅନ୍ୟପକ୍ଷରେ ସାରା ବିଶ୍ୱରେ ଥିବା ପ୍ରବାସୀ ଓଡ଼ିଆଙ୍କୁ ଏକାଠି କରିବାକୁ ସମ୍ବାଦ ଇ-ପେପରରେ ଏକ ସ୍ୱତନ୍ତ୍ର ସ୍ଥାନ ରହିବ ।
ଏହି ଭର୍ଚୁଆଲ ସମାବେଶରେ ଯୋଗ ଦେବା ପାଇଁ ଲୋକମାନେ ଅଗଷ୍ଟ ୧୮, ଅପରାହ୍ନ ସାଢେ ୫ଟା ବେଳେ ଜୁମ୍ ଲିଙ୍କ https://zoom.us/j/98203301206 ରେ କ୍ଲିକ କରିପାରିବେ ।