ଯବାନଙ୍କୁ ଧର୍ମ ସହ ନଯୋଡିବାକୁ ସେନାର ଚେତାବନୀ ! ଲେଫଟନାଂଟ ଜେନେରାଲ ଦେବରାଜ କହିଲେ, ଦେଶ ପାଇଁ ଜୀବନ ଦେଉଥିବା ସିପାହୀଙ୍କର ନାହିଁ କୌଣସି ଜାତି
କନକ ବ୍ୟୁରୋ : ଆର୍ମିକ୍ୟାମ୍ପ ଉପରେ ଆକ୍ରମଣ ନେଇ ପାକିସ୍ତାନକୁ ଚେତାବନୀ ଦେଇଛି ସେନା । ସେନା ପକ୍ଷରୁ କୁହାଯାଇଛି ଯେ, ଏଭଳି ଘଟଣାରେ ନା ଆତଙ୍କବାଦୀ ନିସ୍ତାର ପାଇବେ ନା ସେମାନଙ୍କୁ ସହାୟତା କରିବା ଦେଶ । ପାକିସ୍ତାନକୁ ଇସାରା କରି ସେନା ପକ୍ଷରୁ ଲେଫଟନାଂଟ ଜେନେରାଲ ଦେବରାଜ କହିଛନ୍ତି- ସୀମାରେ ଆତଙ୍କବାଦୀ ଫେଲ ମାରିବା ପରେ ଏବେ ଆର୍ମି କ୍ୟାମ୍ପକୁ ଟାର୍ଗେଟ କରାଯାଉଛି । ସେନାର କଡା ଆଭିମୁଖ୍ୟ ଯୋଗୁଁ ଆତଙ୍କବାଦୀ ଏଭଳି ଆକ୍ରମଣ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେ ଆହୁରି କହିଛନ୍ତି, ଉରି ଆତଙ୍କବାଦୀ ଆକ୍ରମଣ ପରେ ବିଭିନ୍ନ କ୍ୟାମ୍ପର ସୁରକ୍ଷା ଲାଗି ୩୬୪ କୋଟି ଖର୍ଚ କରାଯାଇଛି । ତେବେ ସୀମାରେ ହେଉଥିବା ଅନୁପ୍ରବେଶକୁ ରୋକିବାକୁ ହେବ । ସୀମାରେ କଡା ଆଭିମୁଖ୍ୟ ଯୋଗୁଁ ପାକ୍ ମିଡିଆ ଅନୁସାରେ ବର୍ତମାନ ସୁଦ୍ଧା ୧୯୨ ପାକିସ୍ତାନ ଜବାନ ପ୍ରାଣ ହରାଇସାରିଲେଣି । ସୀମାରେ ପ୍ରାୟ ୨ ଶହରୁ ୨୫୦ ଆତଙ୍କବାଦୀ ଅନୁପ୍ରବେଶ ପାଇଁ ଉଦ୍ୟମ କରୁଛନ୍ତି ବୋଲି ବି ସେନା କହିଛି । ସୋସିଆଲ ମିଡିଆ ଯୋଗୁଁ ଯୁବପୀଢି ଆତଙ୍କବାଦ ଆଡକୁ ଆକର୍ଷିତ ହେଉଛନ୍ତି ଯୁବବର୍ଗ । ସେନାର କୌଣସି ଧର୍ମ ନାହିଁ । ଯୁବକମାନେ ଆତଙ୍କବାଦ ଆଡକୁ ଆକର୍ଷିତ ହେବା ଚିନ୍ତାର ବିଷୟ ।
ସେପଟେ ଭାରତକୁ ଧମକ ଦେଲା ପାକିସ୍ତାନ । ଭାରତ ଯଦି କୌଣସି ଦୁଃସାହସ କରେ ତେବେ ତାକୁ ତା ନିଜ ଭାଷାରେ ଜବାବ ଦେବ ପାକିସ୍ତାନ । ଏପରି ଧମକ ଦେଇଛନ୍ତି ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖୁରମ ଦସ୍ତାଗିର । ଏହା ସହ ଆତଙ୍କବାଦୀଙ୍କୁ କଶ୍ମୀର ସଂଗ୍ରାମୀ ବୋଲି ଆଖ୍ୟା ଦେଇଛନ୍ତି ଦସ୍ତାଗିର । ଆଉ କହିଛନ୍ତି, କଶ୍ମୀର ସ୍ୱାଧିନତା ପାଇଁ ଲଢୁଥିବା ସଂଗ୍ରାମୀଙ୍କ ଆକ୍ରମଣ ପାଇଁ ଭାରତ ପାକିସ୍ତାନକୁ ଦାୟୀ କରୁଛି । କିନ୍ତୁ ଯଦି ଭାରତ ପକ୍ଷରୁ ଏପରି କୌଣସି ପଦକ୍ଷେପ ନିଆଯାଏ ତେବେ ପାକିସ୍ତାନ ଚୁପ୍ ରହିବନି । ଭାରତ ଆମ ଉପରେ ଦୋଷ ଲଦିବା ପରିବର୍ତେ ନିଜ ଦେଶରେ ଚଳାଇଥିବା ଗୁଇନ୍ଦାଗିରି ବନ୍ଦ କରିବା ଉଚିତ ବୋଲି ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଦସ୍ତାଗିର କହିଛନ୍ତି । ଶ୍ରୀନଗର ଆର୍ମି କ୍ୟାମ୍ପ ଉପରେ ଆତଙ୍କବାଦୀ ଆକ୍ରମଣ ପରେ ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ପାକିସ୍ତାନକୁ ସର୍ଜିକାଲ ଷ୍ଟ୍ରାଇକ୍ ଆବଶ୍ୟକ ବୋଲି କହିଥିଲେ । ଏହାର ଜବାବରେ ପାକିସ୍ତାନ ପକ୍ଷରୁ ଏପରି ପାଲଟା ଧମକ ଦିଆଯାଇଛି ।