ଉତରପ୍ରଦେଶ ସ୍ଥିତ ମିର୍ଜାପୁର ଜିଲ୍ଲାର ଏକ ସାଧାରଣ ଦମ୍ପତି ଏବେ ଚର୍ଚ୍ଚାରେ । ପାଲଟି ଯାଇଛନ୍ତି ସେଲିବ୍ରିଟି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏଇ ଦମ୍ପତିଙ୍କ ନବଜାତ ଶିଶୁକନ୍ୟାର ନାମକରଣ କରିଛନ୍ତି ଏବଂ ମୋଦୀ ତାଙ୍କ ଶିଶୁ କନ୍ୟାର ନାମ ବୈଭବୀ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶୀଖର ବ୍ଲକ ନୟାପୁରା ହଂସିପୁରା ଗ୍ରାମର ଭରତ ସିଂଙ୍କର ଦୁଇମାସ ପୂର୍ବରୁ ଅଗଷ୍ଟ ୧୩ ରେ ଏକ ଶିଶୁକନ୍ୟା ଜନ୍ମ ନେଇଥିଲା । ଏଥିନେଇ ସେ ଓ ତାଙ୍କ ପତ୍ନୀ ବିଭା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀକୁ ଚିଠି ଲେଖିବାପାଇଁ ମନସ୍ଥ କରିଥିଲେ । ସ୍ୱାମୀ ସ୍ତ୍ରୀ ସବୁବେଳେ ଗୋଟେ ଝିଅ ଚାହୁଁଥିଲେ ବୋଲି ଭରତ ପ୍ରକାଶ କରିଛନ୍ତି । ଝିଅମାନେ ପୁଅମାନଙ୍କ ଅପେକ୍ଷା ବାପା ମାଙ୍କର ଅଧିକ ଯତ୍ନ ନିଅନ୍ତି ବୋଲି ମଧ୍ୟ କହିଛନ୍ତି ଭରତ । ଝିଅ ଜନ୍ମ ପରେ ଭରତଙ୍କ ସ୍ତ୍ରୀ ଝିଅର ନାମକରଣ ପାଇ ପ୍ରଧାନମନ୍ତ୍ରୀଙ୍କ ପାଖକୁ ଏକ ଚିଠି ଲେଖିଥିଲେ ।
ଅଗଷ୍ଟ ୧୩ରେ ଭରତ ଚିଠିକୁ ସ୍ପିଡ ପୋଷ୍ଟରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଇଥିଲେ । ଅଗଷ୍ଟ ୨୦ ଶନିବାର ପ୍ରାୟ ଦିନ ୧୦ ଟାରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଭରତଙ୍କପାଇଁ ଏକ ଫୋନ କଲ ଆସିଥିଲା । ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇବା ସହ ଝିଅର ନାମ ବୈଭବୀ ରଖିବାକୁ କହିଥିଲେ । ତା ପର ଦିନ ଭରତ ପ୍ରଧାନମନ୍ତ୍ରୀଙ୍କ ଫୋନ କଲ ବିଷୟରେ ଗ୍ରାମବାସୀଙ୍କୁ ଜଣାଇଥିଲ । କିନ୍ତୁ ଭରତଙ୍କ କଥା କେହିହେଲେ ବିଶ୍ୱାସ କଲେନାହିଁ ।
ଏଥିପାଇଁ ଅଗଷ୍ଟ ୨୨ରେ ଭରତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଆସିଥିବା ନମ୍ବରରେ କଲ କରିଥିଲେ । ପ୍ରଧାନମନ୍ତ୍ରୀଙ୍କ ଜବାବକୁ ଏକ ଚିଠି ଆକାରରେ ଦେବାପାଇଁ ସେ ଅନୁରୋଧ କରିଥିଲେ । ଅଗଷ୍ଟ ୩୦ରେ ଭରତଙ୍କ ପାଖକୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଏକ ଚିଠି ଆସଥିଲା ଏବଂ ଏଇ ଚିଠିରେ ପ୍ରଧାନମନ୍ତ୍ରୀଙ୍କ ହସ୍ତାକ୍ଷର ରହିଥିଲା । ଚିଠିରେ ପ୍ରଧାନମନ୍ତ୍ରୀ ଶିଶୁକନ୍ୟା ପାଇଁ ଅଭିନନ୍ଦନ ଜଣାଇବା ସହ ବୈଭବୀର ସମସ୍ତ ସ୍ୱପ୍ନ ପୂରଣ କରିବା ପାଇଁ ମଧ୍ୟ କହିଥିଲେ ।
ଭରତ ଏଇ ଚିଠିକୁ ସମସ୍ତ ଗ୍ରାମବାସୀଙ୍କ ଦେଖାଇଥିଲେ । ସେ ଏକଥା ସମସ୍ତେ ଜାଣିବା ଉଚିତ ବୋଲି ଭାବି ମିଡିଆକୁ ଏହା ଜଣାଇଥିଲେ । ଏହାପରେ ମିର୍ଜାପୁରର ଏହି ଦମ୍ପତି ଏକ ସେଲିବ୍ରିଟି ଦମ୍ପତି ପାଲଟି ଯାଇଛନ୍ତି । ଚାରିଆଡୁ ଶୁଭେଚ୍ଛାର ବାର୍ତା ପହଁଚିଛି ।