‘ନୋ ଫ୍ଲାଏ ଲିଷ୍ଟ୍’ ନିୟମ: ବିମାନରେ ବିଶୃଙ୍ଖଳା ମହଙ୍ଗା ପଡ଼ିବ
ବିମାନ ଯାତ୍ରା ବେଳେ କୌଣସି ପ୍ରକାର ବିଶୃଙ୍ଖଳା ମହଙ୍ଗା ପଡ଼ିବ । ସରକାର ଏଭଳି ଏକ ନିୟମ ପ୍ରଣୟନ କରିବାକୁ ଯାଉଛନ୍ତି ଯାହା ବିଶୃଙ୍ଖଳିତ ଯାତ୍ରୀମାନଙ୍କ ଉପରେ ବାସନ୍ଦ ଲଗାଇପାରିବ । ବିଶୃଙ୍ଖଳାକୁ ତିନିଟି ସ୍ତରରେ ଭାଗ କରାଯାଇଛି । ତାହା ହେଉଛି ମୌଖିକ, ଶାରିରୀକ ଏବଂ ଜୀବନକୁ ବିପଦ ଥିବା ଭଳି ବିଶୃଙ୍ଖଳା । ସେହି ଆଧାରରେ ଦଣ୍ଡ ପ୍ରଦାନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ବିଶୃଙ୍ଖଳିତ ଆଚରଣ ଯଥା ଅଶାଳୀନ ବ୍ୟବହାର, ଅଙ୍ଗଭଙ୍ଗୀ, ଆକ୍ରମକ ବ୍ୟବହାର, ଠେଲାପେଲା କରିବା, ଧକ୍କା ମାରିବା, ଯୌନ ଉତ୍ପୀଡ଼ନ କିମ୍ବା ଜୀବନରେ ମାରିଦେବା ଭଳି ଧମକ ପାଇଁ ବିମାନ ଯାତ୍ରୀଙ୍କ ଉପରେ ଯାତ୍ରା କଟକଣା ଜାରି କରାଯିବ । ସେମାନଙ୍କୁ ତିନି ମାସରୁ ଆରମ୍ଭ କରି ଛଅ ମାସ ଏବଂ ଦୁଇ ବର୍ଷ ପର୍ଯ୍ୟନ୍ତ ବାସନ୍ଦ କରାଯାଇପାରିବ । ଏହି ଚିଠା ନିୟମ ଲୋକଙ୍କ ପାଇଁ ଉପଲବ୍ଧ ହୋଇଛି ଯାହା ଉପରେ ଏକ ମାସ ଭିତରେ ମତାମତ ପ୍ରଦାନ କରାଯାଇପାରିବ । ଏହା ପରେ ଚୂଡ଼ାନ୍ତ ନିୟମ ପ୍ରସ୍ତୁତ ହେବ ।
ବିଶ୍ୱର ପ୍ରଥମ ଦେଶ ଭାବେ ଭାରତ ସୁରକ୍ଷାକୁ ଦୃଷ୍ଟିରେ ରଖି ‘ନୋ ଫ୍ଲାଏ ଲିଷ୍ଟ୍’ ଜାରି କରିବାକୁ ଯାଉଛି । ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ଜୟନ୍ତ ସିହ୍ନା କହିଛନ୍ତି ଯେ ଯେଉଁ ଲୋକମାନଙ୍କୁ ନେଇ ବିପଦ ରହିଛି ସେମାନଙ୍କୁ ବିମାନରେ ଯାତ୍ରା କରିବାର ସୁଯୋଗ ଦିଆଯିବ ନାହିଁ ।
ଏକ ଅପିଲ୍ କମିଟି ଗଠନ କରିବାକୁ ସରକାରଙ୍କ ପ୍ରସ୍ତାବ ରହିଛି । କମିଟିର ମୁଖ୍ୟ ଭାବେ ହାଇକୋର୍ଟର ଜଣେ ଅବସରପ୍ରାପ୍ତ ବିଚାରପତି ରହିବେ । ଏହା ସହିତ ଯାତ୍ରୀ ସଂଘ କିମ୍ବା ଉପଭୋକ୍ତା ବିବାଦ ଫୋରମର ଅଧିକାରୀ ଏବଂ ବିମାନ କଂପାନିର ଅଧିକାରୀ ସଦସ୍ୟ ଭାବେ କମିଟି ପାଇଁ କାମ କରିବେ । ବେସମାରିକ ବିମାନ ଚଳାଚଳ ସଚିବ ନୟନ ଚୌବେ କହିଛନ୍ତି ଯେ, ଜଣେ ଯାତ୍ରୀଙ୍କ ଉପରେ ବିମାନ କଂପାନିଗୁଡ଼ିକ ତତ୍କାଳ କଟକଣା ଲାଗୁ କରିପାରିବେ । କିନ୍ତୁ ତାଙ୍କ ନାମ ସଙ୍ଗେ ସଙ୍ଗେ ଜାତୀୟ ନୋ ଫ୍ଲାଏ ଲିଷ୍ଟରେ ସ୍ଥାନ ପାଇବ ନାହିଁ ।
କାହିଁକି ଦରକାର ପଡ଼ିଲା ଏଭଳି ନିୟମ
ଚଳିତ ବର୍ଷ ମାର୍ଚ୍ଚରେ ମହାରାଷ୍ଟ୍ରର ଓସମାନାବାଦର ଶିବସେନା ସାଂସଦ ରବିନ୍ଦ୍ର ଗାଏକଓ୍ଵାଡ୍ ସିଟ୍ ସମସ୍ୟାକୁ ନେଇ ଏୟାର ଇଣ୍ଡିଆର ୬୦ ବର୍ଷ ବୟସ୍କ କର୍ମଚାରୀ ଆର୍ ସୁକୁମାରଙ୍କୁ ମାଡ଼ ମାରିଥିଲେ । ଏହାକୁ ନେଇ ସେହି ସମୟରେ ବେଶ କିଛି ହୋହଲ୍ଲା ହୋଇଥିଲା । ଗାଏକଓ୍ଵାଡଙ୍କ ଉପରେ କଂପାନି ପକ୍ଷରୁ ଉଡ଼ାଣ କଟକଣା ଜାରି କରାଯାଇଥିଲା । ସେ ମଧ୍ୟ ଲିଖିତ ପ୍ରତିଶ୍ରୁତି ଦେଇଥିଲେ ଯେ, ଏଭଳି ଘଟଣା ଭବିଷ୍ୟତରେ ଘଟିବ ନାହିଁ । ସେହିପରି ଜୁନ୍ ମାସରେ ବିଶାଖାପାଟଣା ବିମାନ ବନ୍ଦରରେ ଟିଡିପି ନେତା ଜେସି ଦିବାକର ରେଡ୍ଡୀ ହଙ୍ଗାମା ସୃଷ୍ଟି କରିଥିଲେ । ଏଭଳି ଘଟଣା ସାମ୍ନାକୁ ଆସିବା ପରେ ନୋ ଫ୍ଲାଏ ଲିଷ୍ଟର ଆବଶ୍ୟକତା ରହିଛି ବୋଲି ଚର୍ଚ୍ଚା ଆରମ୍ଭ ହୋଇଥିଲା ।
ବିମାନ କଂପାନିଙ୍କ ମତ କଣ
ନୋ ଫ୍ଲାଏ ଲିଷ୍ଟ ଚିଠା ନିୟମ ବିଷୟରେ ବିମାନ କଂପାନିର ଅଧିକାରୀମାନେ କହୁଛନ୍ତି ଯେ, ଅଭିଯୋଗ ଦାଖଲ କରିବାର ପ୍ରକ୍ରିୟା ସରଳ ହେବା ଦରକାର । ଅନେକ ମାମଲା ବିମାନ ବନ୍ଦର ପୁଲିସ ପାଖରେ ପହଞ୍ଚିବ ନାହିଁ । କାରଣ କ୍ରୁ ସଦସ୍ୟମାନେ ତଦନ୍ତ ପାଇଁ ବାରମ୍ବାର ପୁଲିସ ଷ୍ଟେସନ ଆସିପାରିବେ ନାହିଁ । ଅନ୍ୟ ଏକ ବିମାନ କଂପାନିର ଅଧିକାରୀ କହିଛନ୍ତି ଯେ, ଦଣ୍ଡବିଧାନ ଆହୁରି କଠୋର ହେବା ଦରକାର । ଏହା ପ୍ରସ୍ତାବିତ ଦଣ୍ଡ ଠାରୁ ଦୁଇ ଗୁଣା ଅଧିକ ହେବା ଦରକାର । ଜୀବନରେ ମାରିଦେବା ପାଇଁ ଧମକ ଦେଉଥିବା ଯାତ୍ରୀଙ୍କ ଉପରେ ଜୀବନବ୍ୟାପୀ କଟକଣା ଲଗାଯିବା ଦରକାର।