ଦେଉଳ ମାଗିବନି ଦାତାର ଠିକଣା ! ଶ୍ରୀମନ୍ଦିର ହୁଣ୍ଡିରୁ ୫ ଲକ୍ଷ ଅଚଳ ନୋଟ୍ ବାହାରିବା ପରେ ପ୍ରଶାସନର ସଫେଇ
ପୁରୀ ବ୍ୟୁରୋ, କନକ ନ୍ୟୁଜ୍ : କାଳିଆ ହୁଣ୍ଡିରେ କଳା ଟଙ୍କା । ୫ ଲକ୍ଷ ଟଙ୍କାର ଅଚଳ ନୋଟ୍ । ଶ୍ରୀମନ୍ଦିର ଭିତର କାଠ ନିକଟ ହୁଣ୍ଡିରୁ ବାହାରିଛି ପୁରୁଣା ୫ ଶହ ଓ ହଜାରେ ଟଙ୍କିଆ ନୋଟ୍ । ଯେଉଁଥିରେ ରହିଛି ୩ ଲକ୍ଷ ଟଙ୍କାର ୫ ଶହ ଓ ୨ ଲକ୍ଷ ଟଙ୍କାର ହଜାରେ ଟଙ୍କିଆ ନୋଟ୍ । ଦାନ ହୁଣ୍ଡିର ଟଙ୍କା ଗଣତି ବେଳେ ସାମ୍ନାକୁ ଆସିଛି ଏସବୁ ଅଚଳ ଟଙ୍କା ।
Kanak News is now on WhatsApp
Join and get latest news updates delivered to you via WhatsApp
ତେବେ କିଏ ଏତେ ପରିମାଣର ଟଙ୍କା ହୁଣ୍ଡିରେ ପକାଇଛି ସେ ନେଇ ମନ୍ଦିର ପ୍ରଶାସନ ପାଖରେ ଖବର ନାହିଁ । ଶ୍ରୀମନ୍ଦିର ପ୍ରଶାସନ ହୁଣ୍ଡି ଆୟକୁ ବ୍ୟାଙ୍କରେ ଜମା କରିଥାଏ । କିଏ ଦାନ କରୁଛି, କେତେ ଦାନ କରୁଛି ଏବଂ ଦାନ ଟଙ୍କା କେଉଁ ସୂତ୍ରରୁ ପାଇଛି ତାର ହିସାବ ରଖାଯାଏ ନାହିଁ ।
ଗୋଟିଏ ଦିନରେ ଦାନ ହୁଣ୍ଡିରୁ ବାହାରିଛି ୬ ଲକ୍ଷ ୯୫ ହଜାର ୯୭୨ ଟଙ୍କା । ସେଥିରୁ ୫ ଲକ୍ଷ ଟଙ୍କାର ଅଚଳ ନୋଟ୍ । ହୁଣ୍ଡିରେ ଅଚଳ ୫ ଶହ ଓ ହଜାରେ ଟଙ୍କିଆ ପକାଯାଇପାରିବ ବୋଲି ପୂର୍ବରୁ ଘୋଷଣା କରିଥିଲା ଶ୍ରୀମନ୍ଦିର ପ୍ରଶାସନ । ଏହାପରେ ମନ୍ଦିର ହୁଣ୍ଡିରୁ ବାହାରିଛି ବିପୁଳ ପରିମାଣର ଅଚଳ ଟଙ୍କା । ତେବେ ଏତେ ପରିମାଣର ଟଙ୍କା ଦାନକୁ ନେଇ ଏବେ ଶ୍ରୀକ୍ଷେତ୍ରରେ ଜୋର୍ ଧରିଛି ଚର୍ଚ୍ଚା ।
କାର୍ତିକ ମାସ ପରେ ଶ୍ରୀମନ୍ଦିରରେ କିଛି ଦିନ ଧରି ଭକ୍ତଙ୍କ ଗହଳି ହ୍ରାସ ପାଉଛି । ତେବେ ହୁଣ୍ଡିରେ ଦାନ ପରିମାଣ ବୃଦ୍ଧି ପାଇଛି । ୫୦୦ ଓ ୧୦୦୦ ଟଙ୍କିଆ ପୁରୁଣା ନୋଟ ଅଚଳ ଘୋଷଣାକୁ ୨୪ ଦିନ ଗଡିଗଲାଣି । ବିଶେଷ କରି ଦିନକୁ ଦିନ କଟକଣା କଠୋର ହେବାରୁ କଳା ଟଙ୍କାକୁ ଧଳା କରିବାକୁ ବାଟ ମିଳୁନାହିଁ । ଫଳରେ ଅଧିକ ପରିମାଣରେ ଅଚଳ ନୋଟ ହୁଣ୍ଡିରେ ପଡୁଥିବା ଅନୁମାନ କରାଯାଉଛି ।