ଏକଜିଟ୍ ପୋଲରେ ବିଜେପିକୁ ମିଳିଲା ବହୁମତ । ଉପରାଷ୍ଟ୍ରପତି କହିଲେ, ଏହା ବାସ୍ତବିକ ଫଳାଫଳ ନୁହେଁ, ୧୯୯୯ପରଠୁ ସତ ହୋଇନି ଅଧିକତର ବୁଥ ବାହୁଡା ମତ
କନକ ବ୍ୟୁରୋ: ୨୦୧୯ ମହାସମର ଫଳାଫଳ ଆସିବା ପୂର୍ବରୁ ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିବା ଏକଜିଗ ପୋଲ ଆସିଛି ଚମକାଇଦେଲା ଭଳି ରିପୋର୍ଟ । ଗତକାଲି ସନ୍ଧ୍ୟାରେ ପ୍ରକାଶ ପାଇଥିବା ଅଧିକାଂଶ ଏକଜିଟ ପୋଲ ଅନୁସାରେ ନରେନ୍ଦ୍ର ମୋଦି ପୁଣି ଥରେ ପ୍ରଧାନମନ୍ତ୍ରୀ ରୂପରେ ଫେରିବାକୁ ଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଗୋଟିଏ ପଟେ ମୋଦୀଙ୍କ କମବ୍ୟାକକୁ ନେଇ ବିଜେପି ଶିବିରରେ ପ୍ରବଳ ଉତ୍ସାହ ଦେଖିବାକୁ ମିଳିଥିବା ବେଳେ ଏହାକୁ ନେଇ ବଡ ମତ ଦେଇଛନ୍ତି ଉପରାଷ୍ଟ୍ରପତି ଭେଙ୍କୟା ନାଇଡୁ । ସେ କହିଛନ୍ତି କି, ଏଥିରେ ଖୁସି ହେବା ଆଦୌ ଉଚିତ ନୁହେଁ । ଏହା ବାସ୍ତବିକ ଫଳାଫଳ ନୁହେଁ । ଏକଜିଟ ପୋଲ ବାସ୍ତବିକ ଫଳାଫଳ ହୋଇନଥାଏ । ଏହା ସମସ୍ତଙ୍କୁ ବୁଝିବା ଦରକାର । କାହିଁକି ନା ୧୯୯୯ ପରଠାରୁ ଅଧିକତର ଏକଜିଟ ପୋଲ ଭୁଲ ପ୍ରମାଣିତ ହୋଇସାରିଛି ବୋଲି କହିଛନ୍ତି ଭେଙ୍କୟା ନାଇଡୁ ।
ସେ ଆହୁରୀ ମଧ୍ୟ କହିଛନ୍ତି, ନିର୍ବାଚନ ଫଳାଫଳ ପ୍ରକାଶ ପାଇବା ପର୍ଯ୍ୟନ୍ତ ସମସ୍ତେ ନିଜ ନିଜ ଆତ୍ମବିଶ୍ୱାସ ଜାହିର କରିଥାନ୍ତି । ଯାହାର କୌଣସି ଆଧାର ନଥାଏ । ଏଥିପାଇଁ ୨୩ ତାରିଖ ଯାଏଁ ଅପେକ୍ଷା କରିବାକୁ ହେବ । ଉଭୟ ଦେଶ ଏବଂ ରାଜ୍ୟକୁ ଏକ କୁଶଳ ନେତା ଏବଂ ସ୍ଥିର ସରକାର ଆବଶ୍ୟକତା ରହିଥାଏ । ତେବେ ସେ ଯିଏ ବା ହୁଅନ୍ତୁ । ସମାଜରେ ପରିବର୍ତ୍ତନ ରାଜନୈତିକ ଦଳଙ୍କ ପରିବର୍ତ୍ତନ ସହିତ ହେବା ଉଚିତ ବୋଲି କହିଛନ୍ତି ଉପରାଷ୍ଟ୍ରପତି ଭେଙ୍କୟା ନାଇଡୁ ।
ସବୁ ଏକଜିଟ୍ ପୋଲରେ ଏନଡିଏକୁ ପୂର୍ଣ୍ଣ ବହୁମତ
ଦେଶର ଅନେକ ଟିଭି ଚ୍ୟାନେଲ ଓ ସର୍ଭେକ୍ଷଣ ସଂସ୍ଥା ଯେଉଁ ଏଗଜିଟ୍ ପୋଲ୍ କରିଛନ୍ତି, ତାହା ସ୍ପଷ୍ଟ ଦର୍ଶାଉଛି ଯେ, ପୁଣିଥରେ ବାଜିମାତ୍ କରିବାକୁ ଯାଉଛି ମୋଦି ମ୍ୟାଜିକ । ମାତ୍ର ୫ ମାସ ପୂର୍ବରୁ ତିନିଟି ବଡ ରାଜ୍ୟ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡରେ କଂଗ୍ରେସ ଠାରୁ ପରାଜିତ ହୋଇଥିବା ବିଜେପି, ପୁଣିଥରେ ଲୋକଙ୍କ ବିଶ୍ୱାସ ଭାଜନ ହେବାରେ ସକ୍ଷମ ହୋଇପାରିଛି । ପାକିସ୍ତାନ ବିପକ୍ଷରେ ସର୍ଜିକାଲ ଷ୍ଟ୍ରାଇକ, ସାରାଦେଶରେ ମୋଦିଙ୍କ ଏକ ନୂଆ ଛବି ସୃଷ୍ଟି କଲା । ୨୬-୧୧ ଆକ୍ରମଣ ପରେ କଂଗ୍ରେସ ସରକାର ସମୟରେ ଚୁପ୍ ରହିିଥିବା ଭାରତ, ମୋଦିଙ୍କ ସମୟରେ କିନ୍ତୁ ବୀର ଆଚରଣ ଦେଖାଇଲା । ବୋଧହୁଏ, ଏହା ଦେଶବାସୀଙ୍କ ମୁଡରେ ଏକ ବଡ ପରିବର୍ତନ ଆଣିଲା ।
ଯଦି ଏଗଜିଟ୍ ପୋଲର ସର୍ଭେ ସତ ହୁଏ, ତେବେ ପ୍ରଥମ ଥର ପାଇଁ ଭାରତ ଇତିହାସରେ ଏକ ଅଣକଂଗ୍ରେସ ଦଳ ୫ ବର୍ଷ ପୁରଣ କରି ପୁଣି ଥରେ ଶାସନ କ୍ଷମତାକୁ ଫେରିବ । ଗୁଜୁରାଟରେ ଲଗାତର ତିନି ତିନି ଥର ମୁଖ୍ୟମନ୍ତ୍ରୀ ହେବା ପରେ ୨୦୧୪ ମସିହାରେ ପ୍ରଥମଥର ପାଇଁ ବିଜେପି ତାଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ପ୍ରୋଜେକ୍ଟ କରିଥିଲା । ଏବଂ ଦଳର ଆଶା ଆକାଂକ୍ଷାକୁ ପୁରଣ କରି ବିଜେପିକୁ ସେହି ସ୍ତରକୁ ନେବାକୁ ସକ୍ଷମ ହୋଇଥିଲେ ମୋଦି । ଆଉ, ପୁଣିଥରେ ଭାରତ ଭଳି ଏକ ଜଟିଳ ଗଣତନ୍ତ୍ରର ପରୀକ୍ଷାରେ ଉତୀର୍ଣ୍ଣ ହେବାକୁ ଯାଉଛନ୍ତି ନରେନ୍ଦ୍ର ମୋଦି ।