ପିଏଫ ଖାତାଧାରୀଙ୍କ ପାଇଁ ଖୁସି ଖବର : ଚାକିରୀ ଚାଲିଯିବା ପରେ ବି ମିଳିବ ପିଏଫ ଆକାଉଣ୍ଟରୁ ଆଡଭାନ୍ସ ଟଙ୍କା, ଅବସର ପାଣ୍ଠି ଉପରେ ପଡିବନି ପ୍ରଭାବ
କର୍ମଚାରୀ ଭବିଷ୍ୟ ନିଧି ସଂଗଠନ(ଇପିଏଫଓ) ନିଜ ସଦସ୍ୟଙ୍କ ପାଇଁ ଏକ ସୁବିଧା କରିବାକୁ ଯାଉଛି, ଯେଉଁଥିରେ ଇପିଏଫଓର ୫ କୋଟିରୁ ଅଧିକ ସକ୍ରିୟ ସଦସ୍ୟଙ୍କୁ ଲାଭ ମିଳିବ । ସଂଗଠିତ କ୍ଷେତ୍ରରେ କାମ କରୁଥିବା କର୍ମଚାରୀଙ୍କୁ ବେକାରୀ ସମୟରେ ପିଏଫ ଖାତାରୁ ଟଙ୍କା ମିଳିବ । ଯାହାକି ଫେରସ୍ତ ହୋଇପାରିବନି । ଯଦି କର୍ମଚାରୀଙ୍କ ଚାକିରୀ ଚାଲିଯାଏ ଏବଂ ଗୋଟିଏ ମାସ ପର୍ଯ୍ୟନ୍ତ ଅନ୍ୟ ଚାକିରୀ ମିଳୁନି, ତେବେ ସେ ନିଜ ପ୍ରୋଭିଡେଣ୍ଟ ଆକାଉଣ୍ଟରୁ ଅଗ୍ରୀମ ଭାବେ ଟଙ୍କା ଉଠାଇପାରିବେ ଓ ଏହି ଟଙ୍କାକୁ ପରବର୍ତ୍ତୀ ସମୟରେ ପିଏଫ ଆକାଉଣ୍ଟରେ ଜମା କରିବାର ସର୍ତ୍ତ ବି ନଥିବ । ଏହିପରି ଚାକିରୀ ସନ୍ଧାନରେ ଥିବା ପିଏଫ ଖାତାଧାରୀଙ୍କୁ ନୂଆ ଚାକିରୀ ମିଳିବା ପର୍ଯ୍ୟନ୍ତ ନିଜ ଆବଶ୍ୟକୀୟ ଖର୍ଚ୍ଚ ତୁଲାଇବା ପାଇଁ ଉପାୟ ମିଳିଯିବ ଓ ତାଙ୍କ ପିଏଫ ଆକାଉଣ୍ଟ ବି ବଜାୟ ରହିବ ।
Kanak News is now on WhatsApp
Join and get latest news updates delivered to you via WhatsApp
ଇପିଏଫଓ ଖାତାଧାରୀ ନିଜ ଚାକିରୀ ଛାଡିବା ତାରିଖ ଠାରୁ ଗୋଟିଏ ମାସ ପୂରା ହେବା ପରେ ନିଜ ଅଂଚଳର ଇପିଏଫଓ ଅଫିସରେ ଆଡଭାନ୍ସ ଟଙ୍କା ପାଇଁ ଆବେଦନ କରିପାରିବେ । ଅଗ୍ରିମ ରାଶି ଭାବେ ପିଏଫ ଆକାଉଣ୍ଟରେ ମୋଟ ରାଶିର ୬୦ ପ୍ରତିଶତ ବା ବ୍ୟକ୍ତିର ଗତ ତିନି ମାସ ଦରମା ସହିତ ସମାନ ଟଙ୍କାର ଆଡଭାନ୍ସ ମିଳିବ । ବାକି ଟଙ୍କା ପିଏଫ ଆକାଉଣ୍ଟରେ ହିଁ ଜମା ରହିବ ।
ଚାକିରୀ ମିଳିବା ପରେ ଆପଣଙ୍କ ସେହି ପିଏଫ ଆକାଉଣ୍ଟରେ ଯୋଗଦାନ ଆରମ୍ଭ ହୋଇଯିବ । ଏହି ପ୍ରକାରରେ ସେହି ବ୍ୟକ୍ତିର ଅବସର ପାଣ୍ଠି ବଜାୟ ରହିବ ଓ ଭବିଷ୍ୟ ପାଇଁ ବି ଆର୍ଥିକ ସ୍ତରରେ ସୁରକ୍ଷିତ ରହିବ । ଇପିଏଫଓ ସଦସ୍ୟଙ୍କୁ ଯଦି ୩ ମାସରୁ ଅଧିକ ସମୟ ପର୍ଯ୍ୟନ୍ତ ଚାକିରୀ ମିଳୁନି, ତେବେ ସେ ଇପିଏଫଓ ପାଖରେ ଆଉ ଏକ ଆଡଭାନ୍ସ ପାଇଁ ଆବେଦନ କରିପାରିବେ ଓ ପିଏଫ ଖାତାରେ ଥିବା ଟଙ୍କାର ୮୦ ପ୍ରତିଶତ କିମ୍ବା ଗତ ୬ ମାସ ଦରମାର ସମାନ ଟଙ୍କା ଅଗ୍ରୀମ ଭାବେ ଉଠାଇପାରିବେ । କର୍ମଚାରୀ ଭବିଷ୍ୟ ନିଧି ସଂଗଠନ ନିଜ ସଦସ୍ୟଙ୍କୁ ଏହି ଆଶ୍ୱସ୍ଥି ପ୍ରଦାନ କରିବା ପାଇଁ ଏହି ଯୋଜନା ପ୍ରସ୍ତୁତ କରିଛନ୍ତି ଓ କେନ୍ଦ୍ର ସରକାର ଶୀଘ୍ର ଏହା ପାଇଁ ଅଧିସୂଚନା ଜାରି କରିପାରନ୍ତି ।