କନକ ନ୍ୟୁଜ ୱେବ ଏକ୍ସକ୍ଲୁସିଭ । ୨୦୦୯ ଫର୍ମୁଲା ଓଡିଶାରେ ଆପଣାଇବ ଏଆଇସିସି! ପର୍ଯ୍ୟବେକ୍ଷକ କଣ ଦେଇପାରନ୍ତି ରିପୋର୍ଟ, ଜାଣନ୍ତୁ
ଏଆଇସିସିର ତିନି ଜଣିଆ ପର୍ଯ୍ୟବେକ୍ଷକ ତିନିଦିନ ଧରି ନେତାଙ୍କ ସହ କଲେ ମାନସ ମନ୍ଥନ । ବରିଷ୍ଠ ନେତା, ଛାମୁଆ ସଂଗଠନ, ବିଧାୟକ, ସାଂସଦ, ପୂର୍ବତନ ବିଧାୟକ ଓ ସାଂସଦଙ୍କ ସହ ମାରାଥନ ବୈଠକ କରି କଂଗ୍ରେସର ଭାଗ୍ୟ ନିର୍ଦ୍ଧାରଣ କଲେ । ଏହି ରିପୋର୍ଟ ଆଧାରରେ ହିଁ ହାଇକମାଣ୍ଡ ନିଷ୍ପତ୍ତି ନେବେ ରାଜ୍ୟରେ କଂଗ୍ରେସ ମଙ୍ଗ କିଏ ଧରିବ । କାହା ନେତୃତ୍ୱରେ ୨୦୧୯ ନିର୍ବାଚନକୁ ସାମ୍ନା କରିବାକୁ ଯିବ ଦଳ । ଏବାବଦରେ କିଛି ଏକ୍ସକ୍ଲୁସିଭ ତଥ୍ୟ ଲାଗିଛି କନକ ନ୍ୟୁଜ ହାତରେ ।
Kanak News is now on WhatsApp
Join and get latest news updates delivered to you via WhatsApp
ଅତି ବିଶ୍ୱସ୍ତ ସୁତ୍ରରୁ ମିଳିଥିବା ସୂଚନା ଅନୁସାରେ, ୨୦୦୯ ଫର୍ମୁଲା ଆପଣାଇବାକୁ ଏଆଇସିସି ପର୍ଯ୍ୟବେକ୍ଷକ ଦଳ ରିପୋର୍ଟ ଦେବେ । ଅର୍ଥାତ୍ ଉପକୁଳ, ପଶ୍ଚିମ ଓ ଦକ୍ଷିଣ ଓଡିଶାରେ ତିନି ନେତାଙ୍କୁ କାର୍ଯ୍ୟକାରୀ ସଭାପତି କରାଯାଉ ବୋଲି ଟିମ୍ ରିପୋର୍ଟ ଦେବାର ଯଥେଷ୍ଟ ସମ୍ଭାବନା ରହିଛି । କମିଟି ବିଶ୍ୱାସ କରୁଛି ଯେ, ଏହାରି ଅଧାରରେ ହିଁ ତୃଣମୁଳ ସ୍ତରରେ ସଂଗଠନକୁ କ୍ରିୟାଶୀଳ କରାଯାଇପାରିବ । ଏହି କାର୍ଯ୍ୟକାରୀ ସଭାପତି, ପିସିସି ସଭାପତିଙ୍କ ସହ ମିଳିତ ଭାବେ କାମ କରିବେ । ନିଜ ନିଜ କ୍ଷେତ୍ରରେ ସଂଗଠନକୁ ସୁଧାରିବାର ଦାୟିତ୍ୱ ଏହି ନେତାଙ୍କ କାନ୍ଧରେ ନ୍ୟସ୍ତ ରହିବ ।
କନକ ନ୍ୟୁଜକୁ ମିଳିଥିବା ସୂଚନା ଅନୁସାର, ପଶ୍ଚିମ ଓଡିଶାରେ କାର୍ଯ୍ୟକାରୀ ସଭାପତି ହୋଇପାରନ୍ତି ବିଧାୟକ ନବ ଦାସ । ଦକ୍ଷିଣ ଓଡିଶା ଦାୟିତ୍ୱ ମିଳିପାରେ ପୂର୍ବତନ ସାଂସଦ ପ୍ରଦୀପ ମାଝୀଙ୍କୁ । ସେହିଭଳି ଉପକୁଳ ଓଡିଶା ସଂଗଠନ ଦାୟିତ୍ୱ ମିଳିପାରେ ବିଧାୟକ ଚିରଂଜୀବ ବିଶ୍ୱାଳଙ୍କୁ । ଅତି ବିଶ୍ୱସ୍ତ ସୂତ୍ରରୁ ଏହି ସୂଚନା ଆମର ହସ୍ତଗତ ହୋଇଛି । ୩ ଜୋନରେ ଏହି ୩ କାର୍ଯ୍ୟକାରୀ ସଭାପତି, ପିସିସି ସଭାପତିଙ୍କ ସହ ସମନ୍ୱୟ ରକ୍ଷା କରି କାର୍ଯ୍ୟକରିବେ ।
ଅତୀତରେ ମଧ୍ୟ ରାଜ୍ୟରେ ଏଭଳି ଫର୍ମୁଲା ଆପଣା ଯାଇଥିଲା । ଯେତେବେଳେ କାମାକ୍ଷା ପ୍ରସାଦ ସିଂହଦେଓଙ୍କୁ ୨୦୦୯ରେ ପିସିସି ସଭାପତି କରାଯାଇଥିଲା ତାଙ୍କ ସହ ମଧ୍ୟ ୩ ଜଣ କର୍ଯ୍ୟକାରୀ ସଭାପତିଙ୍କୁ ଦାୟିତ୍ୱ ଦିଆଯାଇଥିଲା । ସେତେବେଳେ ଲଲାଟେନ୍ଦୁ ବିଦ୍ୟାଧର ମହାପାତ୍ର, ଭକ୍ତ ଦାସ ଓ ଚନ୍ଦ୍ରଶେଖର ସାହୁଙ୍କୁ କାର୍ଯ୍ୟକାରୀ ସଭାପତି କରାଯାଇଥିଲା । ଆଉ ୨୦୦୯ର ଏହି ଫର୍ମୁଲାକୁ ପୁଣି ପିସିସିରେ କାର୍ଯ୍ୟକାରୀ କରିବାକୁ ଏଆଇସିସିର ପର୍ଯ୍ୟବେକ୍ଷକ ଦଳ ରିପୋର୍ଟ ଦେବେ । ଅତି ବିଶ୍ୱସ୍ତ ସୂତ୍ରରୁ ଏହି ସୂଚନା କନକ ନ୍ୟୁଜକୁ ମିଳିଛି ।
ସେହିଭଳି ପିସିସି ସଭାପତି ଭାବେ ଦାୟିତ୍ୱ ନିରଂଜନ ପଟ୍ଟନାୟକଙ୍କୁ ଦେବାକୁ ପ୍ରାୟ ୯୦ ପ୍ରତିଶତ ନେତା କହିଥିବା ସୂଚନା ମିଳିଛି । ପର୍ଯ୍ୟବେକ୍ଷକ ଦଳକୁ ଭେଟିଥିବା ନେତା କହିଛନ୍ତି, ଯାହା କରିବାର ଅଛି ଖୁବଶୀଘ୍ର କରାଯାଉ । କାରଣ ଆଉ ବିଳମ୍ବ ହେଲେ ଯାହା ବି ସଂଗଠନ ଅଛି, ତାହା ଧୂଳିସାତ ହୋଇଯିବ । ଏଭଳି ସ୍ଥିତିରେ ନିରଂଜନଙ୍କ ପଲ୍ଲା ମଜଭୁତ ଥିବା ଜଣାପଡିଛି । ଏପରିକି କଂଗ୍ରେସ ବିଧାୟକ ଦଳ ନିରଂଜନ ପଟ୍ଟନାୟକଙ୍କୁ ପିସିସି ସଭାପତି କରାଯାଉ ବୋଲି ରିଜୋଲ୍ୟୁସନ ଦେଇଥିବା ଜଣାପଡିଛି । ମିଳିଥିବା ସୂଚନା ଅନୁସାରେ ନରସିଂହ ମିଶ୍ରଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରାଯାଉ ବୋଲି ରିଜୋଲ୍ୟୁସନରେ ବିଧାୟକ ଦଳ ଲେଖିକରି ଦେଇଛନ୍ତି । ରାଜ୍ୟ କଂଗ୍ରେସର ଜଣେ ବରିଷ୍ଠ ନେତା ନାଁ ଗୋପନ ରଖିବା ସର୍ତ୍ତରେ ଏହି ସୂଚନା ଆମକୁ ଦେଇଛନ୍ତି ।
ଅନୁମାନ କରାଯାଉଛି, ଅଗଷ୍ଟ ଶେଷ କିମ୍ବା ସେପ୍ଟେମ୍ବର ଆରମ୍ଭରେ ପିସିସି ସଭାପତି ବଦଳିବା ସହ ଏହି ନୂଆ ଫର୍ମୁଲା ନେଇ ଘୋଷଣା କରାଯାଇପାରେ । ହେଲେ ଏହା ପୂର୍ବରୁ ଦିଲ୍ଲୀରେ ଆଉ ଏକ ଚୂଡାନ୍ତ ପର୍ଯ୍ୟାୟ ବୈଠକ ବସିବ । ଯେଉଁଥିର ପର୍ଯ୍ୟବେକ୍ଷକ ଦେଇଥିବା ରିପୋର୍ଟ ନେଇ ଆଲୋଚନା ହେବ । ଏଥିରେ ରାଜ୍ୟର କିଛି ନେତା ମଧ୍ୟ ସାମିଲ ହେବାର ସାମ୍ଭାବନା ରହିଛି । ତେବେ ସମସ୍ତ ନେତା ଗୋଟିଏ ସ୍ୱରରେ କହିଥିଲେ, ହାଇକମାଣ୍ଡ ଯାହା ନିଷ୍ପତ୍ତି ନେବାର ଅଛି, ଶୀଘ୍ର ନେଉ । ନଚେତ ବହୁତ ବିଳମ୍ବ ହୋଇଯିବ ।
ତେବେ ନିରଂଜନଙ୍କୁ ବିରୋଧ କରୁଥିବା ଗୋଷ୍ଠୀ ମଧ୍ୟ ଏହାରି ଭିତରେ ଦୁର୍ବଳ ହୋଇଛି । ଖୋଲାଖୋଲି ବିରୋଧ କରିବାକୁ ସାହାସ ଜୁଟାଇ ପାରୁନଥିବା ଏହି ନେତାମାନେ ଅନ୍ୟମାନଙ୍କୁ ମାଧ୍ୟମ କରୁଥିବା ଦେଖିବାକୁ ମିଳିଥିଲା । ହେଲେ ଏହା ପର୍ଯ୍ୟବେକ୍ଷକଙ୍କ ଉପରେ କୌଣସି ପ୍ରଭାବ ପକାଇ ପାରିନଥିବା ଜଣାପଡିଛି । ଏଆଇସିସି ପର୍ଯ୍ୟବେକ୍ଷକ ଏହି ରିପୋର୍ଟ ହାଇକମାଣ୍ଡଙ୍କୁ ଦେବା ପରେ ନୂଆ କର୍ମକର୍ତ୍ତାଙ୍କୁ ଦାୟିତ୍ୱ ମିଳିବା ସହ ସଂଗଠନକୁ ପୁନର୍ଜୀବିତ କରିବାକୁ କାର୍ଯ୍ୟକ୍ରମ ଆରମ୍ଭ କରାଯିବ ବୋଲି ଜଣାପଡିଛି ।