କନକ ବ୍ୟୁରୋ : ପଛୁଆ ଜିଲ୍ଲା ବିକାଶକୁ ନେଇ ଜୋରଦାର ହେଲା ବିଜେଡି-ବିଜେପି ରାଜନୀତି । ନୀତି ଆୟୋଗ ବୈଠକରେ ଓଡିଶା ଯୋଗ ନଦେବାରୁ ରାଜ୍ୟର ଆଭିମୁଖ୍ୟକୁ ନେଇ ପ୍ରଶ୍ନ ଉଠାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ବିକାଶ ପ୍ରସଙ୍ଗରେ ନବୀନ ସରକାର କେବଳ ରାଜନୈତିକ ବିରୋଧ କରୁଥିବା ସେ ଅଭିଯୋଗ ଆଣିଛନ୍ତି । ଅନ୍ୟ ପକ୍ଷରେ ଓଡିଶାର ମତାମତ ନନେଇ କାହିଁକି ଏକପାଖିଆ ନିଷ୍ପତି କରାଗଲା ବୋଲି ପ୍ରଶ୍ନ ଉଠାଇଛି ବିଜେଡି । କେନ୍ଦ୍ର ଦ୍ୱାରା ନିଯୁକ୍ତ ଅଧିକାରୀଙ୍କ ଅଧିନରେ ଜିଲ୍ଲାପାଳମାନେ ବିକାଶ ପାଇଁ କାମ କରିପାରିବେ କି ବୋଲି ପାଲଟା ପ୍ରଶ୍ନ କରିଛି ।
Kanak News is now on WhatsApp
Join and get latest news updates delivered to you via WhatsApp
ପଛୁଆ ଜିଲ୍ଲା ବିକାଶ ନାଁରେ କେନ୍ଦ୍ରର ଏକପାଖିଆ ନିଷ୍ପତିକୁ ବିରୋଧ କରି ନୀତି ଆୟୋଗ ବେଠକରୁ ଦୂରେଇ ରହିଲା ଓଡିଶା । ଆଉ ମୋଦି-ନବୀନ ମୁହାଁମୁହିଁ ସ୍ଥିତିରେ କେନ୍ଦ୍ର ସରକାରଙ୍କ ଆଭିମୁଖ୍ୟ ରଖିବାକୁ ସାମ୍ବାଦିକ ସମ୍ମିଳନୀ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଧର୍ମେନ୍ଦ୍ର କହିଛନ୍ତି ମୋଦିଙ୍କ ନ୍ୟୁ ଇଣ୍ଡିଆ ୨୦୨୨ ପାଇଁ ଦେଶର ୧୧୫ଟି ପଛୁଆ ଜିଲ୍ଲା ମଧ୍ୟରେ ରହିଛି ଓଡିଶାର ୮ଟି ଜିଲ୍ଲା । ବିଭିନ୍ନ ମାନକକୁ ବିଚାର କରି ଏହି ଜିଲ୍ଲାଗୁଡିକୁ ଚୟନ କରାଯାଇଥିବାବେଳେ ରାଜ୍ୟ ସରକାରଙ୍କୁ ସଂଶୋଧନ ପାଇଁ ପୂର୍ଣ୍ଣ କ୍ଷମତା ଦିଆଯାଇଛି । ଏନେଇ ନୀତି ଆୟୋଗର ସିଇଓ ରାଜ୍ୟ ମୁଖ୍ୟ ଶାସନ ସଚିବଙ୍କୁ ଚିଠିଲେଖି ଅବଗତ କରିଥିଲେ । ଅଥଚ ଜିଲ୍ଲା ଚୟନରେ ଓଡିଶାର ମତାମତ ନିଆଯାଇ ନାହିଁ ବୋଲି ପ୍ରତିକ୍ରିୟା ରଖିବା ଦୁର୍ଭାଗ୍ୟଜନକ । ମୋଦି ସରକାର ପଛୁଆ ଜିଲ୍ଲାର ବିକାଶ ଚାହୁଁଥିବାବେଳେ ନବୀନ ସରକାର ରାଜନୈତିକ ବିରୋଧ କରୁଥିବା ସେ କହିଛନ୍ତି ।
କଳାହାଣ୍ଡି, ଡେଙ୍କାନାଳ, କନ୍ଧମାଳ, ରାୟଗଡା, କୋରାପୁଟ, ବଲାଙ୍ଗିର, ଗଜପତି ଓ ମାଲକାନଗିରି । ଦାରିଦ୍ର୍ୟ, ସ୍ୱାସ୍ଥ୍ୟ, ଶିକ୍ଷା ଓ ଭିତିଭୂମି କ୍ଷେତ୍ରରେ ପଛରେ ପଡିଥିବା ଏବଂ ମାଓବାଦୀ ଅଧ୍ୟୁଷିତ ଜିଲ୍ଲାକୁ ନେଇ ନୀତି ଆୟୋଗ ତିଆରି କରିଥିବା ତାଲିକାରେ ରହିଛି ଓଡିଶାର ଏହି ୮ଟି ଜିଲ୍ଲା । ଯେଉଁ ଜିଲ୍ଲାଗୁଡିକ ପାଇଁ କେନ୍ଦ୍ର ସରକାର ଅତିରିକ୍ତ ସଚିବ ବା ଯୁଗ୍ମ ସଚିବ ପାହ୍ୟାର ଅଫିସର ନିଯୁକ୍ତ କରିଛନ୍ତି । ଦିଲ୍ଲୀରେ ଡେପୁଟେସନରେ ଥିବା ଏହି ଅଫିସରମାନେ କେନ୍ଦ୍ର ଓ ରାଜ୍ୟ ମଧ୍ୟରେ ସମନ୍ୱୟ ରକ୍ଷା କରି କାମ କରିବେ ବୋଲି ସ୍ଥିର କରାଯାଇଛି । ଯାହାକୁ ନେଇ ମଧ୍ୟ ଆପତି ଉଠାଇଛି ବିଜେଡି ।
ଗୋଟିଏ ପଟେ ରାଜ୍ୟର ଅନୁନ୍ନତି ଜିଲ୍ଲା ଚୟନ କଲାବେଳେ କେନ୍ଦ୍ର ସରକାର ଓଡିଶା ସହ ଆଲୋଚନା ନକରିବା ଓ ଅନ୍ୟପଟେ ଦିଆଯାଇଥିବା ତାଲିକାରେ ରାଜ୍ୟ ଆବଶ୍ୟକ ସଂଶୋଧନ କରିପାରିବ ବୋଲି ସର୍ତଥାଇ ଓଡିଶା ଏହାକୁ ବିରୋଧ କରିବା ଗୋଟିଏ ରାଜନୈତିକ ଲଢେଇର ଆଭାସ ଦେଉଛି । ଆଉ ଏହି ରାଜନୈତିକ ଛକାପଂଝା ଭିତରେ ଓଡିଶାର ପଛୁଆ ଜିଲ୍ଲାର ବିକାଶ ବାଧାପ୍ରାପ୍ତ ହେବା ଆଶଙ୍କା ଉପୁଜିଛି ।