କନକ ବ୍ୟୁରୋ : ଅମାନିଆ ହେଲେ ଅତିରିକ୍ତ ଆରଟିଓ । ଟ୍ରାଫିକ ନିୟମ ଉଲଙ୍ଘନ କଲେ ମୋଟା ଅଙ୍କର ଜରିମାନା ଆଦାୟ ଚାଲିଛି । ହେଲେ ଠିକ ଏତିକି ବେଳେ ଗଞ୍ଜାମରେ ହଟହଟା ହୋଇଛନ୍ତି ଅତିରିକ୍ତ ଆରଟିଓ । ଛତ୍ରପୁର ଆଂଚଳିକ ପରିବହନ କାର୍ଯ୍ୟାଳୟର ଅତିରିକ୍ତ ଆରଟିଓ ବିନା ସିଟ ବେଲ୍ଟରେ ଗାଡିରେ ବସିଥିିବା ଯୋଗୁଁ ହଟହଟା ହୋଇଛନ୍ତି । ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ଜାତୀୟ ରାଜପଥରେ ଚେକିଂ ସାରି ଫେରୁଥିବା ବେଳେ ଗାଡିରେ ସିଟବେଲ୍ଟ ବାନ୍ଧି ନଥିଲେ । ଯାହାକୁ ଦେଖି ସ୍ଥାନୀୟ ଲୋକ ପ୍ରଶ୍ନ କରିଥିଲେ । ଏମିତିକି ଅତିରିକ୍ତ ଆରଟିଓଙ୍କୁ କାହିଁକି ସିଟ୍ ବେଲଟ ବ୍ୟବହାର କରୁନାହାଁନ୍ତି ବୋଲି ପ୍ରଶ୍ନ କରିଥିଲେ । ହେଲେ ଭୁଲକୁ ମାନି ସତକୁ ସ୍ୱୀକାର କରିବା ବଦଳରେ ଅତିରିକ୍ତ ଆରଟିଓ ଅବାନ୍ତର ଯୁକ୍ତି କରୁଥିବା ଦେଖିବାକୁ ମିଳିଛି । ଏମିତିକି ଗାଡି ଗଡି ନଥିଲା ଓ ଗାଡି ଚାଲିଲେ ସେ ବେଲଟ ବାନ୍ଧିବେ ବୋଲି କହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଭିଡିଓରୁ ସ୍ପଷ୍ଟ ହେଉଛି ଯେ ଛତ୍ରପୁରର ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା କଥାକୁ ଫାଙ୍କିବାକୁ ଉଦ୍ୟମ କରୁଛନ୍ତି । କାହିଁକି ନାଁ ଗାଡି ଗଡି ସାରିଥିଲା, ହେଲେ ଲୋକଙ୍କୁ ହସ୍ତକ୍ଷେପ ଓ ଭିଡିଓ ରେକର୍ଡିଂ ଯୋଗୁଁ ଗାଡି ଅଟକିଗଲା । ଆହୁରି ତାଜୁବର ବିଷୟ ହେଉଛି ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ବସିଥିବା ଗାଡିର ଡ୍ରାଇଭର ବି ସିଟ ବେଲଟ ବାନ୍ଧି ନଥିଲେ । ହେଲେ ଲୋକଙ୍କ ଭିଡିଓ ରେକର୍ଡିଂ ଦେଖି ଡ୍ରାଇଭର ଜଣକ ତରବରିଆ ଭାବେ ସିଟ ବେଲଟ ପିନ୍ଧି ପକାଇଥିଲେ ।
ଗତ କିଛି ଦିନ ଭିତରେ ପରିବହନ ବିଭାଗ ଟ୍ରାଫିକ ନିୟମ ଉଲଙ୍ଘନକାରୀଙ୍କ ଠାରୁ ମୋଟା ଅଙ୍କର ଜରିମାନା ଆଦାୟ କରୁଛି । ହେଲେ ଯେତେବେଳେ କଥା ନିଜ ଉପରକୁ ଆସୁଛି ଭୁଲ ମାନିବା ପରିବର୍ତେ ଦୋଷ ଲୁଚାଇବାକୁ ଚେଷ୍ଟା କରୁଥିବା ଛତ୍ରପୁରର ଏହି ଅତିରିକ୍ତ ଆରଟିଓଙ୍କର ଆଭିମୁଖ୍ୟଙ୍କ ଉପରେ ପ୍ରଶ୍ନ ଛିଡା କରୁଛି । ଲୋକସେବା ଭବନରେ ଉଚ୍ଚସ୍ତରୀୟ ବୈଠକ କରି ଜରିମାନା ଆଦାୟ ବେଳେ ନିୟମକୁ ଠିକ ଭାବେ କାର୍ଯ୍ୟକାରୀ କରିବା ଓ ବିଭାଗୀୟ ଅଧିକାରୀ କେମିତି ଟ୍ରାଫିକ ନିୟମକୁ ମାନିବେ ସେନେଇ ତାଗିତ କରାଯାଉଛି । ହେଲେ ଛତ୍ରପୁର ପରିବହନ କାର୍ଯ୍ୟାଳୟର ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ସବୁ ନିୟମ କାନୁୁନକୁ ଯେମିତି ଫୁ କରୁଛନ୍ତି । ଏଠି ପ୍ରଶ୍ନ ଉଠିବା ସ୍ୱାଭାବିକ ଆରଟିଓ କର୍ମଚାରୀଙ୍କ ଏ ଆଚରଣ କି ପ୍ରକାରର ବାର୍ତା ଦେଉଛି । ଏହା ଉପରେ କଣ କାର୍ଯ୍ୟାନୁଷ୍ଠାନ ନେବ ପରିବହନ ବିଭାଗ?