ଅପରିଷ୍କାର ଆହର କେନ୍ଦ୍ର : ଅସ୍ୱାସ୍ଥ୍ୟକର ପରିବେଶ ଯୋଗୁଁ ଖାଦ୍ୟ ଖାଇବାକୁ ନାକ ଟେକୁଛନ୍ତି ଲୋକେ
କନକ ବ୍ୟୁରୋ : ସଫେଇ କର୍ମଚାରୀ ନଥିବା ହେତୁ ଅସନା ହୋଇ ପଡ଼ିରହିଛି ଆହାର କେନ୍ଦ୍ର । ୫ ଦିନ ଧରି ଆହାର କେନ୍ଦ୍ରରେ ଏଭଳି ଅବ୍ୟବସ୍ଥା ନେଇ ସେଠାକୁ ଯାଇ ଖାଦ୍ୟ ଖାଇବାକୁ ଲୋକେ ନାକ ଟେକୁଛନ୍ତି । ଦଶପଲ୍ଲା କୁଞ୍ଜବନଗଡ଼ସ୍ଥିତ ପଞ୍ଚାୟତ କାର୍ଯ୍ୟାଳୟ ନିକଟରେ ଏହି ଆହାର କେନ୍ଦ୍ର ଚାଲି ଆସୁଥିବା ବେଳେ ଦୈନିକ ୩ ଶହ ମିଲ୍ର ବ୍ୟବସ୍ଥା କରାଯାଇଛି । ମାତ୍ର ଏହି ଆହାର କେନ୍ଦ୍ରରେ ୨ ଜଣ ସୁଇପର୍ କାର୍ଯ୍ୟ କରି ଆସୁଥିବା ବେଳେ କିଛି ଦିନ ହେଲା ଦରମା ପାଇନଥିବା ନେଇ ଜଣେ ମହିଳା ସୁଇପର କାମକୁ ଆସୁନଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଜଣେ ମାତ୍ର ସୁଇପର କାର୍ଯ୍ୟ କରୁଥିବା ବେଳେ ଆହାର କେନ୍ଦ୍ରର ସମସ୍ତ କାର୍ଯ୍ୟ କରିପାରୁ ନଥିବା ଦେଖିବାକୁ ମିଳିଛି । ଫଳରେ ଆହାର କେନ୍ଦ୍ରରେ ବାସନ ସବୁ ଆବର୍ଜନା ଭଳି ପଡ଼ିରହିବା ସହ ବିଭିନ୍ନ ସ୍ଥାନରେ ଖାଦ୍ୟ ଜମା ହୋଇରହୁଛି । ଏପଟେ ଖାଦ୍ୟ ଖାଇବାକୁ ଆସୁଥିବା ଲୋକେ ଏଭଳି ଅବ୍ୟବସ୍ଥା ଦେଖି ନାକ ଟେକୁଛନ୍ତି । ଏ ନେଇ ଏନ୍ଏସି ନିର୍ବାହୀ ଅଧିକାରୀ ତଥା ତହସିଲଦାର ପ୍ରମୋଦ କୁମାର ଦଳବେହେରା କହିଛନ୍ତି, ଆମର ଆହାର କେନ୍ଦ୍ରରେ ସୁଇପର୍ ନିଯୁକ୍ତି ଦିଆଯାଇ ନାହିଁ କିମ୍ବା ଏନ୍ଏସି ପକ୍ଷରୁ ଆହାର କେନ୍ଦ୍ରରେ ସୁଇପର୍ ନିଯୁକ୍ତି କରିବାର କୌଣସି ବ୍ୟବସ୍ଥା ନାହିଁ ।
ଆହାର କେନ୍ଦ୍ର ଦାୟିତ୍ବରେ ଥିବା ସଂସ୍ଥା ସୁଇପର୍ ନିଯୁକ୍ତି କରିବା କଥା ବୋଲି ସେ କହିଛନ୍ତି । କିନ୍ତୁ ଆହାର ଦାୟିତ୍ବରେ ଥିବା ରୋଟାରୀ କ୍ଲବ୍ର ସଭାପତି ରଣଜିତ ଦାଶ କହିଛନ୍ତି, ଜିଲ୍ଲାର ବିଭିନ୍ନ ଏନ୍ଏସି ଅଂଚଳରେ ଖୋଲାଯାଇଥିବା ଆହାର କେନ୍ଦ୍ରରେ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ୨ ଜଣ ଲେଖା ସୁଇପର୍ ଏନ୍ଏସି ପକ୍ଷରୁ ଯୋଗାଇ ଦିଆଯାଇଛି । ସୁଇପର୍ ନିଯୁକ୍ତି କରିବା ସଂସ୍ଥା ପକ୍ଷରୁ ନିୟମ ନଥିବା ସେ କହିଛନ୍ତି । ଏଥିପ୍ରତି ଜିଲ୍ଲାପାଳ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।