କନକ ବ୍ୟୁରୋ : ମହିଳା ବିଚାରପତି ହତ୍ୟା ମାମଲାରେ ଆସିଲା ରାୟ । ସବଜଜ୍ ଅନୁପମା ବେହେରା ହତ୍ୟା ମାମଲାର ରାୟ ଆଜି ପ୍ରକାଶ ପାଇଛି । କଟକ ଜିଲ୍ଲା କୋର୍ଟ ଏହି ମାମଲାରେ ଦୁଇ ଭାଇଙ୍କୁ ଦୋଷୀ ସାବ୍ୟସ୍ତ କରିଛନ୍ତି । ଦୁଇ ଭାଇ ଜ୍ୟୋତିରଞ୍ଜନଙ୍କୁ ୪ ବର୍ଷ ଓ ପ୍ରିୟରଞ୍ଜନଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି କୋର୍ଟ । ପ୍ରେମ ସମ୍ପର୍କରୁ ଏହି ହତ୍ୟାକାଣ୍ଡ ହୋଇଥିଲା । ଅନୁପମା ବେହେରାଙ୍କୁ ୨୦୧୩ ମସିହା ମାର୍ଚ୍ଚ ୧୫ ତାରିଖରେ ହତ୍ୟା କରାଯାଇଥିଲା । ଅନୁପମାଙ୍କ କ୍ୱାର୍ଟରରେ ତାଙ୍କ ମୃତଦେହ ପଡିଥିଲା । ପେଟରେ ଛୁରି ଭୁଷିବା ପରେ ମୁହଁ ଉପରେ ତକିଆ ଦେଇ ତାଙ୍କୁ ହତ୍ୟା କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏକ ସୁଚିନ୍ତିତ ଯୋଜନା ଅନୁଯାୟୀ ୨୦୧୩ ମସିହା ମାର୍ଚ୍ଚ ୧୪ ତାରିଖ ଅର୍ଥାତ ଗୁରୁବାର ଦିନ ବିଚାର ବିଭାଗୀୟ ଅଧିକାରୀ ଅନୁପମା ବେହେରାଙ୍କ ବାଲେଶ୍ୱରସ୍ଥିତ ସରକାରୀ ବାସଭବନରେ ପହଂଚିଥିଲା ପ୍ରିୟରଞ୍ଜନ ମହାନ୍ତି । ଉଭୟ ରାତ୍ରୀଭୋଜନ ସାରି ବିଛଣାକୁ ଗଲେ । ଆଉ ପରଦିନ ଭୋର ପ୍ରାୟ ୪ଟାରୁ ୫ଟା ମଧ୍ୟରେ ପ୍ରଥମେ ଅନୁପମାଙ୍କ ପେଟରେ ଛୁରି ଭୁଷିବା ପରେ ଜୀବନରୁ ମାରିଦେବା ପାଇଁ ମୁହଁକୁ ଏକ ତକିଆରେ ମାଡି ବସିଥିଲା ପ୍ରିୟରଞ୍ଜନ । ଏହି ହତ୍ୟାକାଣ୍ଡକୁ ରୂପଦେବା ପରେ ଅନୁଗୁଳ ଫେରାର ହୋଇଯାଇଥିଲା । ଶୁକ୍ରବାର ସକାଳୁ ଅନୁପମାଙ୍କ ମୃତଦେହ ଦେଖି ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ ।
ନୟାଗଡ ରଣପୁର କୋର୍ଟରେ ପ୍ରୋସେସ ଇନସ୍ପେକ୍ଟର ଭାବେ କାମକରୁଥିବା ଅନୁପମା ବେହେରା ୨୦୦୯ରେ ଜଣେ ଡାକ୍ତରଙ୍କୁ ବିବାହ କରିଥିଲେ । ହେଲେ ବୈବାହିକ ଜୀବନରେ ଅସନ୍ତୋଷର ଫାଇଦା ଉଠାଇ ହଠାତ ଅନୁପମାଙ୍କ ସହ ସଂପର୍କ ଯୋଡିବାରେ ସଫଳ ହେଇଥିଲେ ସେହି କୋର୍ଟରେ କ୍ଲର୍କ ଭାବେ କାମ କରୁଥିବା ଜ୍ୟୋତିରଞ୍ଜନ ମହାନ୍ତି । ଜ୍ୟୋତିରଞ୍ଜନ ପୂର୍ବରୁ ବିବାହିତ ହୋଇଥିବାରୁ ଏହି ସଂପର୍କକୁ ନେଇ ସୃଷ୍ଟି ହୋଇଥିଲା ଝଡ ।
ଏପରିକି ୨୦୧୦ରେ ଅନୁପମାଙ୍କୁ ଭଦ୍ରକାଳୀ ମନ୍ଦିରରେ ବିବାହ କରିଥିଲେ ଜ୍ୟୋତିରଞ୍ଜନ । ଦୁହିଁଙ୍କ ସଂପର୍କକୁ ନେଇ ବାରମ୍ବାର ଆତ୍ମହତ୍ୟା ଉଦ୍ୟମ ବି କରିଥିଲେ ଜ୍ୟୋତିରଞ୍ଜନଙ୍କ ପତ୍ନୀ । ତେଣୁ ଅନୁପମାଙ୍କୁ ରାସ୍ତାରୁ ହଟାଇ ଦେଇ ସବୁ ସମସ୍ୟା ଶେଷ କରିବାକୁ ବାଛି ନେଇଥିଲେ ଜ୍ୟୋତିରଞ୍ଜନ । ଅନୁପମା ବାଲେଶ୍ୱର ବଦଳି ହୋଇ ଆସିବା ପରେ ଜ୍ୟୋତିରଞ୍ଜନଙ୍କ ସହ ତାଙ୍କ ସାନଭାଇ ପ୍ରିୟରଞ୍ଜନ ମଧ୍ୟ ତାଙ୍କ ସରକାରୀ ବାସଭବନକୁ ଯିବା ଆସିବା କରୁଥିଲେ । ଏପରିକି ରାତିରେ ରହୁଥିବା ବି ଦେଖିଛନ୍ତି ପାଖ ପଡୋଶୀ । ଅନୁପମାଙ୍କୁ ହତ୍ୟା କରିବାକୁ ଷଡଯନ୍ତ୍ର କରିଥିଲେ ଜ୍ୟୋତିରଞ୍ଜନ, ଯାହାକୁ ରୂପ ଦେଇଥିଲେ ଭାଇ ପ୍ରିୟରଞ୍ଜନ । ମାର୍ଚ୍ଚ ୨୫ ତାରିଖରେ ସବ-ଜଜ ଭାବରେ କୋରାପୁଟରେ ଯୋଗ ଦେଇଥାନ୍ତେ ଅନୁପମା । ହେଲେ ତା ପୂର୍ବରୁ ଶିକାର ହୋଇସାରିଥିଲେ ଏକ ସୁଚିନ୍ତିତ ହତ୍ୟା ଷଡଯନ୍ତ୍ରର ।