କନକ ବ୍ୟୁରୋ : ନବୀନଙ୍କ ମନ୍ତ୍ରିମଣ୍ଡଳର ନବକଳେବର । ୧୭ ବର୍ଷର ବିଜେଡି ଶାସନ ଭିତରେ ସବୁଠାରୁ ବଡ ଅଦଳବଦଳ । ନବୀନ ସରକାରଙ୍କ ଚତୁର୍ଥ ପାଳିର ୩ ବର୍ଷ ପରେ ଆକସ୍ମିକ ଭାବେ ୫୦ ପ୍ରତିଶତ ମନ୍ତ୍ରୀ ଇସ୍ତଫା ଦେବା ପରେ ପୁଣି ଶପଥ ନେଇଛନ୍ତି ୧୨ ନୂଆ ମନ୍ତ୍ରୀ । ସେହିପରି ବିଭାଗରେ ହୋଇଛି ବ୍ୟାପକ ଅଦଳବଦଳ । କୁହାଯାଉଛି ୨୦୧୯ ସାଧାରଣ ନିର୍ବାଚନ ପାଇଁ ପ୍ରସ୍ତୁତି କରିବାକୁ ନବୀନ ନିଜ ମନ୍ତ୍ରିମଣ୍ଡଳରେ ନୂଆ ଉର୍ଜା ଭରିଛନ୍ତି । ଏବେ ଆସନ୍ତୁ ନଜର ପକାଇବା-ନବୀନଙ୍କ ଟିମ୍ରେ ସ୍ଥାନ ପାଇଥିବା ୧୦ ନୂଆ ମୁହଁଙ୍କ ଉପରେ ।
Kanak News is now on WhatsApp
Join and get latest news updates delivered to you via WhatsApp
ଶଶିଭୂଷଣ ବେହେରା
ସମସ୍ତଙ୍କୁ ଆଶ୍ଚର୍ଯ୍ୟ କରି ନବୀନଙ୍କ ଟିମରେ ପ୍ରଥମକରି ସାମିଲ ହୋଇଥିବା ଏହି ୬୪ ବର୍ଷୀୟ ନେତା ସରକାରରେ ସବୁଠାରୁ ଗୁରୁତ୍ୱପୂର୍ଣ୍ଣ ବିଭାଗ ହାତେଇବାରେ ସଫଳ ହୋଇଛନ୍ତି । କୁହାଯାଏ ମୁଖ୍ୟମନ୍ତ୍ରୀଙ୍କ ପରେ ଅର୍ଥମନ୍ତ୍ରୀ ପଦ ରାଜ୍ୟ ମନ୍ତ୍ରିମଣ୍ଡଳରେ ଦ୍ୱିତୀୟ ସର୍ବାଧିକ ଗୁରୁତ୍ୱ ରଖୁଥିବା ପଦବୀ । ରାଜ୍ୟ ଅର୍ଥନୀତି ଅନେକ ପ୍ରତିକୂଳ ପରିସ୍ଥିତି ଦେଇ ଗତି କରୁଥିବା ବେଳେ ଏହି ନୂଆ ଚେହେରା ଉପରେ ଆସ୍ଥା ପ୍ରକଟ କରିଛନ୍ତି ନବୀନ । ଖାଲି ସେତିକି ନୁହେଁ ଗୁରୁତ୍ୱପୂର୍ଣ୍ଣ ଅବକାରୀ ବିଭାଗ ମଧ୍ୟ ତାଙ୍କୁ ଦିଆଯାଇଛି ।
ପ୍ରତାପ ଜେନା
ଏକ ବିବାଦୀୟ ଘଟଣାକ୍ରମରେ ଅତନୁ ସବ୍ୟସାଚୀ ନାୟକ ସ୍ୱାସ୍ଥ୍ୟମନ୍ତ୍ରୀ ପଦ ଛାଡିବା ପରେ ପ୍ରଦୀପ ଅମାତ ଏହି ବିଭାଗର ଅତିରିକ୍ତ ଦାୟିତ୍ୱରେ ଥିଲେ । ତେଣୁ କାହାକୁ ମିଳିବ ସ୍ୱାସ୍ଥ୍ୟ ମନ୍ତ୍ରୀ ପଦ ତାହା ମଧ୍ୟ ଚର୍ଚ୍ଚାରେ ରହିଥିଲା । ଜଣେ ଟାଣୁଆ ସଂଗଠକ ଭାବେ ଜଣାଶୁଣା ତଥା ପୂର୍ବରୁ ମନ୍ତ୍ରୀ ରହିଥିବା ମାହାଙ୍ଗା ବିଧାୟକ ପ୍ରତାପ ଜେନାଙ୍କୁ ଦୀର୍ଘଦିନ ପରେ ମନ୍ତ୍ରିମଣ୍ଡଳରେ ସାମିଲ କରି ଏହି ଗୁଗୁତ୍ୱପୂର୍ଣ୍ଣ ଦାୟିତ୍ୱ ଦେଇଛନ୍ତି ନବୀନ ।
ମହେଶ୍ୱର ମହାନ୍ତି
ପୁରୀ ଷ୍ଟ୍ରଙ୍ଗମ୍ୟାନ ମହେଶ୍ୱର ମହାନ୍ତି ପୁଣି ଫେରିଛନ୍ତି ମନ୍ତ୍ରିମଣ୍ଡଳକୁ । ବାଚସ୍ପତି ଓ ଆଇନ ମନ୍ତ୍ରୀ ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥିବା ଏହି ୬୧ ବର୍ଷୀୟ ନେତାଙ୍କୁ ଦିଆଯାଇଛି ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ । ବିଜେଡିର ଗଡ ରହିଥିବା ପୁରୀ ଜିଲ୍ଲାକୁ ୨୦୧୯ ପାଇଁ ପ୍ରସ୍ତୁତ ରଖିବାକୁ ନବୀନ ପାଂଚ ପାଂଚ ଥର ବିଧାୟକ ଥିବା ମହେଶ୍ୱରଙ୍କ ଉପରେ ଆସ୍ଥା ପ୍ରକଟ କରିଛନ୍ତି ।
ସୂର୍ଯ୍ୟ ନାରାୟଣ ପାତ୍ର
ଗଞ୍ଜାମ ରାଜନୀତିର ଏହି ପ୍ରଭାବଶାଳୀ ନେତା କମବ୍ୟାକ୍ କରିଛନ୍ତି । ପୂର୍ବରୁ ନବୀନ ମନ୍ତ୍ରିମଣ୍ଡଳରେ ମନ୍ତ୍ରୀ ରହିଥିବା ସୂର୍ଯ୍ୟ ନାରାୟଣ ପାତ୍ରଙ୍କୁ ମିଳିଛି ଖାଦ୍ୟା ଯୋଗାଣ, ସାଧାରଣ ବଂଟନ ଓ ସମବାୟ ବିଭାଗ । ମନ୍ତ୍ରୀପଦରୁ ଯିବା ପରେ ମଧ୍ୟ ଦଳ ପ୍ରତି ତାଙ୍କର ଆନୁଗତ୍ୟ ପର୍ବ ମର୍ଯ୍ୟାଦା ଫେରାଇ ଆଣିଛି । ପଂଚାୟତ ନିର୍ବାଚନରେ ବିଜେପି ଅଧିକାଂଶ ସ୍ଥାନରେ ଟକ୍କର ଦେଇଥିଲେ ବି ଗଂଜାମରେ କିନ୍ତୁ ପଶି ପାରିନଥିଲା । ବୋଧହୁଏ ସୂର୍ଯ୍ୟଙ୍କ ନେତୃତ୍ୱରେ ଏହା ସମ୍ଭବ ହୋଇଥିବା ଅନୁଭବ କରି ତାଙ୍କୁ ପୁରସ୍କୃତ କରିଛନ୍ତି ନବୀନ ।
ପ୍ରଫୁଲ୍ଲ ସାମଲ
ମହିଳା ବିଭାଗର ପୁରୁଷ ମନ୍ତ୍ରୀ । ମହିଳା, ଶିଶୁ ବିକାଶ ଓ ସାମାଜିକ ସୁରକ୍ଷା ବିଭାଗର ଦାୟିତ୍ୱ ଦିଆଯାଇଛି ଭଦ୍ରକ ଜିଲ୍ଲାର ୭୦ ବର୍ଷୀୟ ପ୍ରଭାବଶାଳୀ ନେତା ପ୍ରଫୁଲ୍ଲ ସାମଲଙ୍କୁ । ୧୯୯୦ରେ ବିଜୁ ବାବୁଙ୍କ ୧୨୩ ଆସନର ରେକର୍ଡ ବିଜୟବେଳେ ପ୍ରଥମଥର ପାଇଁ ବିଧାନସଭାକୁ ଆସିଥିବା ଏହି ବରିଷ୍ଠ ନେତା ପୁଣି ଫେରିଛନ୍ତି ମନ୍ତ୍ରିମଣ୍ଡଳକୁ ।
ନିରଂଜନ ପୂଜାରୀ
ନବୀନଙ୍କ ଶାସନ ଆରମ୍ଭରୁ ଲଗାତର ବିଧାୟକ ରହିଆସିଥିବା ଏହି ବରିଷ୍ଠ ନେତା ନିରଞ୍ଜନ ପୂଜାରୀ ବାଚସ୍ପତି ପଦବୀରୁ ଇସ୍ତଫା ଦେଇ ବନିଛନ୍ତି କ୍ୟାବିନେଟ ମନ୍ତ୍ରୀ । ଓକିଲ ପେଶା ଛାଡି ରାଜନୀତିକୁ ଆସିଥିବା ନିରଞ୍ଜନଙ୍କୁ ଶିଳ୍ପ ଓ ନଗର ଉନ୍ନୟନ ବିଭାଗ ଦେଇଛନ୍ତି ମୁଖ୍ୟମନ୍ତ୍ରୀ । ମନ୍ତ୍ରିମଣ୍ଡଳ ଅଦଳବଦଳ ପ୍ରକ୍ରିୟା ଆରମ୍ଭ ହେବାର ପ୍ରଥମ ଦିନରେ ଇସ୍ତଫା ଦେଇଥିଲେ ନିରଞ୍ଜନ । ଆଉ ତାଙ୍କୁ ମିଲିଛି ଦୁଇ ଟାଣୁଆ ନେତା ଦେବୀ ମିଶ୍ର ଓ ପୁଷ୍ପେନ୍ଦ୍ର ସିଂଦେଓଙ୍କ ଅଧୀନରେ ଥିବା ଦୁଇ ଗିରିତ୍ୱପୂର୍ଣ୍ଣ ବିଭାଗ ।
ଅନନ୍ତ ଦାସ
ଭୋଗରାଇ ବିଧାୟକ ଅନନ୍ତ ଦାସଙ୍କୁ ମିଲିଛି ରାଷ୍ଟ୍ରମନ୍ତ୍ରୀ ପାହ୍ୟା । ବିଜେଡି ମୁଖ୍ୟ ସଚେତକ ଥିବା ଅନନ୍ତ ଦାସଙ୍କୁ ମିଲିଛି ଗୁରୁତ୍ୱପୂର୍ଣ୍ଣ ଉଚ୍ଚଶିକ୍ଷା ବିଭାଗ । ୭୭ ବର୍ଷୀୟ ଅନନ୍ତ ପ୍ରଥମଥର ଲାଗି ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି । ଓଡିଶା ପ୍ରଶାସନିକ ସେବାରୁ ଅବସର ନେବା ପରେ ବିଜେଡି ଟିକେଟରୁ ତିନି ତିନିଥର ବାଲେଶ୍ୱର ଭୋଗରାଇରୁ ନିର୍ବାଚନ ଜିତି ନବୀନଙ୍କ ଆସ୍ଥା ଭାଜନ ହୋଇପାରିଛନ୍ତି ଏହି ନେତା । ଜିଲ୍ଲାର ଜଣେମାତ୍ର ମନ୍ତ୍ରୀ ଭାବରେ ସଂଗଠନକୁ ଆଗେଇ ନେବାର ଗୁରୁ ଦାୟିତ୍ୱ ଏବେ ଅନନ୍ତଙ୍କ କାନ୍ଧରେ ।
ନୃସିଂହ ସାହୁ
ଡାକ୍ତରୀ ପେଶାରୁ ରାଜନୀତିକୁ ଆସିଥିବା ଏହି ନେତା କଂଗ୍ରେସରୁ ବିଜେଡିକୁ ଆସିବା ପରେ ପର୍ଜଙ୍ଗରୁ ଦୁଇଦୁଇ ଥର ବିଜେଡି ଟିକେଟରେ ଜିତିଥିବା ଡକ୍ଟର ନୃସିଂହ ସାହୁଙ୍କୁ ନବୀନ ତାଙ୍କ ନୂଆ ଟିମରେ ସାମିଲ କରିଛନ୍ତି । ତାଙ୍କୁ ମିଳିଛି ରାଷ୍ଟ୍ରମନ୍ତ୍ରୀ ପାହ୍ୟା । ପର୍ଜଙ୍ଗରୁ ବିଧାୟକ ନୃସିଂହ ସାହୁଙ୍କୁ ବାଣିଜ୍ୟ ଓ ପରିବହନ ମନ୍ତ୍ରୀ ଭାବେ ମନ୍ତ୍ରିମଣ୍ଡଲରେ ସାମିଲ କରିଛନ୍ତି ନବୀନ ।
ଚନ୍ଦ୍ରସାରଥି ବେହେରା
କଟକ ଜିଲ୍ଲାରୁ ବହୁ ବଡବଡ ନେତାଙ୍କୁ ପଛରେ ପକାଇ ମାତ୍ର ଦୁଇଥର ବିଧାୟକ ହୋଇଥିବା ଏହି ୪୨ ବର୍ଷୀୟ ନେତା ସମସ୍ତଙ୍କୁ ଆଶ୍ଚର୍ଯ୍ୟ କରି ନବୀନଙ୍କ ମନ୍ତ୍ରିମଣ୍ଡଳରେ ଏଂଟ୍ରି କରିଛନ୍ତି । ପ୍ରଥମେ ସାଲେପୁର ଓ ୨୦୧୪ରେ କଟକ ସଦରରୁ ବିଧାୟକ ହୋଇଥିବା ଏହି ଯୁବ ନେତାଙ୍କ କାନ୍ଧରେ ଯୁବ ଓ କ୍ରୀଡା ବ୍ୟାପାର ବିଭାଗ ଦାୟିତ୍ୱ ଦେଇଛନ୍ତି ନବୀନ । ପୂର୍ବତନ ମନ୍ତ୍ରୀ କାଳନ୍ଦୀ ବେହେରାଙ୍କ ପୁଅ ଏବେ ମନ୍ତ୍ରୀଭାବେ ନୂଆ ଇନିଂସ ଆରମ୍ଭ କରିବାକୁ ଯାଉଛନ୍ତି ।
ସୁଶାନ୍ତ ସିଂହ
ଓଡିଶାର ଭାତହାଣ୍ଡି ବରଗଡ ଜିଲ୍ଲାର ଭଟଲି ନିର୍ବାଚନ କ୍ଷେତ୍ରରୁ ବିଧାୟକ ଥିବା ସୁଶାନ୍ତ ସିଂଙ୍କୁ ପ୍ରଥମଥର ଲାଗି ମିଳିଛି ରାଷ୍ଟ୍ରମନ୍ତ୍ରୀ ପଦ । ବିଜେଡି କୃଷକ ସେଲର ଆବାହକ ଥିବା ସୁଶାନ୍ତଙ୍କୁ ଶ୍ରମ ଓ ଇଏସଆଇ ବିଭାଗ ଦାୟିତ୍ୱ ଦେଇଛନ୍ତି ନବୀନ । ଜଣେ ସାଧାରଣ କୃଷକ ପରିବାରୁ ଆସିଥିବା ଏହି ୪୪ ବର୍ଷୀୟ ଅବିବାହିତ ନେତା ଚାଷୀଙ୍କୁ ସଂଗଠିତ କରିବାରେ ବେଶ ଦକ୍ଷ ଭାବେ ଜଣାଶୁଣା । ତାଙ୍କ ଅଂଚଳରେ ବିଜେପି ମୁଣ୍ଡ ଟେକୁଥିବାବେଳେ ବିଜେଡି ସଂଗଠନର ଦାୟିତ୍ୱ ମିଳିଛି ଏହି ଯୁବ ନେତାଙ୍କୁ ।