କନକ ବ୍ୟୁରୋ : କେନ୍ଦ୍ର ସରକାରଙ୍କର ଆୟୁଷ୍ମାନ ଯୋଜନା ଓଡ଼ିଶାକୁ ଆସିବ ନା ନାହିଁ ସେ ନେଇ ନିଜ ଆଭିମୁଖ୍ୟକୁ ସ୍ପଷ୍ଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏନେଇ ନବୀନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ରାଜ୍ୟ ସରକାରଙ୍କ ଅଭିମୁଖ୍ୟ ସ୍ପଷ୍ଟ କରିଛନ୍ତି । ନବୀନ କହିଛନ୍ତି ଆୟୁଷ୍ମାନ ଯୋଜନାରେ ଓଡିଶାରୁ ବାଦ ପଡୁଥିବା ୦୮ଲକ୍ଷ ପରିବାରକୁ କେନ୍ଦ୍ର ସରକାର ଯୋଜନାଭୁକ୍ତ କଲେ ଓଡିଶା ଏହି ଯୋଜନାରେ ସାମିଲ ହେବ ବୋଲି ମତ ରଖିଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
ମୋଦି ସରକାରଙ୍କ ସବୁଠାରୁ ବଡ ସ୍ୱାସ୍ଥ୍ୟବୀମା ଯୋଜନା ଆୟୁଷ୍ମାନ ଭାରତକୁ କାହିଁକି ଓଡିଶା ପ୍ରତ୍ୟାଖ୍ୟାନ କରିଛି ସେନେଇ ନବୀନ ଏହି ଚିଠିରେ ଉଲ୍ଲେଖ କରିଛନ୍ତି । ନବୀନ ଲେଖିଛନ୍ତି, ସୋସିଓ ଇକୋନମିକ୍ କାଷ୍ଟ ସେନ୍ସସ୍ ବା ଏସ୍ଇସିସି ତଥ୍ୟ ଆଧାରରେ ଗଣନା କଲେ ମସ୍ତବଡ ଭୁଲ୍ ହୋଇଯିବ । ଏବଂ ୮ ଲକ୍ଷ ପରିବାର ଯୋଜନାରୁ ବାଦ୍ ପଡିଯିବେ । ଓଡିଶା ସରକାର ଯେଉଁ ଯୋଜନା କାର୍ଯ୍ୟକାରୀ କରିବାକୁ ଯାଉଛନ୍ତି ତାହା ପ୍ରାୟ ସମସ୍ତଙ୍କୁ ସ୍ୱାସ୍ଥ୍ୟ ସୁରକ୍ଷା ଯୋଗାଇଦେବ । ଏଥିସହ ନବୀନ ଆହୁରି ଲେଖିଛନ୍ତି, ଯଦି ମୋଦି ସରକାର ଓଡିଶାର ଦାବି ଶୁଣିବେ ଏବଂ ଆୟୁଷ୍ମାନ ଭାରତରେ ୮ ଲକ୍ଷ ପରିବାରକୁ ସାମିଲ କରାଯିବ ତେବେ ଓଡିଶା ମଧ୍ୟ ଆୟୁଷ୍ମାନ ଭାରତ ଯୋଜନାରେ ସାମିଲ ହୋଇଯିବ ।
ସ୍ୱାସ୍ଥ୍ୟ ସୁରକ୍ଷା ଯୋଜନାକୁ ନେଇ ନବୀନ ମୋଦିଙ୍କୁ ଲେଖିଥିବା ଚିଠିରେ ବିସ୍ତୃତ ଭାବେ ନିଜ ଆଭିମୁଖ୍ୟ ରଖିବା ସହ ଓଡିଶାକୁ ସ୍ୱତନ୍ତ୍ର ପାହ୍ୟା ଦାବି ପୁଣି ଉଠାଇଛନ୍ତି । ଓଡିଶାରେ ଅନୁସୂଚିତ ଜାତି ଓ ଜନଜାତି ବର୍ଗର ସଂଖ୍ୟା ଅଧିକ ଥିବା ବେଳେ ବାରମ୍ବାର ପ୍ରାକୃତିକ ବିପଦର ସାମ୍ନା କରୁଛି । ଏସବୁ ଦୃଷ୍ଟିରୁ ଉତ୍ତର-ପୂର୍ବ ଓ ହିମାଳୟ ପାଦ ଦେଶରେ ଅବସ୍ଥିତ ରାଜ୍ୟଗୁଡିକ ପରି ଓଡିଶାକୁ ବିଚାର କରିବା ଉଚିତ ବୋଲି ନବୀନ ଦାବି ରଖିଛନ୍ତି ।
ସ୍ୱାସ୍ଥ୍ୟ ସେବାକୁ ନେଇ ଯୋଜନା ଓ ଯୋଜନାକୁ ନେଇ ରାଜନୀତି ଭିତରେ ଏବେ ଯୋଜନାର ପରିସରକୁ ନେଇ ଉଠିଛି ସବୁଠାରୁ ବଡ ପ୍ରସଙ୍ଗ । ଯୋଜନାରେ କେତେ ଲୋକ ସାମିଲ ହେବେ ଓ କେତେ ହେବା ଦରକାର, ସେନେଇ ଏବେ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ଏହାକୁ ନେଇ ପୁଣିଥରେ କେନ୍ଦ୍ର ଓ ରାଜ୍ୟ ରାଜନୀତି ସରଗରମ ହେବାକୁ ଯାଉଥିବାର ଅଭାଷ ବି ମିଳିଛି । ଗୋଟିଏ ପଟେ ଗରିବଙ୍କ ପାଇଁ ମାଗଣା ସ୍ୱାସ୍ଥ୍ୟ ସେବା ଓ ବୀମାର କଥା କହୁଛନ୍ତି ନରେନ୍ଦ୍ର ମୋଦି ସରକାର । ଆଉ ଏପଟେ ଓଡିଶା ସରକାର ଯୋଜନାର ରୂପରେଖ ସହ ଆରମ୍ଭ କରିସାରିଛନ୍ତି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ।
ଯଦି ଏବେ ଆୟୁଷ୍ମାନ ଯୋଜନାରେ ଓଡିଶା ସରକାର ସାମିଲ ହେବେ ତେବେ କଣ ରହିବ ଯୋଜନାର ରୂପ ରେଖ ତାହା ଏକ ବଡ ପ୍ରଶ୍ନ । ଗରିବଙ୍କ ପାଇଁ ମାଗଣା ସ୍ୱାସ୍ଥ୍ୟ ସେବା ଓ ଚିକିତ୍ସା ନିମନ୍ତେ ପ୍ରଧାନମନ୍ତ୍ରୀ ଘୋଷଣା କରିଛନ୍ତି ଆୟୁଷ୍ମାନ ଯୋଜନା । ଆୟୁଷ୍ମାନ ଯୋଜନାରେ ଗରିବ ଶ୍ରେଣୀର ୫୦କୋଟି ପରିବାର ସାମିଲ ହେବେ, ଯେଉଁଥିରୁ ବାଦ ପଡୁଛନ୍ତି ଓଡ଼ିଶାର ପ୍ରାୟ ୮ଲକ୍ଷ ପରିବାର । ଏନେଇ ପ୍ରଧାନମନ୍ତ୍ରୀଙ୍କ ଘୋଷଣା ପରେ ବି ଯୋଜନାର ରୂପରେଖ ପ୍ରସ୍ତୁତ ହୋଇ ନାହିଁ । ଓଡିଶା ସରକାର ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଘୋଷଣା କରିଛନ୍ତି, ଯେଉଁଥିରେ ଉଭୟ ସରକାରୀ ଓ ବେସରକାରୀ ମେଡିକାଲରେ ଗରିବଙ୍କୁ ମିଳିବ ମାଗଣା ଚିକିତ୍ସା । ଯଦି କେନ୍ଦ୍ର ଓଡିଶାର ଦାବି ମାନିନିଏ ତେବେ କଣ ରହିବ ଆୟୁଷ୍ମାନ ଯୋଜନା ଓ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ରୂପରେଖ?