ଆତଙ୍କିଙ୍କ ଟେଲିଫୋନ୍ ଏକ୍ସଚେଞ୍ଜ୍ ! ଗ୍ୟାଙ୍ଗଷ୍ଟାର୍ ଛୋଟା ରାଜନର ବ୍ରହ୍ମପୁର ଲିଙ୍କ୍
କନକ ବ୍ୟୁରୋ : ବ୍ରହ୍ମପୁରରେ ଏକ ଏଭଳି କାରବାର ଚାଲିଥିଲା ଯାହା କେହି କଳ୍ପନା ବି କରିପାରିନଥିଲେ । ଛୋଟା ରାଜନ୍ ଗ୍ୟାଙ୍ଗର ସଦସ୍ୟମାନେ ବ୍ରହ୍ମପୁରର ଏକ ବେଆଇନ୍ ଓ ସମାନ୍ତରାଳ ମିନି ଟେଲିଫୋନ ଏକ୍ସଚେଂଜରୁ ତାଙ୍କ ଗ୍ୟାଙ୍ଗର ଗତିବିଧି ଚଳାଇଥିଲେ । ସିମ୍ ବକ୍ସ ମାଧ୍ୟମରେ ଚାଲିଥିବା ଏହି କାରବାରର ପ୍ରମାଣ ବ୍ରହ୍ମପୁର ପୁଲିସ୍ ହାତରେ ଲାଗିଛି । ଛୋଟା ରାଜନ୍ ଗ୍ୟାଙ୍ଗର ପ୍ରମୁଖ ସହଯୋଗୀ ସୁରେଶ ପୂଜାରୀ ମୁମ୍ବାଇସ୍ଥିତ ଜଣେ ଜମି ବ୍ୟବସାୟୀଙ୍କୁ ବ୍ରହ୍ମପୁରର ଏହି ସିମ୍ ବକ୍ସ ମାଧ୍ୟମରେ ୨ କୋଟି ଟଙ୍କାର ଦାଦାବଟି ମାଗିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗୋପାଳପୁର ଥାନା ପୁଲିସ୍ ବେଆଇନଭାବେ ଚାଲିଥିବା ୫ଟି ସିମ୍ ବକ୍ସ ଜବତ କରିବା ପରେ ଏହି ରାକେଟର ଚେର ଖୋଲିବାରେ ଲାଗିଛି । ବ୍ରହ୍ମପୁର, ଭୁବନେଶ୍ୱର, ପୁରୀଠାରୁ ଆରମ୍ଭ କରି ସିଙ୍ଗାପୁର, ଦୁବାଇ ଓ ଚୀନକୁ ଲମ୍ବିଛି ଏହି ରାକେଟର ଚେର । ଆତଙ୍କବାଦୀ, ଗ୍ୟାଙ୍ଗଷ୍ଟର୍ ତଥା ବେଆଇନ କାରବାରର ମୁଖ୍ୟ ସୁତ୍ରଧର ସାଜିଥିଲା ଏହି ସିମ୍ ବକ୍ସ ।
ଆସନ୍ତୁ ନଜର ପକାଇବା କିପରି କାମ କରିଥାଏ ଏହି ସିମ୍ ବକ୍ସ
• ଏହା ଚୀନରେ ନିର୍ମିତ ଏକ ଇଲେକଟ୍ରୋନିକ ଡିଭାଇସ୍ ଯାହା ଏକକାଳୀନ ବିଭିନ୍ନ ପ୍ରକାର ସିମ୍ ଅପରେଟ୍ କରିଥାଏ । ଖୁବ କମ୍ ମୂଲ୍ୟରେ ଅନ୍ତର୍ଜାତୀୟ କଲ୍ ଏହା ମାଧ୍ୟମରେ କରିହୁଏ ।
• ଟ୍ରାଇର ବିନା ଅନୁମୋଦନରେ ବେଆଇନ ଭାବେ ମିନି ଟେଲିଫୋନ୍ ଏକ୍ସଚେଂଜ୍ ଭଳି ଏହା କାମ କରିଥାଏ ।
• ୬ ଏମବିପିଏସରୁ ଅଧିକ ସ୍ପିଡ୍ ଥିବା ଲିଜ୍ ଲାଇନରେ ଏହା କାର୍ଯ୍ୟ କରିଥାଏ ।
କାହିଁକି ଓ କିଏ ବ୍ୟବହାର କରନ୍ତି ଏପରି ସିମ୍ ବକ୍ସ
• ଆତଙ୍କବାଦୀ, ଅଣ୍ଡର ୱାର୍ଲ୍ଡ ଡନ୍, ଗ୍ୟାଙ୍ଗଷ୍ଟର, ଫ୍ରଡ କରୁଥିବା ବ୍ୟକ୍ତି ବ୍ୟବହାର କରନ୍ତି ଏହି ସିମ୍ ବକ୍ସ ।
• କାରଣ ଫୋନ କଲ କରୁଥିବା ବ୍ୟକ୍ତିଙ୍କ ଠିକଣା ଏଥିରୁ ଜାଣିବା କଷ୍ଟକର ।
• ମେଟ୍ରୋ ସିଟିର ଗାଙ୍ଗଷ୍ଟରମାନେ ଏହି ସିମ୍ ବକ୍ସ ଜରିଆରେ ଫୋନ କରିଥାନ୍ତି ।
• ଏକ ସମାନ୍ତରାଳ ଟେଲେଫୋନ ଏକ୍ସଚେଂଜ ଭଳି ଏହା କାର୍ଯ୍ୟ କରିଥାଏ ।
ବ୍ରହ୍ମପୁରରୁ ଲମ୍ବିଛି ଆତଙ୍କିଙ୍କ ଠିକଣା । ବ୍ରହ୍ମପୁର ନିକଟ ଆମ୍ବପୁଆରୁ ଏହାର ମାଷ୍ଟର ମାଇଣ୍ଡ୍ ଟି ଲକ୍ଷ୍ମୀନାରାୟଣ ସ୍ରଫକୁ ଗୋପାଳପୁର ପୁଲିସ୍ ଗିରଫ କରିବା ପରେ ଗୋଟିଏ ପରେ ଗୋଟିଏ ସତ ପଦାକୁ ଆସିଛି । ଟି ଲକ୍ଷ୍ମୀନାରାୟଣ ସହ ପ୍ରଦୀପ ଚୌଧୁରୀ, ସୁରେଶ ଶତପଥୀ, ସନ୍ତୋଷ ସାହୁଙ୍କୁ ମଧ୍ୟ ଗିରଫ କରିଛି ପୁଲିସ । ଏହି ୪ ଜଣ ଅଭିଯୁକ୍ତ ଏକାଠି ବ୍ରହ୍ମପୁରରେ ଏସ-ୱାଲ୍ଡ ନାମକ ଏକ ସଂସ୍ଥା ଗଢି ଚଳାଇଥିଲେ ଏହି ବେଆଇନ୍ କାରବାର ।
ହ୍ରାଇଦ୍ରାବାଦ ଏଜେଂଟ ଠାରୁ ଅଭିଯୁକ୍ତମାନେ ଚୀନରୁ ଏହି ସିମ୍ ବକ୍ସ ମେସିନ ଆଣିବା ପରେ ଦିଲ୍ଲୀ ଓ ଅହମ୍ମଦାବାଦର ବସମାନଙ୍କ ଇଂଗିତରେ ଚଳାଇଥିଲେ ବ୍ୟବସାୟ ।
ଇଂଟରନ୍ୟାସନାଲ ପେମେଂଟ ଗେଟ୍ ୱେ ଜରିଆରେ ରୋଜଗାର ହେଉଥିଲା କୋଟି କୋଟି ଟଙ୍କା । କେବଳ ବ୍ରହ୍ମପୁର ନୁହେଁ, ଭୁବନେଶ୍ୱର, ପୁରୀ, ରାଉରକେଲା, ଆସ୍କା ରେ ମଧ୍ୟ ଚାଲି ଏହି ବେଆଇନ କାରବାର । ସିଙ୍ଗାପୁର, ଦୁବାଇ ଓ ଚାଇନା ଲିଙ୍କ୍ ମଧ୍ୟ ଖୋଜୁଛି ପୁଲିସ୍ ।