ପୁନଃ-ଅବସ୍ଥାପିତ ହେବା ପରେ ପ୍ରଥମ ଦିନରେ ଆଲୋକ ବର୍ମା ବଡ଼ ପଦକ୍ଷେପ ! ନାଗେଶ୍ୱର ରାଓଙ୍କ ଆଦେଶକୁ କଲେ ବାତିଲ,୧୦ ଅଧିକାରୀଙ୍କ ହୋଇଥିଲା ବଦଳି
କନକ ବ୍ୟୁରୋ : ଆକ୍ସନ ମୁଡରେ ଆଲୋକ ବର୍ମା । ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ସିବିଆଇ ମୁଖ୍ୟ ପଦରେ ପୁନଃ ଅବସ୍ଥାପିତ ହୋଇଥିବା ଆଲୋକ ବର୍ମା ଗତକାଲି ଦାୟିତ୍ୱ ଗ୍ରହଣ କରିବା ପ୍ରରେ କେତେକ ବଡ ପଦକ୍ଷେପ ନେଇଛନ୍ତି । ପୂର୍ବ ଅନ୍ତରୀଣ ମୁଖ୍ୟ ଏମ. ନାଗେଶ୍ୱର ରାଓଙ୍କ ଦ୍ୱାରା କରାଯାଇଥିବା ବଦଳି ଆଦେଶଗୁଡିକୁ ବର୍ମା ବାତିଲ କରିଦେଇଛନ୍ତି । ବର୍ମାଙ୍କ ଟିମରେ ଥିବା ୧୦ଜଣ ଅଧିକାରୀଙ୍କୁ ନାଗେଶ୍ୱର ରାଓ ବଦଳି କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ବର୍ମାଙ୍କୁ ପୁନଃ ଦାୟିତ୍ୱ ମିଳିଥିଲେ ମଧ୍ୟ ସେ କୌଣସି ବଡ ନିଷ୍ପତି ନେଇପାରିବେ ନାହିଁ ବୋଲି ସୁପ୍ରିମକୋର୍ଟ କହିଥିଲେ । ପ୍ରଧାନମନ୍ତ୍ରୀ, ବିରୋଧୀଦଳ ନେତା ଏବଂ ପ୍ରଧାନବିଚାରପତିଙ୍କୁ ନେଇ ଗଠିତ ଚୟନ କମିଟିର ନିଷ୍ପତି ପରେ ହିଁ ବର୍ମା ତାଙ୍କର ସ୍ୱାଭାବିକ କାର୍ଯ୍ୟ କରିପାରିବେ ବୋଲି କୋର୍ଟ ସ୍ପଷ୍ଟକରିଥିଲେ । କମିଟି ଏ ବାବଦରେ ସପ୍ତାହକ ମଧ୍ୟରେ ରିପୋର୍ଟ ଦେବେ । ଆସନ୍ତା ୩୧ତାରିଖରେ ବର୍ମାଙ୍କ କାର୍ଯ୍ୟକାଳ ଶେଷ ହେବ ।
ବର୍ମା ୩୧ତାରିଖ ପର୍ଯ୍ୟନ୍ତ ଦାୟିତ୍ୱରେ ରହିବେ କି ନାହିଁ ତାହା ଚୟନ କମିଟି ବୈଠକରେ ନିଷ୍ପତି ନିଆଯିବାକୁ ଥିବାବେଳେ ପ୍ରଧାନବିଚାରପତି ରଞ୍ଜନ ଗୋଗଇ ଏହି ବୈଠକରୁ ଓହରି ଯାଇଛନ୍ତି । ବୈଠକରେ ଯୋଗ ଦେବାକୁ ସେ ଜଷ୍ଟିସ୍ ଏ.କେ, ସିକ୍ରିଙ୍କ ନାମକୁ ସୁପାରିଶ୍ କରିଛନ୍ତି । ଚୟନ କମିଟି ବୈଠକରେ ପ୍ରଧାନମନ୍ତ୍ରୀ ଓ ବିରୋଧୀଦଳ ନେତା ମଲ୍ଲିକାର୍ଜ୍ଜୁନ ଖଡଗେ ଉପସ୍ଥିତ ରହିବେ । ତେବେ ଖଡଗେ ମଧ୍ୟ ଏହି ବୈଠକରେ ଯୋଗଦେବାକୁ ଅଧିକ ସମୟ ଲୋଡିଥିବା ଜଣାପଡିଛି ।