ମୋବାଇଲ ରେଡ଼ିଏସନରୁ ରକ୍ଷା କରିବ ବେଲପତ୍ର : ଓଡ଼ିଆ ପୁଅ ଆୟୁଷ ତିଆରି କଲେ ବେଲପତ୍ର କଭର୍
କନକ ବ୍ୟୁରୋ : ମୋବାଇଲ ରେଡ଼ିଏସନରୁ ରକ୍ଷା କରିବ ବେଲପତ୍ର । ବେଲପତ୍ରରେ ତିଆରି ହେବ ମୋବାଇଲ କଭର । ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ସତ । ମୋବାଇଲରୁ ବାହାରୁଥିବା ରେଡିସନରୁ ବଂଚିବା ପାଇଁ ଏଭଳି ଏକ ବିକଳ୍ପ ବାହାର କରିଛନ୍ତି ୧୭ ବର୍ଷର ଓଡିଆ ପୁଅ ଆୟୁଷ ଆଚାର୍ଯ୍ୟ । ଦୀର୍ଘ ତିନି ବର୍ଷରୁ ଅଧିକ ଦିନ ଧରି ମୋବାଇଲ ରେଡିଏସନର ପ୍ରତିକାର ବାହାର କରି ବିଫଳ ହେବା ପରେ ଶେଷରେ ସଫଳତା ପାଇଛନ୍ତି ଆୟୁଷ ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ୨୫୦ ଲୋକଙ୍କୁ ନେଇ ମୋବାଇଲ ରେଡ଼ିଏସନ୍ ସମ୍ପର୍କିତ ତଥ୍ୟ ଜାଣିବା ପାଇଁ ସର୍ଭେ କରିବା ପରେ ଏପରି ଏକ ନିଆରା କଭର ତିଆରି କରିବା କଥା ଆୟୁଷଙ୍କ ମୁଣ୍ଡକୁ ଜୁଟିଲା । ୨/୩ ବର୍ଷ ଲଗାତାର ପରିଶ୍ରମ ପରେ ବି ସେ ସଫଳ ହୋଇପାରୁନଥିଲେ । ସାଧାରଣ ଲୋକ ବ୍ୟବହାର କଲାପରି ତଥା ଇକୋ ଫ୍ରେଣ୍ଡଲି ମାଟେରିଆଲରେ ମୋବାଇଲ କଭର ତିଆରି କରିବାକୁ ଚାହୁଁଥିଲେ ଆୟୁଷ । ଶେଷରେ ତାଙ୍କର ଅନବରତ ପରିଶ୍ରମ ସଫଳ ହେଲା । ବେଲପତ୍ରକୁ ବ୍ୟବହାର କରି ରେଡ଼ିଏସନ ରୋକୁଥିବା ମୋବଇଲ କଭର ତିଆରି କଲେ ।
ଏବେ ତାଙ୍କ ଦ୍ୱାରା ଉଦଭାବନ ହୋଇଥିବା ବେଲପତ୍ରରେ ମୋବାଇଲ କଭର ପରୀକ୍ଷାଗାରକୁ ଯାଇଛି । କମ ମୂଲ୍ୟରେ ଭାରତୀୟ ବଜାରରେ ଏହା ଉପଲବ୍ଧ ହୋଇ ପାରିବ ବୋଲି କହିଛନ୍ତି ଆୟୁଷ । ବିଶ୍ୱ ବଜାରରେ ଆଂଟି ରେଡ଼ିଏସନ ମୋବାଇଲ କଭର ପାଂଚ ହଜାର ଟଙ୍କାରୁ ଅଧିକ ଦାମରେ ମିଳୁଥିବା ବେଳେ ଏହି ବେଲପତ୍ରରେ ତିଆରି ମୋବାଇଲ କଭର ଭାରତୀୟ ବଜାରରେ ୩୦ ଟଙ୍କାରେ ମିଳିପାରିବ । ଆସନ୍ତା ଦୁଇ ମାସ ମଧ୍ୟରେ ଏହି ମୋବାଇଲ କଭର ଭାରତୀୟ ବଜାରରେ ପ୍ରବେଶ କରିବ ବୋଲି ଆଶା ରଖିଛନ୍ତି ଆୟୁଷ ।