ପୁରୀ ପରିକ୍ରମା ପ୍ରକଳ୍ପ ଯାଞ୍ଚ କଲା ଏଏସଆଇର ବିଶେଷଜ୍ଞ ଟିମ୍ । ଯୁଗ୍ମ ଅନୁଧ୍ୟାନ ପରେ ଖନନ ସମ୍ପର୍କରେ କିଛି କହିଲେ ନାହିଁ ଅଧିକାରୀ
ମେ’ ୭ ସୁଦ୍ଧା ହାଇକୋର୍ଟକୁ ଦେବେ ଯାଞ୍ଚ ରିପୋର୍ଟ
କନକ ବ୍ୟୁରୋ: ପ୍ରଥମରୁ ନୀରବଦଷ୍ଟ୍ରା ସାଜିଥିବା ଏଏସଆଇ ହାଇକୋର୍ଟଙ୍କ ନିର୍ଦ୍ଦେଶ ପରେ ପୁରୀ ପରିକ୍ରମା ପ୍ରକଳ୍ପ ନିର୍ମାଣ କାର୍ୟ୍ୟକୁ ଯାଞ୍ଚ କରିଛି । ଶ୍ରୀମନ୍ଦିର ଚାରିପାଖରେ ହୋଇଥିବା ନିର୍ମାଣ କାର୍ୟ୍ୟକୁ ଯାଞ୍ଚ କରାଯାଇଛି । ଅନୁଧ୍ୟାନ ପରେ କ’ଣ ଜାଣିବାକୁ ମିଳିଲା, ଏ ନେଇ ଗଣମାଧ୍ୟମ ଆଗରେ କିଛି ମୁହଁ ଖୋଲିନାହାନ୍ତି ଏଏସଆଇର ଟିମ୍ । ତେବେ ଆସନ୍ତା ମେ’ ୭ ତାରିଖ ସୁଦ୍ଧା ହାଇକୋର୍ଟରେ ରିପୋର୍ଟ ଦାଖଲ କରାଯିବ ବୋଲି କହିଛନ୍ତି ଏଏସଆଇର ଆଞ୍ଚଳିକ ନିର୍ଦ୍ଦେଶକ ।
Kanak News is now on WhatsApp
Join and get latest news updates delivered to you via WhatsApp
ହାଇକୋର୍ଟଙ୍କ ହସ୍ତକ୍ଷେପ ପରେ ଆଜି ଶ୍ରୀମନ୍ଦିର ଐତିହ୍ୟ କରିଡର ପ୍ରକଳ୍ପ ଅନ୍ତର୍ଗତ ପରିକ୍ରମା ନିର୍ମାଣ କାର୍ୟ୍ୟକୁ ଯାଞ୍ଚ କରିବା ପାଇଁ ପହଁଚିଥିଲେ ଏଏସଆଇର ୩ ଜଣିଆ ବିଶେଷଜ୍ଞ ଟିମ୍ । ଆଞ୍ଚଳିକ ନିର୍ଦ୍ଦେଶକ ଦିଲ୍ଲୀପ ଖମାରୀ, ସୁପରିଟେଣ୍ଡେଣ୍ଟ ଅରୁଣ ମଲ୍ଲିକ, ଆସିଷ୍ଟାଣ୍ଟ ସୁପରିଟେଣ୍ଡେଣ୍ଟ ଚିତ୍ତରଞ୍ଜନ ଦାଶ ପ୍ରମୁଖ ଶ୍ରୀମନ୍ଦିରର ଉତ୍ତର ଦ୍ୱାର, ପଶ୍ଚିମ ଓ ଦକ୍ଷିଣ ଦ୍ୱାର ସମେତ ଏମାର ମଠ ସ୍ଥାନରେ ହୋଇଥିବା ନିର୍ମାଣ କାର୍ୟ୍ୟର ଅନୁଧ୍ୟାନ କରିଛନ୍ତି ।
- କେତେ ଗଭୀର, କେତେ ଚଉଡ଼ାର ଖନନ ହୋଇଛି?
- କେତେ ଲମ୍ବା ଓ ଚଉଡ଼ାର ପିଲାର୍ ନିର୍ମାଣ କରାଯାଉଛି?
- ପିଲାର୍ ଉଚ୍ଚତା କେତେ ରହିଛି?
- ପ୍ରକଳ୍ପ ଅଧୀନରେ ଆଉ କେଉଁ କେଉଁ ନିର୍ମାଣ କାର୍ଯ୍ୟ କରାଯିବ?
ଏସବୁ ଯାଞ୍ଚ କରିବା ସହ ପୁରୀ ଜିଲ୍ଲା ପ୍ରଶାସନ ସହ ଆଲୋଚନା କରିଛି ଏଏସଆଇ । ଯାଞ୍ଚ ପରେ ହାଇକୋର୍ଟକୁ ରିପୋର୍ଟ ପ୍ରଦାନ କରାଯିବ ବୋଲି କହିଛନ୍ତି ଏଏସଆଇ ଆଞ୍ଚଳିକ ନିର୍ଦ୍ଦେଶକ ଦିଲ୍ଲୀପ ଖମାରୀ । ତେବେ ଅନୁଧ୍ୟାନରୁ କ’ଣ ଜାଣିବାକୁ ମିଳିଲା, ଏ ନେଇ ଗଣମାଧ୍ୟମକୁ କିଛି କହିନାହିଁ ଏଏସଆଇ । ତେବେ ନ୍ୟାସନାଲ ମନୁମେଣ୍ଟ ଅଥରିଟିର ଏନଓସି ପାଇବା ପରେ ଯାତ୍ରୀଙ୍କ ସୁବିଧା ପାଇଁ ଶୌଚାଳୟ, କ୍ଲୋକ୍ ରୁମ୍, ଆଶ୍ରୟ ସ୍ଥଳ, ପୁଲିସ କଣ୍ଟ୍ରୋଲ ରୁମ୍, ସୂଚନା ଓ ଆଶୁ ଚିକିତ୍ସା କେନ୍ଦ୍ର, ଜୋତା ଷ୍ଟାଣ୍ଡ, ୨୪ ଘଣ୍ଟିଆ ପାଣି ଓ ବିଦ୍ୟୁତ ଯୋଗାଣ ଆଦି କାର୍ୟ୍ୟ ଚାଲିଥିବା କହିଛନ୍ତି ପୁରୀ ଉପଜିଲ୍ଲାପାଳ । କୌଣସି ନିର୍ମାଣ ମେଘନାଦ ପାଚେରୀ ଠାରୁ ଅଧିକ ଉଚ୍ଚ ହେଉନାହିଁ । ଯାଞ୍ଚ ସମୟରେ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ସହଯୋଗ କରାଯାଇଥିବା ସେ କହିଛନ୍ତି ।
ପୁରୀ ଜିଲ୍ଲା ପ୍ରଶାସନ, ଓବିସିସି ଓ ଟାଟା ପ୍ରୋଜେକ୍ଟର ଅଧିକାରୀ ମଧ୍ୟ ଏହି ଯାଞ୍ଚରେ ସାମିଲ ହୋଇଥିଲେ । ରାଜ୍ୟ ସରକାରଙ୍କ ପକ୍ଷରୁ ଠିକା କମ୍ପାନୀ ଟାଟା ପ୍ରୋଜେକ୍ଟ ଜରିଆରେ ପ୍ରତିବନ୍ଧିତ ଅଞ୍ଚଳରେ ଖନନ ଚାଲିଥିବା ଅଭିଯୋଗ ରହିଛି । ବଡ ଧରଣର ଖନନ ଯୋଗୁଁ ଶ୍ରୀମନ୍ଦିର ସୁରକ୍ଷା ପ୍ରତି ବିପଦ ଅଭିଯୋଗରେ ହାଇକୋର୍ଟରେ ଜନସ୍ୱାର୍ଥ ମାମଲା କରାଯାଇଥିଲା । ଏହାର ଶୁଣାଣି କରି ଯୁଗ୍ନ ଅନୁଧ୍ୟାନ କରିବା ପାଇଁ ଏଏସଆଇକୁ ନିର୍ଦ୍ଦେଶ ଦେଇଥିଲେ କୋର୍ଟ । ମେ’ ୯ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ । ୭ ତାରିଖ ସୁଦ୍ଧା ହାଇକୋର୍ଟରେ ଅନୁଧ୍ୟାନ ରିପୋର୍ଟ ଦାଖଲ କରିବ ଏଏସଆଇ । ପ୍ରକଳ୍ପ ଯୋଗୁଁ ଶ୍ରୀମନ୍ଦିର ଉପରେ କୌଣସି ବିପଦ ରହିଛି କି ନାହିଁ ହାଇକୋର୍ଟଙ୍କୁ ଜଣାଇବ ଭାରତୀୟ ପ୍ରତ୍ନତତ୍ତ୍ୱ ସର୍ଭେକ୍ଷଣ ସଂସ୍ଥା ।