ଦେଶୀ ମଦ କାରବାର ପାଇଁ ଘର ସହ ସଂଯୋଗ କରୁଥିଲା ସୁଡଙ୍ଗ : ସାଲିଆସାହିରେ ପୋଲିସର ରେଡ୍ ବେଳେ ସାମ୍ନାକୁ ଆସିଲା ଚିତ୍ର
କନକ ବ୍ୟୁରୋ : ଦେଶୀ ମଦ କାରବାର ପାଇଁ ଘର ସହ ସଂଯୋଗ ହୋଇଥିଲା ସୁଡଙ୍ଗ । ଭୁବନେଶ୍ୱର ସାଲିଆ ସାହି ବସ୍ତିରେ କମିସନରେଟ ପୁଲିସର ଚଢାଉ ବେଳେ ରହସ୍ୟଜନକ ସୁଡଙ୍ଗ ଦେଖିବାକୁ ମିଳିଛି । ଘର ଭିତରୁ ଆଉ ଏକ ଗୁପ୍ତ କଠୋରୀକୁ ଯିବା ପାଇଁ ଏହି ଅଣ ଓସାରିଆ ସୁଡଙ୍ଗକୁ ବ୍ୟବହାର କରାଯାଉଥିଲା । ଯେଉଠି ପ୍ରସ୍ତୁତ ହେଉଥିଲା ପୋଚ ଓ ରନ୍ଧା ଯାଉଥିଲା ଦେଶୀ ମଦ । ପୁଲିସକୁ ଧୁଳି ଦେଇ ପୋଚ ଓ ମଦ ତିଆରି କରିବା, ଚଢାଉ ବେଳେ ପୁଲିସ ଆଖିରେ ଧୂଳି ଦେଇ ଖସିଯିବାକୁ ତିଆରି ହୋଇଥିଲା ଏହି ସୁଡଙ୍ଗ ।
Kanak News is now on WhatsApp
Join and get latest news updates delivered to you via WhatsApp
ବଡ କଥା ହେଉଛି, ଏହି ସୁଡଙ୍ଗ ମୁହଁରେ କୌଣସି ଆସବାବପତ୍ର ରଖିଦେଲେ, ଘର ଭିତରେ ଯେ ଆଉ ଏକ ଗୁପ୍ତ କଠୋରୀ ଅଛି ତାର ଟେର ପାଇବା ମୁସ୍କିଲ । ଗତକାଲି ନିଶା ବେପାରୀଙ୍କୁ ସାବାଡ କରିବା ପାଇଁ ସାଲିଆ ସାହିରେ ବଡ ଧରଣର ଚଢାଉ କରିଥିଲା କମିସନରେଟ ପୁଲିସ । ଆଉ ଚଢାଉ ବେଳେ ଜଣେ ଦେଶୀ ମଦ ବେପାରୀଙ୍କ ଘରେ ସୁଡଙ୍ଗ ଦେଖି ପୁଲିସ କର୍ମଚାରୀ ତାଜୁବ ହୋଇଯାଇଥିଲେ । ସୁଡଙ୍ଗରେ ଥରକରେ ଜଣେ ବ୍ୟକ୍ତି ନଇଁକି ପଶି ପାରିବ । ପୁଲିସ କର୍ମଚାରୀମାନେ ନଇଁ ନଇଁ ଜଣେ ପରେ ଜଣେ ସୁଡଙ୍ଗ ଦେଇ ଗୁପ୍ତ କଠୋରୀରେ ପହଂଚି ମଦ ଓ ପୋଚର ଭଣ୍ଡାର ଦେଖି ଚକିତ ହୋଇଯାଇଥିଲେ ।
ଏହାପରେ ସମସ୍ତ ପୋଚ ଓ ମଦକୁ ନଷ୍ଟ କରି ଦିଆଯାଇଛି । ଡିସିପି ପ୍ରତୀକ ସିଂଙ୍କ ନେତୃତ୍ୱରେ ପୁଲିସ ସାଲିଆ ସାହିରେ ଚଢାଉ କରି ପ୍ରାୟ ୫୦ ମଦଭାଟି ଭାଙ୍ଗିବା ସହ ବିପୁଳ ପରିମାଣର ଦେଶୀ ମଦ ଓ ପୋଚକୁ ନଷ୍ଟ କରିଛି ।ବେଆଇନ ଭାବେ ଦେଶୀ ମଦ ପ୍ରସ୍ତୁତି ଓ ବିକ୍ରି ଅଭିଯୋଗରେ ୭ ଜଣ ମହିଳାଙ୍କ ବିରୋଧରେ ମାମଲା ରୁଜୁ କରିବା ପରେ ସେମାନଙ୍କୁ ନୋଟିସ ଦେଇ ନୂଆପଲ୍ଲୀ ଥାନା ପୁଲିସ ଛାଡି ଦେଇଛି ।