କନକ ବ୍ୟୁରୋ: ନିର୍ବାଚନବେଳେ ଚର୍ଚ୍ଚାରେ ନେତାଙ୍କ ପ୍ରେସମିଟ୍ ପଲିଟିକ୍ସ । ଗୋଟିଏ ପଟେ ପ୍ରଚାର ମଇଦାନକୁ ଓହ୍ଲାଇ ଲୋକଙ୍କ ପାଖରେ ପହଞ୍ଚୁଛନ୍ତି ନେତା । ଜନସଭା ଓ ରୋଡ୍ ସୋ କରି ଭୋଟ୍ ମାଗିଛନ୍ତି । ସେପଟେ ତୁହାକୁ ତୁହା ପ୍ରେସମିଟ୍ କରି ବିପକ୍ଷ ନେତାଙ୍କୁ ଘେରୁଛନ୍ତି । ଲାଗୁଛି ଯେମିତି ପ୍ରଚାର ଭଳି ସାମ୍ବାଦିକ ସମ୍ମିଳନୀ ବି ରାଜନୈତକ ଦଳଗୁଡିକ ପାଇଁ ଗୁରୁତ୍ୱପୂର୍ଣ୍ଣ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ନିର୍ବାଚନ ପ୍ରଚାର ପାଇଁ ବିଜେପିର କେନ୍ଦ୍ରୀୟ ନେତା ଦମ ଲଗାଇଦେଇଥିବାବେଳେ ବିଜେଡି ବି ଜୋରଦାର ପ୍ରଚାର ଚଳାଇଛି । କିନ୍ତୁ ନେତାଙ୍କ ପ୍ରଚାର କେବଳ କେବଳ ଜନସଭା ବା ରୋଡ ସୋରେ ସୀମିତ ହୋଇ ରହିନାହିଁ , ବରଂ ଘନ ଘନ ପ୍ରେସମିଟ ବି ଚାଲିଛି ।
- ଏପଟେ ପ୍ରଚାର, ସେପଟେ ପ୍ରେସମିଟ୍
- ପ୍ରସଙ୍ଗ ରଖୁଛନ୍ତି ନେତା
ସମ୍ବଲପୁରରେ ଶନିବାର ଭୋଟ ପଡିବ । ଆଜି ସନ୍ଧ୍ୟାରେ ସରିଛି ପ୍ରଚାର । ଆଉ ଦୀର୍ଘଦିନ ପରେ ଉଠିଛି ମହାନଦୀ ପ୍ରସଙ୍ଗ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମହାନଦୀ ପ୍ରସଙ୍ଗ ଉଠାଇ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । କହିଛନ୍ତି, ମୌସୁମୀ ସମୟରେ ସବୁ ନଦୀରେ ପାଣି ରଖିବାରେ ଓଡିଶା ସରକାର ବିଫଳ । ନ୍ୟାୟୋଚିତ ଲଢେଇରେ ବିଜେପି ସାଙ୍ଗରେ ରହିବ । ସେପଟେ ଧର୍ମେନ୍ଦ୍ରକୁ ବି କାଉଣ୍ଟର କରିଛି ବିଜେଡି । କେନ୍ଦ୍ରମନ୍ତ୍ରୀଙ୍କ ଉପରେ ବର୍ଷିଛନ୍ତି ଦଳର ନେତା ଭୃଗୁ ବକ୍ସିପାତ୍ର ।
- କେନ୍ଦ୍ରୀୟ ବିଜେପି ନେତାଙ୍କ ଉପରେ ବର୍ଷିଲେ ପାଣ୍ଡିଆନ
- ‘ଓଡିଶାବାସୀ ଠିକ୍ ଜବାବ ଦେବେ’
ନିର୍ବାଚନ ଋତୁରେ ନେତାଙ୍କ ଆକ୍ରମଣ-ପ୍ରତି ଆକ୍ରମଣ ଜାରି ରହିଛି । ଆଉ କେନ୍ଦ୍ରୀୟ ବିଜେପି ନେତାଙ୍କ ଘନ ଘନ ଗସ୍ତ ଉପରେ ପୁଣି ପ୍ରତିକ୍ରିୟା ରଖିଛନ୍ତି ବିଜେଡି ନେତା ଭି.କେ ପାଣ୍ଡିଆନ । କହିଛନ୍ତି, ୨୦୧୯ରେ ଆସିଥିଲେ, ୨୦୨୪ରେ ବି ଆସିବେ । କିନ୍ତୁ ଏହାର କିଛି ପ୍ରଭାବ ପଡିବ ନାହିଁ । ଓଡିଶାବାସୀ ଠିକ୍ ଜବାବ ଦେବେ ।
- ମୁଖ୍ୟମନ୍ତ୍ରୀଙ୍କୁ ପୁଣି ଘେରିଲେ ଅପରାଜିତା
- ରିପୋର୍ଟ କାର୍ଡ ଦେଖାଇ କଲେ ପ୍ରଶ୍ନ
ଭୁବନେଶ୍ୱର ସାଂସଦ ଆଜି ପୁଣି ରିପୋର୍ଟ କାର୍ଡ ଦେଖାଇ ମୁଖ୍ୟମନ୍ତ୍ରୀଙ୍କୁ ୩ଟି ପ୍ରସଙ୍ଗରେ ଖୋଲା ଚ୍ୟାଲେଞ୍ଜ ଦେଇଛନ୍ତି । ଗତକାଲି ମୁଖ୍ୟମନ୍ତ୍ରୀ ଏକ ଭିଡିଓ ଜାରି କରି ଅପରାଜିତାଙ୍କୁ ଘେରିଥିଲେ । ଆଉ ଏହାକୁ ନେଇ ସାମ୍ବାଦିକ ସମ୍ମିଳନୀ କରିଛନ୍ତି ଅପରାଜିତା ଷଡଙ୍ଗୀ । ସେହିଭଳି ବିଜେପିର ବରିଷ୍ଠ ନେତା ସମୀର ମହାନ୍ତି, କଂଗ୍ରେସର ବରିଷ୍ଠ ନେତା ଭକ୍ତ ଦାସ ଓ ବିଜେଡି ନେତା ଅମର ପଟ୍ଟନାୟକ ବି ସାମ୍ବାଦିକ ସମ୍ମିଳନୀ କରି ବିଭିନ୍ନ ପ୍ରସଙ୍ଗ ଉପରେ ମତ ରଖିଛନ୍ତି । ଲାଗୁଛି ଯେମିତି ପ୍ରଚାର ଭଳି ସାମ୍ବାଦିକ ସମ୍ମିଳନୀ ବି ରାଜନୈତକ ଦଳଗୁଡିକ ପାଇଁ ଗୁରୁତ୍ୱପୂର୍ଣ୍ଣ ପାଲଟିଛି ।