କନକ ବ୍ୟୁରୋ : କର୍ଣ୍ଣାଟକର କିଏ ହେବେ ମୁଖ୍ୟମନ୍ତ୍ରୀ । ବହୁମତ ସହ କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସକୁ ବଡ ଜିତ ହାସଲ କରିସାରିଥିଲେ ମଧ୍ୟ ଏହି ପ୍ରଶ୍ନର ଉତର ଏବେ ସୁଦ୍ଧା ମିଳିପାରିନି । ଦିଲ୍ଲୀ ଦରବାରରେ ହାଇକମାଣ୍ଡଙ୍କ ନେତୃତ୍ୱରେ ବସୁଛି ଘନଘନ ବୈଠକ । ତଥାପି ରାଜ୍ୟର ମୁଖ୍ୟମନ୍ତ୍ରୀ କିଏ ହେବେ ସେନେଇ କୌଣସି ସ୍ପଷ୍ଟ ଚିତ୍ର ସାମ୍ନାକୁ ଆସୁନି । ଏହା ଭିତରେ ମଙ୍ଗଳବାର ରାହୁଲ ଗାନ୍ଧୀଙ୍କୁ ଭେଟିଛନ୍ତି ମୁଖ୍ୟମନ୍ତ୍ରୀ ପଦର ଦୁଇ ପ୍ରମୁଖ ଚେହେରା ସିଦ୍ଦରମୈୟା ଓ ଡିକେ ଶିବକୁମାର । କିଛି ସମୟ ଧରି ରାହୁଲ ଗାନ୍ଧୀଙ୍କ ସହ ଆଲୋଚନା କରିଛନ୍ତି ସିଦ୍ଦରମୈୟା । ଏହା ପରେ ଡି.କେ ଶିବକୁମାର ରାହୁଲ ଗାନ୍ଧୀଙ୍କୁ ଭେଟିଛନ୍ତି । ବିଭିନ୍ନ ଜାତୀୟ ଗଣମାଧ୍ୟରେ ଏକଥା ମଧ୍ୟ ଚର୍ଚ୍ଚା ହେଉଛି କି ସିଦ୍ଦରମୈୟା ହୋଇପାରନ୍ତି କର୍ଣ୍ଣାଟକର ମୁଖ୍ୟମନ୍ତ୍ରୀ । ସିଦ୍ଦରମୈୟାଙ୍କ ସମର୍ଥକ ସେଲିବ୍ରେସନ ମଧ୍ୟ ଆରମ୍ଭ କରସାରିଛନ୍ତି ଓ ଶିବକୁମାର ସମର୍ଥକଙ୍କ ମଧ୍ୟ ବିରୋଧ ମଧ୍ୟ ଦେଖାଗଲାଣି ।
Kanak News is now on WhatsApp
Join and get latest news updates delivered to you via WhatsApp
ଗୋଟେପଟେ ସିଦ୍ଦରମୈୟା କର୍ଣ୍ଣାଟକର ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ଜୋର ଧରିଛି ଅନ୍ୟପଟେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟିଛନ୍ତି ବରିଷ୍ଠ ନେତା ରଣଦୀପ ସୁର୍ଜେୱାଲା । ବୈଠକ ପରେ ରଣଦୀପ କହିଛନ୍ତି ମୁଖ୍ୟମନ୍ତ୍ରୀ ପଦକୁ ନେଇ ବୈଠକ ଚାଲିଛି । ଖୁବ ଶିଘ୍ର ଆସିବ ଅନ୍ତିମ ଫଇସଲା । ୪୮ରୁ ୭୨ ଘଂଟା ଭିତରେ କର୍ଣ୍ଣାଟକରେ ଗଠନ ହେବ ନୂଆ ସରକାର ।ଭୁଲ ଖବର ପ୍ରସାରଣ କରନ୍ତୁ ନାହିଁ ।
ମୁଖ୍ୟମନ୍ତ୍ରୀ ରେସରେ ସବୁଠୁ ଆଗରେ ସିଦ୍ଦରମୈୟା ରହିଛନ୍ତି । ଡି.କେ ଶିବକୁମାରଙ୍କୁ ଉପମୁଖ୍ୟମନ୍ତ୍ରୀ କରାଯିବା ନେଇ ମଧ୍ୟ ଚର୍ଚ୍ଚା ହେଉଛି । ତେବେ କଂଗ୍ରେସ ଏହି ଫର୍ମୁଲା ପ୍ରତି ଶିବକୁମାର ରାଜି ନଥିବା ସୂଚନା ରହିଛି । ସିଦ୍ଦରମୈୟାଙ୍କୁ ମୁଖ୍ୟମନ୍ତ୍ରୀ ଏବଂ ଶିବକୁମାରଙ୍କୁ ଉପମୁଖ୍ୟମନ୍ତ୍ରୀ କରିବା ନେଇ କଂଗ୍ରେସର ତୁଙ୍ଗ ନେତା ବିଚାର ବିମର୍ଶ କରିଥିବା ସୂଚନା ମିଳିଛି ।
କଂଗ୍ରେସ ପାଇଁ ଉଭୟ ସିଦ୍ଦରମୈୟା ଓ ଶିବକୁମାର ବେଶ ଗୁରୁତ୍ୱପୂର୍ଣ୍ଣ । ତେଣୁ ଦଳର ଏହି ଦୁଇ ପ୍ରମୁଖ ଚେହେରାଙ୍କୁ ମନାଇବା ପାଇଁ ଦଳ କସରତ ମଧ୍ୟ କରୁଛି । ୫୦-୫୦ ଫମୂର୍ଲା ଆପଣାଇ ଥିଲେ ବି ଫେଲ ମାରିଥିବା କୁହାଯାଉଛି । ଏବେ ଦେଖିବାକୁ ବାକି ରହିଲା ଶେଷରେ କାହା ହାତରେ କର୍ଣ୍ଣାଟକ ଶାସନ ଡୋରୀ ଦେଉଛି । ଦଳ ଅଭିଜ୍ଞ ତଥା ବରିଷ୍ଠ ନେତା ସିଦ୍ଦରମୈୟାଙ୍କ ଉପରେ ମୋହର ମାରୁଛି ନା ଦଳର ସଙ୍କଟ ମୋଚନ ଡି.କେ ଶିବକୁମାରଙ୍କ ମୁଣ୍ଡରେ ଗୁରୁଦାୟିତ୍ୱ ଦେଉଛି ।