କନକ ବ୍ୟୁରୋ : ସାରା ବିଶ୍ୱ ତୁଳନାରେ ସବୁଠାରୁ ଅଧିକ ଚିନି ଭାରତରେ ଉତ୍ପାଦନ ହୋଇଥାଏ । ସାରା ବିଶ୍ୱକୁ ଚିନି ଯୋଗାଣ କ୍ଷେତ୍ରରେ ଭାରତ ଦ୍ୱିତୀୟ ସ୍ଥାନରେ ରହିଛି । ସାରା ବିଶ୍ୱରେ ଭାରତ ଠାରୁ କିଛି ପରିମାଣର ଅଧିକ ଚିନି ବ୍ରାଜିଲ ରପ୍ତାନୀ କରିଥାଏ ।
Kanak News is now on WhatsApp
Join and get latest news updates delivered to you via WhatsApp
ଏହାରି ମଧ୍ୟରେ ଚିନିର ବଢୁଥିବା ଦରକୁ ନଜରରେ ରଖି ବିଦେଶକୁ ରପ୍ତାନୀ କରିବାକୁ ଥିବା ଚିନି ଉପରେ ପ୍ରତିବନ୍ଧକ ଲଗାଇ ପାରେ । ଏନେଇ କେନ୍ଦ୍ର ସରକାର ଏବେ ଏକ ଯୋଜନା ପ୍ରସ୍ତୁତ କରୁଥିବା କଥା କୁହାଯାଉଛି । ନ୍ୟୁଜ ଏଜେନ୍ସି ରୟଟର୍ସ ମୁତାବକ ଦେଶରେ ବଢୁଥିବା ଚିନିର ଦାମ ଉପରେ ରୋକ ଲଗାଇବାକୁ ସରକାର ବାହାର ଦେଶକୁ ହେଉଥିବା ଚିନି ରପ୍ତାନୀ ବନ୍ଦ କରିପାରନ୍ତି ।
ସୂଚନା ଥାଉକି, ଗତ ସପ୍ତାହରେ ଘରୋଇ ଆବଶ୍ୟକତାକୁ ନଜରରେ ରଖି ଗହମ ରପ୍ତାନୀ ବନ୍ଦ କରିବାକୁ ସରକାର ନିଷ୍ପତ୍ତି ନେଇଥିଲେ । ଏବେ ଅନୁମାନ କରାଯାଉଛି କି ସେହିଭଳି ଚିନି ରପ୍ତାନୀ ଉପରେ ବି କେନ୍ଦ୍ର ସରକାର ପ୍ରତିବନ୍ଧକ ଲଗାଇ ପାରନ୍ତି । ହେଲେ ସରକାରଙ୍କ ପାଖରେ ଅନ୍ୟ ଏକ ବିକଳ୍ପ ବି ରହିଛି । ସରକାର ଚାହିଁଲେ ଚଳିତ ବର୍ଷ ଚିନି ରପ୍ତାନୀ ୧୦ ମିଲିୟନ ଟନ୍ ମଧ୍ୟରେ ସୀମିତ ରଖିପାରିବେ ।
ସେପଟେ ଭାରତରୁ ସବୁଠାରୁ ଅଧିକ ଚିନି କିଣୁଥିବା ଦେଶମାନଙ୍କ ମଧ୍ୟରେ ଇଣ୍ଡୋନେସିଆ, ଆଫଗାନିସ୍ତାନ, ଶ୍ରୀଲଙ୍କା, ବାଂଲାଦେଶ, ୟୁଏଇ, ମାଲେସିଆ ଓ ଆଫ୍ରିକା ଭଳି ଦେଶ ରହିଛନ୍ତି । ସେପଟେ ଉତ୍ପାଦନ କଥା କହିଲେ ଦେଶର ଉତ୍ତର ପ୍ରଦେଶ, ମହାରାଷ୍ଟ୍ର ଓ କର୍ଣ୍ଣାଟକ ଦେଶର ମୋଟ ଚିନି ଉତ୍ପାଦନର ୮୦ ପ୍ରତିଶତ ଉତ୍ପାଦନ କରିଥାନ୍ତି ।
କହିରଖୁ କି ଋଷ ଓ ୟୁକ୍ରେନ ଯୁଦ୍ଧ ପାଇଁ ଏବେ ସାରା ବିଶ୍ୱରେ ଗହମ ଯୋଗାଣ ସଂକଟରେ ରହିଛି । କାରଣ ୟୁକ୍ରେନ ଓ ଋଷ ବିଶ୍ୱର ସବୁଠାରୁ ଅଧିକ ଗହମ ରପ୍ତାନୀ କରିଥାନ୍ତି । ହେଲେ ଯୁଦ୍ଧ କାରଣରୁ ଏବେ ଗହମର ଦାମ ୬୦ ପ୍ରତିଶତରୁ ଅଧିକ ମହଙ୍ଗା ହୋଇଛି ।