ସାମନାକୁ ଆସିଲା ସୁନେଲି ରଥର ସତ । ମିଆଁମାରରୁ ଶ୍ରୀକାକୁଲମ, ସମୁଦ୍ରରେ ୩ ହଜାର କିଲୋମିଟରର ଯାତ୍ରା । ଝଡ ବତାସରେ ବି ସେମିତି ସମୁଦ୍ରରେ ଭାସୁଥିଲା ସୁନେଲି ରଥ ।
କନକ ବ୍ୟୁରୋ : ଚାରିମାସ ଧରି ସମୁଦ୍ର ଭିତରେ ଯାତ୍ରା କରୁଥିଲା ସୁନେଲି ରଥ । ଗତକାଲି ଆନ୍ଧ୍ରର ଶ୍ରୀକାକୁଲମ କୂଳରେ ଲାଗିଥିବା ସୁନେଲି ରଥକୁ ନେଇ ବେଶ ଉତ୍କଣ୍ଠା ପ୍ରକାଶ ପାଇଥିଲା । ଏହାପରେ କନକ ନ୍ୟୁଜ୍ ପକ୍ଷରୁ ଅନୁସନ୍ଧାନ ଆରମ୍ଭ ହୋଇଥିଲା । ଏବଂ ଜଣାପଡିଥିଲା ଏହି ସୁନେଲି ରଥକୁ ମିଆଁମାରରେ ଗତ ଜାନୁଆରୀ ମାସରେ ଭସାଇ ଦିଆଯାଇଥିଲା । ଏହାପରେ ଝଡବାତ୍ୟା ଭିତରେ ଭାସି ଭାସି ଆସି ଶ୍ରୀକାକୁଲମ କୂଳରେ ଲାଗିଥିଲା ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ବେଳେ ସମୁଦ୍ର ଭିତରେ କେଉଁଠୁ ଭାସି ଆସିଲା ସୁନେଲି ରଥ, କେମିତି ଆନ୍ଧ୍ରର ସୁନାପଲ୍ଲୀ ଉପକୂଳରେ ଲାଗିଲା । ଏହାକୁ ନେଇ ଚର୍ଚ୍ଚା ଜୋର ଧରିଛି, ଦେଖିବାକୁ ଲୋକଙ୍କ ଭିଡ ଜମୁଛି । ତେବେ ରଥରେ ଲେଖାଥିବା ଅକ୍ଷରକୁ ଗୁଗୁଲ ଟ୍ରାନସଲେଟରେ ଦେଖିବା ପରେ ବର୍ମିଜ ଭାଷା ବୋଲି ଜଣାପଡିବାରୁ ଏହା ମିଆଁମାର ଆସିଥିବା ସ୍ପଷ୍ଟ ହୋଇଛି ।
ସୁନେଲି ରଥକୁ ନେଇ ବଡ ସୂଚନା ଦେଇଛନ୍ତି, ଐତିହାସିକ ଗବେଷକ ଅନୀଲ ଧୀର । ସେ କହିଛନ୍ତି, ବୌଦ୍ଧ ଧର୍ମାବଲମ୍ବିମାନେ ନୂଆବର୍ଷରେ ସୁନା ଆକୃତିର ରଥ ବା ପାଗୋଡା ତିଆରି କରି ପୂଜାର୍ଚ୍ଚନା ପରେ ଇରାବଡି ନଦୀରେ ଭସେଇଥାନ୍ତି । ଯାହା ଗତ ଜାନୁୟାରୀ ୧୬ରେ ପାଳିତ ହୋଇଥିଲା । ତେଣୁ ଇରାବଡି ନଦୀରୁ ବଙ୍ଗୋପସାଗର ଦେଇ ଏହି ପାଗୋଡା ଆନ୍ଧ୍ର ଉପକୂଳକୁ ଭାସି ଆସିଥିବା ଅନୁମାନ କରାଯାଉଛି । ଯାହାର ଦୂରତା ପାଖାପାଖି ସାଢେ ୩ ହଜାର କିଲୋମିଟର । ଆଉ ସମୁଦ୍ରରେ ଏହି ରଥ ପାଖପାଖି ସାଢେ ୪ମାସ ଭାସିବା ପରେ ଆନ୍ଧ୍ର ଉପକୂଳରେ ଲାଗିଛି ।
ସୁନେଲି ରଥଟି ଦେଖିବାକୁ ଏକ ବୌଦ୍ଧ ମନ୍ଦିର ଭଳି ହୋଇଛି । ପାଗୋଡାର ଉଚ୍ଚତା ପ୍ରାୟ ୧୦ ଫୁଟ୍ ହୋଇଥିବାବେଳେ ଏଥିରେ ସୁନେଲି ରଙ୍ଗର ପ୍ରଲେପ ଦିଆଯାଇଛି । ବାତ୍ୟା, ଝଡ ଭିତରେ ଭାସି ଭାସି ହୋଇ ଆସିବା ସତ୍ୱେ ଏହି ସୁନେଲି ରଥର ଚାକଚକମ ଆଦୌ କମ୍ ହୋଇ ନଥିବା ଦେଖିବାକୁ ମିଳିଛି ।