‘ଏବେ ଡାକିଲେ ବି ଯିବିନି’…ଜନ ଆଶୀର୍ବାଦ ଯାତ୍ରା ପାଇଁ ନିମନ୍ତ୍ରଣ ନମିଳିବାରୁ ଉମା ଭାରତୀଙ୍କ କ୍ଷୋଭ
କନକ ବ୍ୟୁରୋ: ‘ମୁଁ ଗଲେ କାଳେ ମୋ ଆଡକୁ ଲୋକଙ୍କ ଧ୍ୟାନ ଭଟକିବ, ସେମାନଙ୍କୁ ଡର ଲାଗୁଛି । ସେଥିପାଇଁ ବୋଧେ ମୋତେ ଡାକିନାହାଁନ୍ତି । ଏଣିକି ଆଉ ଯେତେ ଡାକିଲେବି ଯିବିନି…’ ମଧ୍ୟପ୍ରଦେଶରେ ବିଜେପିର ଜନ ସମ୍ପର୍କ ଯାତ୍ରାକୁ ନିମନ୍ତ୍ରଣ ନହେବାକୁ ନେଇ ନିଜ ମନର କ୍ଷୋଭ ପ୍ରକାଶ କଲେ ବିଜେପି ବରିଷ୍ଠ ନେତା ଉମା ଭାରତୀ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମଧ୍ୟପ୍ରଦେଶରେ ଜନତାଙ୍କ ମଧ୍ୟରେ ସରକାରଙ୍କ ସଫଳତାର ବାର୍ତ୍ତା ପହଞ୍ଚାଇବାକୁ ବିଜେପି ଆରମ୍ଭ କରୁଛି ‘ଜନସମ୍ପର୍କ ଯାତ୍ରା’ । କିନ୍ତୁ ଏହି ଯାତ୍ରାକୁ ବରିଷ୍ଠ ବିଜେପି ନେତା ଉମା ଭାରତୀଙ୍କୁ ନିମନ୍ତ୍ରଣ କରାଯାଇନାହିଁ । ଭୋପାଳର ଏକ କାର୍ଯ୍ୟକ୍ରମରେ ଯୋଗଦେବାକୁ ଯାଇଥିବାବେଳେ ଏନେଇ ଉମାଙ୍କୁ ପଚରାଯିବାରୁ ଭାବୁକ ହୋଇଯାଇଥିଲେ । କହିଥିଲେ ‘ମୋତେ ଏହି ଯାତ୍ରାକୁ ନିମନ୍ତ୍ରଣ କରାଯାଇନାହିଁ ।ଏଥିରେ ମୋତେ କିଛି ଫରକ ପଡିବ ନାହିଁ । କିନ୍ତୁ ମୋ ମନରେ ଏକ ପ୍ରଶ୍ନ ନିଶ୍ଚୟ ସୃଷ୍ଟି ହୋଇଛି ଯେ, ଜ୍ୟୋତିରାଦିତ୍ୟ ସିନ୍ଧିଆଙ୍କର ଯଦି ତାଙ୍କ ସରକାର ବନଇବାରେ ହାତ ଅଛି ତାହେଲେ ମୁଁ ବି ଗୋଟିଏ ସରକାର ବନାଇଥିଲି । ୨୦୨୦ ଉପନିର୍ବାଚନବେଳେ ମୋତେ କରୋନା ହୋଇଥିଲା । ଭଲ ହେବାର ମାତ୍ର୧୧ ଦିନ ହୋଇଥାଏ, ପାର୍ଟି ନେତାଙ୍କ ଅନୁରୋଧ କ୍ରମେ ମୁଁ ନିର୍ବାଚନ ପ୍ରଚାରରେ ଯାଇଥିଲି । ମୋ କାରଣରୁ ବିଜେପିର ଅନେକ ବିକାଶ ହୋଇଥିଲା । ଏବେ ମୋତେ ଜନସମ୍ପର୍କ ଯାତ୍ରାକୁ ଡକାଯାଇନାହିଁ । ମୋତେ ବି ଯିବାର ଇଚ୍ଛା ନଥିଲା । କିନ୍ତୁ ଥରେ ନିମନ୍ତ୍ରଣ ତ କରିଥାନ୍ତେ । ଏଣିକି ଡାକିଲେ ବି ଆଉ ଯିବିନି’ ।
ଉମା ଆହୁରି ମଧ୍ୟ କହିଛନ୍ତି ଯେ, କିନ୍ତୁ ମୁଖ୍ୟମନ୍ତ୍ରୀ ଶିବରାଜ ସିଂ କହିଲେ ନିଶ୍ଚୟ ଯିବେ । କାରଣ ଶିବରାଜଙ୍କ ପ୍ରତି ତାଙ୍କର ସମ୍ମାନ ଓ ସ୍ନେହ ଅଛି । ତେଣୁ ଯଦି ସେ ଡାକନ୍ତି ତାହେଲେ ତାଙ୍କ ସମ୍ମାନ ରଖିବାକୁ ଯାଇ ପ୍ରଚାରରେ ନିଶ୍ଚୟ ଯିବେ ବୋଲି କହିଛନ୍ତି ଉମା ଭାରତୀ ।