ନଷ୍ଟ ହୋଇଯିବ ତାରିଣୀ ନଡ଼ିଆ ! ଘଟଗାଁରେ ନିଲାମ ନହୋଇ ପଡ଼ି ରହିଛି ୧୧ ଲକ୍ଷ ମାନସିକ ନଡ଼ିଆ, ନିଲାମଧାରୀଙ୍କୁ ନେଇ ବିବାଦ
କନକ ବ୍ୟୁରୋ : ଘଟଗାଁରେ ନିଲାମ ନହୋଇ ପଡ଼ିରହିଛି ୧୧ ଲକ୍ଷ ମାନସିକ ନଡ଼ିଆ । ମାନସିକ ନଡ଼ିଆ କିଣିବା ପାଇଁ ଚୟନ ହୋଇଥିବା ନିଲାମଧାରୀଙ୍କୁ ହଇରାଣ କରି ବିଦା କରିବା ଏବେ ଘଟଗାଁ ମା’ ତାରିଣୀ ମନ୍ଦିର କର୍ତ୍ତୃପକ୍ଷଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ନିଲାମଧାରୀ ଜିତେନ୍ଦ୍ର ନାରାୟଣ ଜେନା ନଡ଼ିଆ ଗୋଟା ୪ଟଙ୍କା ୬୫ ପଇସାରେ କିଣିବାକୁ ଚୁକ୍ତି କରିଥିଲେ । ସେ ଏହି ପ୍ରକ୍ରିୟାରୁ ଓହରିବା ପରେ ଏବେ ନଡ଼ିଆ ଗୋଟା ୪ଟଙ୍କା ୭୦ ପଇସାରେ କିଣିବାକୁ କେହି ରାଜି ହେଉନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଫଳରେ ମା’ ତାରିଣୀ ମନ୍ଦିର ଗୋଦାମରେ ଗଛିତ ଥିବା ମାନସିକ ନଡ଼ିଆ ସବୁ ପଚିସଢ଼ି ନଷ୍ଟ ହେବା ଆଶଙ୍କା ଦେଖାଦେଇଛି । ଜିତେନ୍ଦ୍ର ନାରାୟଣ ଜେନା ଟେଣ୍ଡରରୁ ଓହରିବା ପରେ ମାନସିକ ନଡ଼ିଆ ନେବା ପାଇଁ ୪ଥର ଟେଣ୍ଡର ଡକାଗଲାଣି । ହେଲେ ଏଥିରେ କେହି ଅଂଶ ଗ୍ରହଣ କରୁନାହାନ୍ତି । ଗତ ୧ ତାରିଖରେ ଦେବୋତର କମିସନଙ୍କ ଆଦେଶ ଅନୁଯାୟୀ ନଡ଼ିଆ ଉଠାଇବା ପାଇଁ ଖୋଲା ନିଲାମ ପ୍ରକ୍ରିୟା ହେବ ବୋଲି ନୋଟିସ୍ କରାଯାଇଥିଲା ।
ଆସନ୍ତା ୮ ତାରିଖରେ ନିଲାମ ପାଇଁ ଦିନ ଧାର୍ଯ୍ୟ କରାଯାଇଥିଲା । କିଛି ସମୟ ପରେ ଏହି ନୋଟିସକୁ ଚିରି ଦିଆଯାଇଥିଲା । ଗଣମାଧ୍ୟମରେ ବିଜ୍ଞାପନ ପ୍ରକାଶ ପାଇଁ ରିଲିଜ ଅର୍ଡର ଦିଆଯାଇଥିଲା । ପରେ ସଂଧ୍ୟାରେ ସେ ରିଲିଜ ଅର୍ଡ଼ରକୁ ଫେରାଇ ଅଣାଯାଇଥିଲା । ତେବେ ପୁଣି ଥରେ ନଡ଼ିଆ ନିଲାମ ପାଇଁ ସଂଶୋଧିତ ନୋଟିସ୍ ମରାଯାଇଛି ।