କନକ ବ୍ୟୁରୋ : ମଧ୍ୟପ୍ରଦେଶରେ ବିଜେପି ନେତାଙ୍କ ଦ୍ୱାରା ଜଣେ ଆଦିବାସୀ ଯୁବକଙ୍କ ଉପରେ ପରିଶ୍ରା କରିବା ମାମଲା ଟିକେ ଥଣ୍ଡାପଡି ଆସୁଥିବା ବେଳେ ଇନ୍ଦୋର ସହରରେ ପୁଣି ଦୁଇଜଣ ଆଦିବାସୀ ଯୁବକଙ୍କୁ ୮ ଘଣ୍ଟା ବନ୍ଧକ ରଖି ନିସ୍ତୁକ ମାଡ ମାରୁଥିବାର ଭିଡିଓ ଭାଇରାଲ ହେବାରେ ଲାଗିଛି । ଏନେଇ ପୋଲିସ ସୂଚନା ପାଇବା ପରେ ପୀଡିତ ୨ ଆଦିବାସୀ ଯୁବକଙ୍କ ଉଦ୍ଧାର କରି ମେଡିକାଲ ପଠାଇଛି । ଏହାସହ ଏହି ମାମଲାରେ ସଂପୃକ୍ତ ଥିବା ଅପରାଧୀମାନଙ୍କ ବିରୋଧରେ ଗମ୍ଭୀର ଧାରାରେ ମାମଲା ରୁଜୁ କରିଛି । ସେପଟେ ମୁଖ୍ୟ ଅଭିଯୁକ୍ତକୁ ପୋଲିସ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଶୁକ୍ରବାର ରାତିରେ ବର୍ଷା ହେଉଥିବା ବେଳେ ରଙ୍ଗବାସତ ଗ୍ରାମର ଦୁଇଜଣ ଆଦିବାସୀ ଯୁବକ ଟ୍ରେଜର ଫାଣ୍ଟାସୀ କଲୋନୀ ଦେଇ ଯାଉଥିଲେ । ଏହି ସମୟରେ ଜବାହର କଲୋନୀ ନିକଟରେ ଦୁଇ ଯୁବକ ଯାଉଥିବା ଗାଡିଟି ପଡି ଯାଇଥିଲା । ଏହାପରେ କଲୋନୀରେ ସୁରକ୍ଷାକର୍ମୀ ଥିବା ସୁମିତ ଚୌଧୁରୀ ଯୁବକ ଦୁଇଜଣଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ । ଏସବୁ ନେଇ ଦୁଇ ଯୁବକ ଓ ସୁରକ୍ଷାକର୍ମୀଙ୍କ ମଧ୍ୟରେ କଥା କଟାକଟି ହୋଇଥିଲା । ଏସବୁ ମଧ୍ୟରେ ଘଟଣା ସ୍ଥଳରେ ସୁମିତ ଚୌଧୁରୀଙ୍କ ସହ ଜୟପାଲ ଓ ପ୍ରେମ ମିଶି ଯୁବକ ଦୁଇଜଣଙ୍କୁ ଉଠାଇ ନେଇଥିଲେ । ଏହାପରେ ସେମାନଙ୍କୁ ବନ୍ଧକ ରଖି ୮ ଘଣ୍ଟା କାଳ ମାଡ ମାରିଥିଲେ । ଏହି ମାଡ ମାରିବା ବେଳର ଭିଡିଓ ମଧ୍ୟ ରେକର୍ଡିଂ କରିଥିଲେ ।
ପୀଡିତ ୨ ଆଦିବାସୀ ଯୁବକ ଅନ୍ତର ଡାବର ଓ ଶଂକର ଡାବର କହିଛନ୍ତି କି ଗାଡି ଦୁର୍ଘଟଣା କାରଣକୁ ନେଇ ଏଭଳି ଘଟଣା ଘଟିଛି । ଏହାପରେ ସେମାନଙ୍କୁ ନିର୍ମମ ଭାବେ ମାଡ ମରାଯାଇଥିଲା । ଏସବୁ ଭିତରେ ସକାଳ ହେବାରୁ ଯୁବକ ଦୁଇଜଣ ସେଠାରୁ କୌଣସି ପ୍ରକାର ଖସି ଆସିଥିଲେ ।
ଗାଁରେ ପହଂଚିବା ପରେ ଯୁବକ ଦୁଇଜଣ ସେମାନଙ୍କ ସହ ଘଟିଥିବା ଘଟଣା ନିଜ ପରିବାର ଲୋକଙ୍କୁ ଜଣାଇବା ସହ ଆଦିବାସୀ ସଂଗଠନକୁ ଜଣାଇଥିଲେ । ଏହାପରେ ସଂଗଠନ ପକ୍ଷରୁ ଦୁଇ ଯୁବକଙ୍କୁ ଥାନାକୁ ନେଇ ଯାଇଥିଲେ । ସେଠାରେ ଅଭିଯୋଗ କରିବା ପରେ ପୋଲିସ ସେମାନଙ୍କୁ ମେଡିକାଲ ପଠାଇଛି । ଏହି ପୂରା ମାମଲାକୁ ନେଇ ଇନ୍ଦୋର ଡିସିପି ଆଦିତ୍ୟ ମିଶ୍ରା କହିଛନ୍ତି କି ଅପହରଣ ସହ ଅପରାଧୀଙ୍କ ଉପରେ ଗମ୍ଭୀର ଧାରାରେ ମାମଲା ରୁଜୁ କରାଯାଇଛି । ଏହାସହ ମୁଖ୍ୟ ଅଭିଯୁକ୍ତ ସୁମିତକୁ ଗିରଫ କରାଯାଇଛି ।