ରାୟଗଡ଼ାର ସଜନା ଚାଷୀ ଟଙ୍କ । ୨ ଏକର ଜମିରେ ଲଗାଇଛନ୍ତି ସଜନା ଗଛ, ବର୍ଷକୁ ରୋଜଗାର ହୋଉଛି ଲକ୍ଷାଧିକ ଟଙ୍କା
କନକ ବ୍ୟୁରୋ : ଆଦିବାସୀ ବହୁଳ ରାୟଗଡ଼ା ଜିଲ୍ଲାର ପ୍ରାୟ ଅଧୀକାଂଶ ଲୋକ ଚାଷ ଉପରେ ନିର୍ଭରଶୀଳ । ତେବେ ରାମାନାଗୁଡା ବ୍ଲକ ଏରାଗୁଡା ଗାଁର ଯୁବଚାଷୀ ଟଙ୍କ ଶବର ବିଏ ପାସ୍ କରିବା ପରେ ଚାକିରି ପଛରେ ନଗୋଡେଇ ଅତ୍ୟାଧୁନିକ ପ୍ରଣାଳୀରେ ଚାଷ କରି ଜଣେ ସଫଳ ଚାଷୀ ରୂପେ ଅଂଚଳରେ ନିଜର ପରିଚୟ ସୃ୍ଷ୍ଟି କରିଛନ୍ତି । କିଛି ଭିନ୍ନ କରିବା ଉଦ୍ଦେଶ୍ୟରେ ସଜନା ଚାଷ କରି ସେ ଏଥିରେ ସଫଳ ହୋଇଛନ୍ତି । ସ୍ଥାନୀୟ ଅଂଚଳରେ ସଜନା ଚାଷ କମ ମାତ୍ରା ହେଉଥିବାରୁ ସଜନା ପାଇଁ ଅନ୍ୟ ଅଂଚଳ ଉପରେ ନିର୍ଭର କରିବାକୁ ପଡ଼ୁଥିଲା । ଏହାକୁ ଦୃଷ୍ଟିରେ ରଖି ଚାଷୀ ଜଣକ ଆରମ୍ଭ କରିଥିଲେ ସଜନାଚାଷ । ନିଜର ୨ ଏକର ପରିମିତ ଜମିରେ ସଜନା ଚାଷ ସହ ବିଭିନ୍ନ ପ୍ରକାର ପନିପରିବା ଚାଷ କରି ନିଜେ ଆତ୍ମନିର୍ଭରଶୀଳ ହେବା ସହ ଅନ୍ୟକୁ ଆହାର ଯୋଗାଉଛନ୍ତି । ଏଥିପାଇଁ ଏକର ପିଛା ୨୦ ହଜାରରୁ ୨୫ ହଜାର ଟଙ୍କା ବିନିଯୋଗ କରି ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି ଟଙ୍କ । ଚାଷୀଙ୍କ କ୍ଷେତରୁ ପ୍ରତିଦିନ ଏକ କ୍ୱିଂଟାଲରୁ ଅଧିକ ସଜନା ଉତ୍ପାଦନ ହେଉଛି । କିଲୋ ପିଛା ୫୦-୬୦ ଟଙ୍କାରେ ବିକ୍ରି କରୁଥିବା କହିଛନ୍ତି । ବର୍ତମାନ ସୁଦ୍ଧାଚାଷୀ ଜଣକ ୨୦ କୁଇଂଟାଲରୁ ଅଧିକ ସଜନା ବିକ୍ରିକରି ନିଜର ଆର୍ôଥକ ସ୍ଥିତିରେ ଉନ୍ନତି ଆଣିପାରିଛନ୍ତି । ଯୁବ ଚାଷୀଙ୍କ ଚାଷ ପ୍ରତି ଆଗ୍ରହ ଦେଖି ତାଙ୍କ ପରିବାର ଲୋକ ତାଙ୍କୁ ଚାଷ କାମରେ ସହାୟତା କରୁଛନ୍ତି । ଉତ୍ପାଦିତ ସଜନା ବିକ୍ରି କରିବା ପାଇଁ ଚାଷୀ ଜଣକ ନିକଟସ୍ଥ ବଜାର ଉପରେ ନିର୍ଭର କରୁଥିବା ବେଳେ ବିଭିନ୍ନ ଅଂଚଳରୁ ବ୍ୟବସାୟୀ ମାନେ ମଧ୍ୟ ତାଙ୍କ ଜମି ନିକଟକୁ ଆସି ସଜନା କିଣିନିଅନ୍ତି ।
Kanak News is now on WhatsApp
Join and get latest news updates delivered to you via WhatsApp
ଟଙ୍କ ଶବରଙ୍କ ଚାଷ କରିବାର ଇଚ୍ଛାକୁ ସଫଳ କରିବା ପାଇଁ ସହାୟତାର ହାତ ବଢାଇଛି ଉଦ୍ୟାନ କୃଷି ବିଭାଗ । ମହାତ୍ମା ଗାନ୍ଧୀ ଗ୍ରାମୀଣ କର୍ମ ନିଯୁକ୍ତି ଯୋଜନାରେ ଚାଷୀଙ୍କୁ ସଜନା ଚାରା ଯୋଗାଇ ଦିଆଯିବା ସହ ଅନ୍ୟାନ୍ୟ ଆବଶ୍ୟକୀୟ ସହାୟତା ବିଭାଗ ତରଫରୁ ପ୍ରଦାନ କରାଯାଇଛି ।
ବର୍ତମାନର ଯୁବଗୋଷ୍ଠୀ ଚାକିରି ପଛରେ ପଡି ଚାଷ କାମରୁ ମୁହଁ ଫେରାଉ ଥିବାବେଳେ ଯୁବଚାଷୀଙ୍କ ଏଭଳି ପ୍ରୟାସ ଅନ୍ୟ ଶିକ୍ଷିତ ଯୁବକଙ୍କ ପାଇଁ ନିଶ୍ଚୟ ପ୍ରେରଣା ଯୋଗାଇବ ।