କନ୍ଧମାଳରେ ଫଳୁଛି ସୁଆଦିଆ ଲିଚୁ । ରୋଜଗାର ଦେଉଛି ଲକ୍ଷାଧିକ ଟଙ୍କା, ସାରା ରାଜ୍ୟ ପାଇଁ ଆଦର୍ଶ ଲିଚୁ ଚାଷୀ ପାଲଟିଛନ୍ତି ରଞ୍ଜିତ ଚୌଧୁରୀ
କନକ ବ୍ୟୁରୋ : ଗଛରେ ଫଳିଛ ପେନ୍ଥା ପେନ୍ଥା ଲିଚୁ । ଯୁଆଡ଼େ ଚାହିଁବେ ଖାଲି ଲିଚୁ ଆଉ ଲିଚୁ । ଦେଖିବାକୁ ଯେତିକି ସୁନ୍ଦର ଲାଗୁଛି, ଖାଇବାକୁ ବି ସେତିକି ସ୍ୱାଦିଷ୍ଟ । ଏ ହେଉଛି କନ୍ଧମାଳ ଜିଲ୍ଲା ବାଲିଗୁଡ଼ା ନିକଟସ୍ଥ ଗୋଇବନ୍ଧା ଗାଁର ରଂଜିତ ଚୌଧୁରୀଙ୍କ ଲିଚୁ ବଗିଚାର ଚିତ୍ର । ରଞ୍ଜିତଙ୍କ ବାପା ଭଗବାନ ଚୌଧୁରୀ ୧୫ ଏକର ଜମିରେ ଫଳ ବଗିଚାଟେ କରିଥିଲେ । ୧୦ ବର୍ଷ ପୂବେ ୧୦୦ରୁ ଅଧିକ ଲିଚୁ ଗଛ ଲଗାଇଥିଲେ । ତେବେ ବାପାଙ୍କ ଆବର୍ତମାନରେ ପୁଅ ରଞ୍ଜିତ ଚୌଧୁରୀ ଫଳ ବଗିଚାର ରକ୍ଷଣାବେକ୍ଷଣ କରିବା ସହ ଲିଚୁ ଗଛର ଯତ୍ନ ନେଉଥିଲେ । ଏବେ ବଗିଚାରେ ଥିବା ସମସ୍ତ ଲିଚୁ ଗଛରେ ଫଳ ଫଳିଛି । ଗତ କିଛି ବର୍ଷ ହେଲା ତାଙ୍କ ବଗିଚାରୁ ଟନ୍ ଟନ୍ ଲିଚୁ ଅମଳ ହେଉଛି । ଯାହା ତାଙ୍କୁ ବେଶ ଭଲ ରୋଜଗାର ଦେଉଛି ।
Kanak News is now on WhatsApp
Join and get latest news updates delivered to you via WhatsApp
ରଞ୍ଜିତଙ୍କ ୧୫ ଏକର ଫଳ ବଗିଚାରେ ଲିଚୁ ସହ ଆମ୍ବ, ସପୁରୀ, ହଳଦୀ, ଅଦା ମଧ୍ୟ ଚାଷ ହେଉଛି । କନ୍ଧମାଳର ଶୀତଳ ଜଳବାୟୁ ଓ ମୃତିକା ଲିଚୁ ଚାଷ ପାଇଁ ଅନୁକୂଳ ଥିବାରୁ ରଞ୍ଜିତ ତାଙ୍କ ବଗିଚାରୁ ପ୍ରତିବର୍ଷ ଦେଢ଼ରୁ ଦୁଇ କୁଇଂଟାଲ ଲିଚୁ ଅମଳ କରନ୍ତି । ବଜାର ଚାହିଦା ମୁତାବକ ୧୨୦ରୁ ୧୪୦ ଟଙ୍କା କିଲୋ ପିଛା ଦରରେ ବ୍ୟବସାୟୀଙ୍କୁ ବିକ୍ରି କରନ୍ତି । ବର୍ଷକୁ ପ୍ରାୟ ଦେଢ଼ରୁ ଦୁଇ ଲକ୍ଷ ଟଙ୍କା ରୋଜଗାର କରିବା ସହ ଗୋଇବନ୍ଧା ଗାଁର ଅନେକ ପରିବାରକୁ ରୋଜଗାର ଦେଇଛନ୍ତି । ତାଙ୍କ ବଗିଚାରେ କାମ କରି କିଛି ରୋଜଗାର କରୁଥିବାରୁ ଖୁସି ପ୍ରକାଶ କରିଛନ୍ତି କର୍ମଚାରୀ ।
ଭାରତରେ ବିହାର, ଝାରଖଣ୍ଡ ଓ ପଶ୍ଚିମବଙ୍ଗରେ ପ୍ରଚୁର ପରିମାଣର ଲିଚୁ ଚାଷ ହୁଏ । ତେବେ କନ୍ଧମାଳର ଜଳବାୟୁରେ ଲିଚୁ ବି ସଫଳ ହୋଇପାରିବ ବୋଲି ପ୍ରମାଣିତ କରିଛନ୍ତି ରଞ୍ଜିତ । ଆଉ ଅନ୍ୟ ଚାଷୀଙ୍କ ପାଇଁ ପାଲଟିଛନ୍ତି ପ୍ରେରଣା । କିଛି ପ୍ରୋତ୍ସାହନ ମିଳିଲେ ରାଜ୍ୟର ଆହୁରି ଅନେକ ଚାଷୀ ଏହି ଚାଷ କରି ଉପକୃତ ହୋଇପାରନ୍ତେ ବୋଲି ସେ କହିଛନ୍ତି ।