ରାଜ୍ୟ ସରକାରଙ୍କ ବିଚିତ୍ର ବିଦ୍ୟାଳୟ। ସ୍କୁଲର ଛାତକୁ ସାହା କାଠଖୁଣ୍ଟ,ବାରମ୍ବାର ଅଭିଯୋଗ ପରେ ବି ଶୁଣିଲା ନାହିଁ କୋରାପୁଟ ପ୍ରଶାସନ ।
କନକ ବ୍ୟୁରୋ: କାଠ ଖୁଣ୍ଟର ଭରସାରେ ସ୍କୁଲର ଛାତ । ଆଉ ଏହା ତଳେ ପାଠ ପଢ଼ୁଛନ୍ତି ୯୪ ଜଣ ଛାତ୍ରଛାତ୍ରୀ । କୋରାପୁଟ ଜିଲ୍ଳା ବୈପାରିଗୁଡ଼ା ବ୍ଳକର ପୁରୁଡ଼ାବେଡ଼ା ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀର ପିଲାମାନେ ଏହିଭଳି ଅବସ୍ଥାରେ ପାଠ ପଢୁଛନ୍ତି । ଫଟା ଛାତରୁ ଏବେ ଗଳୁଛି ବର୍ଷା ପାଣି । ପୁଣି ଛାତକୁ ଏକ କାଠ ଖୁଣ୍ଟ ଢିରା ଦିଆଯାଇଛି । ଏହାରି ଭିତରେ ବସି ପିଲାମାନେ ପାଠ ପଢୁଛନ୍ତି । ଯାହା ବିଲକୁଲ୍ ବିପଦମୁକ୍ତ ନୁହେଁ । ୨୦୧୨ ମସିହାରେ ଏହି ବିଦ୍ୟାଳୟ କୋଠା ନିର୍ମାଣ ହୋଇଥିଲା । ନିର୍ମାଣର ମାତ୍ର ୩ ବର୍ଷ ପରେ ଛାତ ନଇଁ ପଡିଥିଲା । ତେଣୁ ଗ୍ରାମବାସୀ ମିଳିମିଶି ଜଙ୍ଗଲରୁ ଏକ ଗଛ କାଟି ଆଣି ସ୍କୁଲ ଛାତକୁ ଢିରା ଦେଇଥିଲେ । ବାସ୍ ସେବେଠାରୁ ସେମିତି ଚାଲିଛି ସ୍କୁଲ । ସ୍କୁଲ ଛାତକୁ ଭରସା ନଥିବା ବେଳେ ବର୍ଷା ହେଲେ ପାଣି ଗଳୁଛି । କେତେବେଳେ କଣ ହେବ, ତାହା କହିବା ମୁସ୍କିଲ୍ ।
Kanak News is now on WhatsApp
Join and get latest news updates delivered to you via WhatsApp
ବିପଦ ସୃଙ୍କୁଳ ଅବସ୍ଥାରେ ଥିବା ସ୍କୁଲର ମରାମତି ପାଇଁ ଅଭିଭାବକମାନେ ବାରମ୍ବାର ଅଭିଯୋଗ କଲେ ବି ଶିକ୍ଷା ବିଭାଗ କି ଜିଲ୍ଲା ପ୍ରଶାସନ ଶୁଣୁନାହିଁ । ତେଣୁ ତାତି ଉଠିଛନ୍ତି ଗ୍ରାମବାସୀ । କୌଣସି ଉପାୟ ନପାଇ ସ୍କୁଲରେ ତାଲା ପକାଇ ଦେଇଛନ୍ତି ଗ୍ରାମବାସୀ । ବିଦ୍ୟାଳୟରେ ତାଲା ପଡିଥିବା ଖବର ପାଇ ପହଞ୍ଚିଥିଲେ ଜୟପୁର ଉପଜିଲ୍ଳାପାଳ । ହେଲେ ସେ ବି ଜାଣି ନାହାନ୍ତି ସ୍କୁଲର ଅବସ୍ଥା ବାବଦରେ । ଆଉ ଏ ହେଉଛି ରାଜ୍ୟ ସରକାରଙ୍କ ବ୍ୟବସ୍ଥା ଭିତରେ ରହିଥିବା ଆଦିବାସୀ ଅଞ୍ଚଳର ବିଦ୍ୟାଳୟ । ବିଦ୍ୟାଳୟ ଗୁଡିକ ଏଭଳି ଅବସ୍ଥାରେ ଥିବା ବେଳେ ସରକାରୀ ସ୍କୁଲରୁ ପିଲାଙ୍କ ଭବିଷ୍ୟତ ଖୋଜୁଛି ଶିକ୍ଷା ବିଭାଗ ।