କିଡନୀ ପ୍ରତିରୋପଣରେ ବିଫଳ ହେଲା ବଡ ମେଡିକାଲ: ଡାକ୍ତର କହିଲେ ମ୍ୟାଚ୍ ନକରିବାରୁ ଫେରାଇ ଦିଆଗଲା କିଡନୀ
କନକ ବ୍ୟୁରୋ: କଟକର ଏସସିବି ମେଡିକାଲ କଲେଜ । ଏମ୍ସ-ପ୍ଲସ ହସ୍ପିଟାଲ କରିବା ପାଇଁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି । କିନ୍ତୁ କିଡନୀ ପ୍ରତିରୋପଣ କରିବାରେ ଅସଫଳ ହୋଇଥିବା ଅଭିଯୋଗ ହୋଇଛି । ଫଳରେ ରାଜ୍ୟର ସବୁଠାରୁ ବଡ ମେଡିକାଲ କଲେଜ ଏସସିବିର ଅବହେଳା ଓ ଦାୟିତ୍ୱହୀନତା ପଦାକୁ ଆସିଛି । ଭୁବନେଶ୍ୱର କିମ୍ସ ହସପିଟାଲରେ ସାଢେ ୫ ବର୍ଷ ବୟସର ଏକ ଶିଶୁ ବ୍ରେନଡେଡ୍ ଘୋଷିତ ହେବା ପରେ ଶିଶୁର କିଡନୀ ଦାନ କରିଥିଲେ ବାପା-ମାଆ । କିନ୍ତୁ ବିଶ୍ୱସ୍ତରୀୟ ହେବାକୁ ଯାଉଥିବା ଏସସିବି ମେଡିକାଲରେ ରୋଗୀଙ୍କ ଶରୀରରେ କିଡନୀ ପ୍ରତିରୋପଣ କରାଯାଇପାରିଲା ନାହିଁ ।
Kanak News is now on WhatsApp
Join and get latest news updates delivered to you via WhatsApp
କିଡନୀ ବାହାର କରିବା ଏବଂ ଜଣଙ୍କ ଦେହରେ ପ୍ରତିରୋପଣ କରିବା, ଯଦି ଠିକ୍ ସମୟରେ ନହୁଏ, ତେବେ ଏହା ଫଳପ୍ରଦ ହେବାର ସମ୍ଭାବନା ହ୍ରାସ ପାଇଥାଏ । ସମୟକୁ ବଂଚାଇବା ପାଇଁ ଗ୍ରୀନ୍ କରିଡର ଭଳି ବ୍ୟବସ୍ଥା କରାଯାଇଥାଏ । କିନ୍ତୁ କିଡନୀ ଆଣି କିଛି ସମୟ ରଖିବା ପରେ ଫେରାଇ ଦିଆଗଲା, ଯାହା ଏସସିବିର ଭିତିଭୂମି ଉପରେ ବଡ ପ୍ରଶ୍ନ ଚିହ୍ନ ସୃଷ୍ଟି କରିଛି ।
କିନ୍ତୁ ଭୁବନେଶ୍ୱରରୁ କିଡନୀ ଗଲା କଟକ, ପୁଣି କଟକରୁ ଫେରିଲା ଭୁବନେଶ୍ୱର । ଆଉ ଏହି ପ୍ରକ୍ରିିୟାରେ ଘଂଟା ଘଂଟା ସମୟ ଅଯଥାରେ ନଷ୍ଟ ହୋଇଥିଲା । କିନ୍ତୁ ଏସସିବିର ନେଫ୍ରୋଲୋଜି ବିଭାଗ ମୁ୍ଖ୍ୟଙ୍କ କହିବା କଥା, ରୋଗୀଙ୍କ ସହ ମେଳ ନଖାଇବାରୁ କିଡନୀକୁ ଫେରାଇ ଦିଆଯାଇଥିଲା ।
ସବୁଠୁ ବଡ଼ କଥା ହେଉଛି, କଟକ ବଡ ମେଡିକାଲରେ ଗୋଟିଏ ବି କିଡନୀ ପ୍ରତିରୋପଣ ହୋଇପାରିଲା ନାହିଁ । କିନ୍ତୁ ବେସରକାରୀ ହସ୍ପିଟାଲ ଆପୋଲୋରେ ଦୁଇଟି ଯାକ କିଡନୀ ଟ୍ରାନ୍ସପ୍ଲାଂଟ ହୋଇ ପାରିଥିଲା ।
ଏପଟେ କଟକ ଏସସିବି ମେଡିକାଲରେ ଅବ୍ୟବସ୍ଥା ବିରୋଧରେ ସ୍ୱର ଉଠାଇଛନ୍ତି କିଡନୀ ପ୍ରତିରୋପଣ କରିଥିବା ବ୍ୟକ୍ତି । କିଡନୀ ପ୍ରତିରୋପଣ ରୋଗୀଙ୍କ ପ୍ରତି ବୌମାତୃକ ମନୋଭାବ ପ୍ରତିବାଦରେ ଭୁବନେଶ୍ୱର ଲୋୟର ପିଏମଜିରେ ଧାରଣା ଦେଇଛନ୍ତି । ସେମାନେ ଅଭିଯୋଗ କରିଛନ୍ତି, ଏସସିବିରେ ନାହାନ୍ତି ଭଲ ଡାକ୍ତର ନାହାନ୍ତି । ଉନ୍ନତ ମାନର ଔଷଧ ଦିଆଯାଉନାହିଁ । ଭଲ ଚିକିତ୍ସା ମିଳୁ ନଥିବାରୁ ଘରୋଇ ମେଡିକାଲକୁ ଯିବା ପାଇଁ ବାଧ୍ୟ ହେଉଛନ୍ତି ବୋଲି ସେମାନେ କହିଛନ୍ତି ।
କଟକ ମେଡିକାଲରେ ଅବ୍ୟବସ୍ଥା ଭବିଷ୍ୟତରେ ହେବାକୁ ଥିବା ଅନ୍ୟାନ୍ୟ ଅଙ୍ଗ ପ୍ରତିରୋପଣର ସଫଳତାକୁ ନେଇ ସନ୍ଦେହ ସୃଷ୍ଟି କରିଛି । କୌଣସି ପୂର୍ବ ପ୍ରସ୍ତୁତି ବା ଯୋଜନା କରାନଯିବାରୁ ଏବଂ ସମନ୍ୱୟ ଅଭାବରୁ ଏଭଳି ପ୍ରତିରୋପଣ ଫେଲ ମାରିଲା ବୋଲି କୁହାଯାଉଛି ।