ମମିତା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ସନ୍ଦେହଜନକ ମୃତ୍ୟୁ: ତଦନ୍ତ କରିବାକୁ ଗଲେ କ୍ରାଇମବ୍ରାଂଚ-ସିଆଇଡିର ଟିମ୍
କନକ ବ୍ୟୁରୋ: କଂଟାବାଞ୍ଜି ସବଜେଲରେ ଗୋବିନ୍ଦ ସାହୁ ଆତ୍ମହତ୍ୟା କରିଥିବା ନେଇ ଖବର ଆସିବା ପରେ ତତ୍କ୍ଷଣାତ ତଦନ୍ତ ନିର୍ଦ୍ଦେଶ ଦିଆଗଲା । ସମ୍ବଲପୁର ରେଞ୍ଜ ଜେଲ ଡିଆଇଜି ଅନସୂୟା ଜେନାଙ୍କୁ ତଦନ୍ତ ଭାର ଦିଆଯାଇଥିବା କୁହାଗଲା । ଏପରିକି ଏନଏଚଆରସି ଗାଇଡଲାଇନ ଅନୁସାରେ ସବୁ ଦିଗରୁ ତଦନ୍ତ କରାଯିବ ବୋଲି ସୂଚନା ଦେଲେ ଜେଲ ବିଭାଗ ଏଡିଜି । ରିପୋର୍ଟ ଆସିବା ପରେ ସୁରକ୍ଷାରେ ଅବହେଳା ହୋଇଥିଲେ କାର୍ଯ୍ୟାନୁଷ୍ଠାନ ହେବ ବୋଲି କୁହାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ହେଲେ ଏହାର କିଛି ସମୟ ପରେ ସିଆଇଡି କ୍ରାଇମବ୍ରାଂଚକୁ ତଦନ୍ତ ଭାର ଦିଆଯାଇଥିବା ଟ୍ୱିଟ୍ କରି ସୂଚନା ଦେଲା ପୋଲିସ । ସିନ୍ଧକେଲା ପୋଲିସ ଷ୍ଟେସନରେ ହୋଇଥିବା ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ଅସ୍ୱାଭାବିକ ମୃତ୍ୟୁ ଘଟଣାର ସିଆଇଡି-କ୍ରାଇମବ୍ରାଂଚ ତଦନ୍ତ ପାଇଁ ପୋଲିସ ଡିଜି ନିର୍ଦ୍ଦେଶ ଦେଇଥିବା ଏହି ଟ୍ୱିଟରେ ଉଲ୍ଲେଖ କରାଯାଇଥିଲା ।
– ଡିଏସ୍ପି ବିଜୟ ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ମାମଲାର ତଦନ୍ତ କରିବେ
– ସିଆଇଡି-କ୍ରାଇମବ୍ରାଂଚର ଅନ୍ୟ ୩ ଅଫିସର ମଧ୍ୟ ତାଙ୍କ ସହ କଂଟାବାଞ୍ଜି ଯାଇଛନ୍ତି
– ଏମାନଙ୍କ ଛଡା ୧୦ ଜଣିଆ ଟିମରେ ଫୋରେନସିକ ଓ ସାଇବର ଏକ୍ସପର୍ଟ ଅଛନ୍ତି
– ରାଜ୍ୟ ପୋଲିସ ଫଟୋ ବ୍ୟୁରୋର ଅଧିକାରୀ ମଧ୍ୟ ଏହି ଟିମରେ ସାମିଲ ହୋଇଛନ୍ତି
ଜେଲ ହାଜତ ଭିତରେ କଡା ସୁରକ୍ଷା ମଧ୍ୟରେ କେମିତି ଝୁଲିପଡିଲେ ଜଣେ ବିଚାରାଧୀନ କଏଦୀ । ମମିତା ମେହେର ହତ୍ୟାକାଣ୍ଡ ଭଳି ଅତି ସମ୍ବେଦନଶୀଳ ମାମଲାର ମୁଖ୍ୟ ଅଭିଯୁକ୍ତ ହୋଇଥିବାରୁ ଏହାକୁ ନେଇ ତମ୍ବିତୋଫାନ ଆରମ୍ଭ ହୋଇଛି । ତେଣୁ ମାମଲାର ଗୁରୁତ୍ୱକୁ ଦେଖି ଜୋରଦାର ହୋଇଛି ଅନୁସନ୍ଧାନ । ଅନୁମାନ କରାଯାଉଛି ତଦନ୍ତ ପରେ ଉଠୁଥିବା ପ୍ରଶ୍ନ ଉପରୁ ପରଦା ଉଠିବ ।
– କୋର୍ଟକୁ ଯିବା ପୂର୍ବରୁ କାହିଁକି ଝୁଲି ପଡିଲେ ଗୋବିନ୍ଦ ସାହୁ?
– ସେଲ ପଛପଟେ ଥିବା କଦମ୍ବ ଗଛ ପର୍ଯ୍ୟନ୍ତ ଗଲେ କେମିତି?
– ଗାମୁଛାରେ ଝୁଲି ପଡିବା ବେଳେ କେହି ଦେଖିପାରିଲେନି କେମିତି?
– ଗୋବିନ୍ଦ ଆତ୍ମହତ୍ୟା କଲାବେଳେ ସୁରକ୍ଷାକର୍ମୀ କେଉଁଠି ଥିଲେ?
– ଗୋବିନ୍ଦଙ୍କ ଆତ୍ମହତ୍ୟା ପାଇଁ ଜେଲ କର୍ମଚାରୀ କାହିଁକି ଦାୟୀ ହେବେନାହିଁ?