କନକ ବ୍ୟୁରୋ: ସତ ସ୍ୱୀକାର କଲେ ଶର୍ମିଷ୍ଠା । କ୍ରାଇମବ୍ରାଞ୍ଚର ଜେରାରେ ହତ୍ୟାକାଣ୍ଡର କାହାଣୀ କହିଛନ୍ତି କ୍ୟାମେରାମ୍ୟାନ୍ ମାନସ ହତ୍ୟାର ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ । କହିଛନ୍ତି, ଫେବୃଆରୀ ୭ ତାରିଖ ସକାଳେ ମାନସଙ୍କୁ ଭଦ୍ରକ ଜିଲ୍ଲା ଚାନ୍ଦବାଲି ଥାନା ପଳାସପୁର ନିକଟରୁ ଅପହରଣ କରିଥିଲେ । ମାନସଙ୍କୁ ଅପହରଣ କରିବା ପାଇଁ ସେମାନେ ଫେବୃଆରୀ ୬ ତାରିଖ ରାତିରୁ ସେହି ସ୍ଥାନରେ ଅପେକ୍ଷା କରିଥିଲେ । ଶର୍ମିଷ୍ଠାଙ୍କୁ ଏହି ଅପହରଣରେ ରଞ୍ଜନ ନାୟକ, ଝୁନା ଭୋଇ, ଭାଗ୍ୟଧର ନାୟକ, ବିବେକ ସହଯୋଗ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅପହରଣ କରିବା ପରେ ମାନସଙ୍କୁ ଆଣି ସେହିଦିନ ଦ୍ୱିପ୍ରହରରେ ଭୁବନେଶ୍ୱର ଏୟାରଫିଲ୍ଡ ଥାନା ଅନ୍ତର୍ଗତ ଦୟାଲ ଆଶ୍ରମକୁ ଅଣାଯାଇଥିଲା । ସେଠାରେ ତାଙ୍କୁ ମରଣାନ୍ତକ ଅତ୍ୟାଚାର କରିଥିଲେ ଶର୍ମିଷ୍ଠା ଓ ତାଙ୍କ ସହଯୋଗୀ । ଯେଉଁଥିରେ ମାନସଙ୍କର ମୃତ୍ୟୁ ହୋଇଯାଇଥିଲା । ଫେବୃଆରୀ ୮ ତାରିଖ ଅପରାହ୍ନରେ ଶର୍ମିଷ୍ଠା ତାଙ୍କ କାରରେ ମୃତ ଶରୀରକୁ ଧରି ନୟାଗଡ଼ ଜିଲ୍ଲା ରଣପୁର ଥାନା ଅଧୀନରେ ଥିବା ଏକ ସ୍ଥାନରେ ପୋତି ଦେଇଥିଲେ ।
ମାନସଙ୍କ ମୃତ୍ୟୁ ପରେ ଶର୍ମିଷ୍ଠା ଏବଂ ସହଯୋଗୀ ଝୁନା ଭୁବନେଶ୍ୱର ଏକ ନମ୍ବର ମାର୍କେଟରୁ ଅଖା ବସ୍ତା, ଗ୍ଲୋଭସ୍ ଓ ସୁତୁଲି ପ୍ରଭୃତି କିଣିଥିଲେ । ମୃତ ଶରୀରକୁ ରଣପୁର ନେବା ବାଟରେ ରାଜସୁନଖଳା ଠାରୁ ୧୦ କେଜି ଲୁଣ ମଧ୍ୟ କିଣିଥିଲେ ଝୁନା ଓ ଶର୍ମିଷ୍ଠା । ଭାଗ୍ୟଧର ଏବଂ ରଞ୍ଜନ ସେହି ରାଜସୁନାଖଳାରୁ ଫାଉଡ଼ା ଓ ଗଇନ୍ତି କିଣିଥିଲେ । ଭାଗ୍ୟଧରଙ୍କ ଘର ରଣପୁର ଥାନା ବଧିପାଟଣା ହୋଇଥିବାରୁ ସେଠାରୁ ଦୁଇ କିଲୋମିଟର ଦୂର ନୂଆ କାଟେଣୀରେ ମୃତଦେହକୁ ପୋତିବା ପାଇଁ ସ୍ଥିର କରିଥିଲେ । ମୃତ ଶରୀରକୁ ପୋତି ସାରିବା ପରେ ଦୈତାରୀ-ପାରାଦ୍ୱୀପ ଏକ୍ସପ୍ରେସ୍ ହାଇୱେର ଚଣ୍ଡିଖୋଲ ଠାରେ ମଧ୍ୟରାତ୍ରିରେ ପହଞ୍ଚିଥିଲେ ସମସ୍ତ ଅଭିଯୁକ୍ତ ଏବଂ ସେହିଠାରେ ହତ୍ୟାକାଣ୍ଡ ଓ ମୃତଦେହକୁ ସ୍ଥାନାନ୍ତର କରିବାରେ ବ୍ୟବହାର କରାଯାଇଥିବା ମାରଣାସ୍ତ୍ର ଅଖା ବସ୍ତା ଓ ଶାଢ଼ୀକୁ ନଷ୍ଟ କରିଥିଲେ । ଶର୍ମିଷ୍ଠା ହତ୍ୟାକାଣ୍ଡ ଭିଆଇଥିବା ସ୍ୱୀକାର କରିବା ପରେ ଏ ବିଷୟରେ ଅଧିକ ତଦନ୍ତ ଜାରି ରଖିଛି କ୍ରାଇମବ୍ରାଞ୍ଚ ।