କନକ ବ୍ୟୁରୋ : ଚେନ୍ନାଇ ନିକଟ ମାମଲାପୁରମ୍ ଉପକୂଳ ଦେଇ ଅତିକ୍ରମ କଲା ପରେ ଧିରେ ଧିରେ ଦୁର୍ବଳ ହୋଇଛି ବାତ୍ୟା ‘ମାଣ୍ଡସ୍’ । ଏହାର ପ୍ରଭାବରେ ଉତର ତାମିଲନାଡୁ ଓ ଦକ୍ଷିଣ ଆନ୍ଧ୍ର ଉପକୂଳବର୍ତୀ ଜିଲ୍ଲାଗୁଡିକରେ ହୋଇଛି ପ୍ରବଳ ବର୍ଷା । ଦୀର୍ଘ ୨ ଘଂଟା ଧରି ଲ୍ୟାଣ୍ଡଫଲ୍ ପ୍ରକ୍ରିୟା ଚାଲିଥିବା ବେଳେ ମାମଲାପୁରମ୍ ଓ ଚେନ୍ନାଇ ସମେତ ବିଭିନ୍ନ ସ୍ଥାନରେ ବ୍ୟାପକ କ୍ଷୟକ୍ଷତି ହୋଇଛି । ବାତ୍ୟା ମାଣ୍ଡସ୍ ପ୍ରଭାବରେ ବଡ ବଡ ଗଛ ଭାଙ୍ଗିପଡିଛି, ବିଦ୍ୟୁତ୍ ଖୁଂଟ ଉପୁଡିପଡିଛି । ତଳିଆ ଅଂଚଳରେ ଥିବା କଚ୍ଚା ଘର ବିଶେଷ ଭାବେ ପ୍ରଭାବିତ ହୋଇଛି । ମାଣ୍ଡସ୍ ପ୍ରଭାବରେ ତାମିଲନାଡୁରେ ୪ ଜଣଙ୍କ ମୃତ୍ୟୁହୋଇଥିବା ବେଳ ୪୦୦ରୁ ଅଧିକ ଗଛ ଉପୁଡିପଡିଛି । ଏନଡିଆରଏଫ ଟିମ୍ ରାସ୍ତା ଉପରକୁ ଗଛ ଗୁଡିକୁ କାଟିବାରେ ଲାଗିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭୀଷଣ ବାତ୍ୟାର ରୂପ ନେଇ ଶୁକ୍ରବାର ବିଳମ୍ବିତ ରାତିରେ ତାମିଲନାଡୁର ମାମଲାପୁରମ୍ ନିକଟରେ ସ୍ଥଳଭାଗ ଛୁଇଁଥିଲା ବାତ୍ୟା ‘ମାଣ୍ଡସ୍’ । ଲ୍ୟାଣ୍ଡଫଲ୍ ବେଳେ ପବନର ବେଗ ଘଂଟା ପ୍ରତି ୮୫ କିଲୋମିଟର ରହିଥିଲା । ପ୍ରାୟ ୨ ଘଂଟା ଧରି ତାଣ୍ଡବ ରଚିବା ପରେ କ୍ରମେ ଏହା ଦୁର୍ବଳ ହୋଇ ଗଭୀର ଅବପାତର ରୂପ ନେଇଥିଲା । ଏହାର ପ୍ରଭାବରେ ତାମିଲନାଡୁ, ଆନ୍ଧ୍ରପ୍ରଦେଶ ଓ ଏହାର ଆଖପାଖ ଅଂଚଳରେ ବର୍ଷା ଲାଗିରହିଛି । ପ୍ରବଳ ବର୍ଷା ଯୋଗୁଁ ଚେନ୍ନାଇରେ ବନ୍ୟା ସ୍ଥିତି ଉପୁଜିଛି । ବିଭିନ୍ନ ସ୍ଥାନରେ ପାଣି ଜମିରହିବା ଯୋଗୁଁ ଲୋକେ ଜଳବନ୍ଦୀ ଜୀବନ କାଟୁଛନ୍ତି ।
ସାମୁଦ୍ରିକ ଝଡ ମାଣ୍ଡସ୍ ପ୍ରଭାବରେ ତାମିଲନାଡୁରେ ବିଶେଷ କ୍ଷୟକ୍ଷତି ହୋଇଛି । ପ୍ରଭାବିତ ଅଂଚଳକୁ ଯାଇ ପ୍ରଶାସନିକ ଅଧିକାରୀ ମାନେ କ୍ଷୟକ୍ଷତିର ଯାଂଚ କରୁଛନ୍ତି । କୁହାଯାଉଛି, ପ୍ରଶାସନ ଆଗୁଆ ପଦକ୍ଷେପ ଯୋଗୁଁ ଏକ ବଡ ବିପଦ ଟଳିଯାଇଛି ।