କନକ ବ୍ୟୁରୋ : ରୁଷ-ୟୁକ୍ରେନ ଯୁଦ୍ଧ ଭିତରେ ପରମାଣୁ ଆକ୍ରମଣ ଆଶଙ୍କା ବଢିବାରେ ଲାଗିଛି । କିଛି ଦିନ ହେବ ୟୁକ୍ରେନ ଉପରେ ପରମାଣୁ ଆକ୍ରମଣ କରିବା ନେଇ ବାରମ୍ବାର ରୁଷ ଧମକଚମକ ଦେଇ ଆସୁଛି । ଏହା ଭିତରେ କିନ୍ତୁ ରୁଷର ମୁଣ୍ଡବିନ୍ଧାର କାରଣ ହୋଇଛି ଡାର୍ଟି ବମ୍ । ରୁଷ ସେନା ଓ ରୁଷ ଅକ୍ତିଆର କରିଥିବା ସ୍ଥାନମାନଙ୍କରେ ୟୁକ୍ରେନ ଡାର୍ଟି ବମର ପ୍ରୟୋଗ କରୁଥିବା ଅଭିଯୋଗ ଆଣିଛି ରୁଷ । ଏହା ଭିତରେ ଆମେରିକା ରୁଷକୁ ପୁଣି ଥରେ ଚେତାବନୀ ଦେଇ କହିଛନ୍ତି କି ଯଦି ରୁଷ ପରମାଣୁ ଆକ୍ରମଣ କରେ ଏହାର ବଡ ପରିଣାମ ଭୋଗିବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
ରୁଷ ପ୍ରତିରକ୍ଷାମନ୍ତ୍ରୀ ଅଭିଯୋଗ କରିଛନ୍ତି ରୁଷ ସେନା ଅକ୍ତିଆର କରିଥିବା ସ୍ଥାନରେ ୟୁକ୍ରେନ ଡାର୍ଟି ବୋମାରେ ଆକ୍ରମଣ କରୁଛି । ରୁଷ ପ୍ରତିରକ୍ଷାମନ୍ତ୍ରୀ ସଗେଇ ଶୋଝୁଙ୍ଗ ୟୁକ୍ରେନ ଉପରେ ଏହି ଅଭିଯୋଗ ଆଣିବା ସହ ବ୍ରିଟେନ, ଫ୍ରାନ୍ସ ଓ ତୁର୍କୀର ନେତାଙ୍କୁ ଫୋନରେ ଏହି ସମ୍ବନ୍ଧରେ ଜଣାଇଛନ୍ତି । ଏଥିସହ ଆମେରିକା ପ୍ରତିରକ୍ଷାମନ୍ତ୍ରୀ ଲାଏଡ ଆଷ୍ଟିନଙ୍କୁ ମଧ୍ୟ ଏହା ବିଷୟରେ ଅବଗତ କରାଇଛି ରୁଷ । କେବଳ ୟୁକ୍ରେନ ଉପରେ ରୁଷ ଅଭିଯୋଗ ଆଣିନି ବରଂ ଏକଥା ମଧ୍ୟ କହିଛି ୟୁକ୍ରେନ ନାଟୋ ଇସାରାରେ ଏଭଳି କରୁଛି । ୟୁକ୍ରେନ ମଧ୍ୟ ରୁଷର ଏହି ଅଭିଯୋଗକୁ ଖଣ୍ଡନ କରିଛି । ଘଟଣାକୁ ନେଇ ମିଳିତ ଜାତିସଂଘର ପରମାଣୁ ନୀରିକ୍ଷଣ ସଂସ୍ଥା ଆଇ.ଇ.ଏ କହିଛି ରୁଷ ଯେଉଁ ଅଭିଯୋଗ ୟୁକ୍ରେନ ଉପରେ ଆଣୁଛି ତାର ପ୍ରମାଣ କିଛି ବି ଉପସ୍ଥାପନ କରୁନି । ତେଣୁ ନାଟୋ ଏହାକୁ ଖାରଜ କରୁଛି । ଏଥିସହ ରୁଷ ଆଶଙ୍କା ପ୍ରକାଶ କରିଛି କି:
ୟୁକ୍ରେନ ଉପରେ ରୁଷର ଅଭିଯୋଗ:
• କମ ଇନଟେନସିଟିରର ଘାତକ ବୋମାର ବ୍ୟବହାର କରିପାରେ ୟୁକ୍ରେନ
• ଋୁଷ ଅକ୍ତିଆର କରିଥିବା ସ୍ଥାନରେ ୟୁକ୍ରେନ କରିପାରେ ଆକ୍ରମଣ
• ରୁଷ ଏକଥା ମଧ୍ୟ ଦାବି କରୁଛି କି ଫଲସ ଫ୍ଲାଗ୍ ଆଟାକ ସହ ୟୁକ୍ରେନ ନୂଆ ଷଡଯନ୍ତ୍ର କରୁଛି
• ଖେରସୋନ ଇଲାକାକୁ ଟାର୍ଗେଟ କରୁଛିି ରୁଷ,
• ତେଣୁ ସେନାଙ୍କୁ ଖାଲି କରିବାକୁ ନିର୍ଦ୍ଦେଶ ଦେଇଛି କ୍ରେମଲିନ
• ରୁଷ ମିଡିଆ ଦାବି କରିଛି କି ଚେନୋବିଲରେ ଡାର୍ଟି ବମ ତିଆରି କରାଯାଉଛି
ସେପଟେ ରୁଷର ଅଭିଯୋଗକୁ ଖଣ୍ଡନ କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲଡମୀର ଜେଲେନସ୍କି । ଜେଲେନସ୍କି କହିଛନ୍ତି , ଏଭଳି ମିଛ ଅଭିଯୋଗ ଆଣିବା ପଛରେ ରୁଷର ଏକ ବଡ ଷଡଯନ୍ତ୍ର ରହିଛି । ପୁଟିନ ୟୁକ୍ରେନ ଉପରେ ପରମାଣୁ ଆକ୍ରମଣ କରିବାକୁ ଯୋଜନା କରୁଛି । ତେଣୁ ଏଭଳି ମିଛ ଅଭିଯୋଗ ଆଣି ପାଲଟା ଆକ୍ରମଣରେ ପରମାଣୁ ହତିଆର ବ୍ୟବହାର କରିବାକୁ ପ୍ଲାନ କରୁଛନ୍ତି ରୁଷ ରାଷ୍ଟ୍ରପତି ପୁଟିନ ।
ରୁଷକୁ କଡ଼ା ଚେତାବନୀ ଦେଇଛି ଆମେରିକା । ରାଷ୍ଟ୍ରପତି ଜୋ ବାଇଡେନ କହିଛନ୍ତି ରୁଷର ଏଭଳି ଅଭିଯୋଗ ଭିତିହୀନ ଓ ନିଜର ଷଡଯନ୍ତ୍ରକୁ ସଫଳ କରିବା ପାଇଁ ଏଭଳି ମିଛ ଅଭିଯୋଗ କରୁଛି ରୁଷ । ଏଥିସହ ଆମେରିକା କହିଛି ଯୁଦ୍ଧ ଭିତରେ ଯଦି ରୁଷ ପରମାଣୁ ଆକ୍ରମଣ କରେ ତେବେ ଏହାର ବଡ ପରିଣାମ ରୁଷକୁ ଭୋଗିବାକୁ ପଡିବ ।
ଡାର୍ଟି ବମ୍ କ’ଣ?
-ଏହା ଏପରି ଏକ ବୋମା ଯେଉଁଥିରେ ରେଡିଓଆକ୍ଟିଭ ତଥା ବିକିରଣଶୀଳ ପଦାର୍ଥ ରହିଛି
-ୟୁରାନିୟମ ଭଳି ମାରାତ୍ମକ ବିସ୍ଫୋରକ ସାମଗ୍ରୀରେ ଏହି ବୋମା ପ୍ରସ୍ତୁତ
-ବୋମା ବିସ୍ପୋରଣ ପରେ ସେଥିରୁ ବିଷାକ୍ତ ଗ୍ୟାସ ବାହାରି ବାୟୁରେ ମିଶେ
-ଏହି ବୋମା ପାଇଁ ରେଡିଓଆକ୍ଟିଭ ପଦାର୍ଥ ହସ୍ପିଟାଲ, ନ୍ୟୁକ୍ଲିୟର ପାୱାର ପ୍ଲାଂଟ୍ ଏବଂ ଗବେଷଣା ଲାବ୍ରୋଟେରୀରୁ ଆସିଥାଏ
-ପରମାଣୁ ବୋମାଠୁ ଏହି ବୋମା ଶସ୍ତା ଏବଂ ଶିଘ୍ର ପ୍ରସ୍ତୁତ ହୋଇଯାଇଥାଏ
-ବୋମାରେ ୯ ଗ୍ରାମ କୋବଲଟ-୬୦ ଏବଂ ୫ କିଲୋ ବିସ୍ଫୋରକ ଟିଏନଟି ବ୍ୟବାହାର ହୋଇଥାଏ
-ଯାହା ଶରୀର ପାଇଁ ବହୁ କ୍ଷତିକାରକ ବୋଲି ଆମେରିକାର ବୈଜ୍ଞାନିକ କହିଛନ୍ତି
ପ୍ରାୟ ୮ମାସରୁ ଅଧିକ ସମୟ ହେବ ରୁଷ-ୟୁକ୍ରେନ ମଧ୍ୟରେ ଚାଲିଛି ଯୁଦ୍ଧ । ଚଳିତବର୍ଷ ଫେବୃଆରୀ ମାସରୁ ଆରମ୍ଭ ହୋଇଥିବା ଏହି ଯୁଦ୍ଧରେ କେତେ କଣ ଯେ କ୍ଷତି ହୋଇଛି ତାକୁ ଆକଳନ କରିବା ଏକ ପ୍ରକାର ମୁସ୍କିଲ । ଉଭୟ ଦେଶ ସହୁଛନ୍ତି ଅଗଣିତ କ୍ଷତି । ଏହା ଭିତରେ ଡାର୍ଟି ବମକୁ ନେଇ ଶକ୍ତିଶାଳୀ ରୁଷ କୁଆଡେ ଭୟଭୀତ ହୋଇପଡିଛି ।