କୁକୁର ପାଇଁ କଟକଣା: ଗୃହପାଳିତ ପଶୁ ରଖିଲେ ବିଏମସିରୁ ନେବାକୁ ହେବ ଅନୁମତି, କରିବାକୁ ପଡିବ ପଞ୍ଜିକରଣ
କନକ ବ୍ୟୁରୋ: ପୋଷା କୁକୁରକୁ ନେଇ ରାଜଧାନୀରେ ତୁମୁଳକାଣ୍ଡ ହେବା ପରେ ଆକ୍ସନ ମୋଡରେ ବିଏମସି । ଏଣିକି ଗୃହପାଳିତ ପଶୁ ରଖିବାକୁ ହେଲେ ବିଏମସିରୁ ନେବାକୁ ପଡିବ ଅନୁମତି । ବିଏମସିରେ କରିବାକୁ ପଡିବ ପଞ୍ଜିକରଣ । ଆସନ୍ତା ସପ୍ତାହ ସୁଦ୍ଧା ଆସିବ ନୂଆ ଗାଇଡଲାଇନ । ପଶୁ ରଖିବା ପାଇଁ ଘରେ ସୁସ୍ଥ ବାତାବରଣ ଅଛି କି ନାହିଁ ସେ ନେଇ ତଦାରଖ କରିବ ବିଏମସି । ପଶୁର ପ୍ରକୃତି କେମିତି, ଏନେଇ ପଶୁ ଡାକ୍ତରଙ୍କଠାରୁ ସାର୍ଟିଫିକେଟ ନେବାକୁ ପଡିବ । ଏନେଇ ଡ୍ରାଫଟିଂ ପ୍ରକ୍ରିୟା ସରିଥିବା କହିଛନ୍ତି ବିଏମସି କମିଶନର ।
Kanak News is now on WhatsApp
Join and get latest news updates delivered to you via WhatsApp
ଗୃହପାଳିତ ପଶୁ ରଖିବା ନେଇ ବିଏମସି ସ୍ୱତନ୍ତ୍ର ଗାଇଡଲାଇନ ଆଣିବାକୁ ଯାଉଥିବାବେଳେ ଏନେଇ ପ୍ରତିକ୍ରିୟା ରଖିଛନ୍ତି ରାଜନେତା ତଥାଗତ ସତପଥି । ଘରେ କୁକୁର ରଖିବା ତାଙ୍କର ବି ସୌକ । ତେବେ ଗୋଟିଏ ନିର୍ଦ୍ଦିଷ୍ଟ ଘଟଣାକୁ ନେଇ ବିଏମସି ସମସ୍ତଙ୍କ ଉପରେ କଟକଣା ନଲଗାନ୍ତୁ ବୋଲି ସେ କହିଛନ୍ତି । କୁକୁର ହିଂସ୍ର ହେବା ପଛରେ କୁକୁର ମାଲିକ ଦାୟୀ । ଯେଉଁମାନେ କୁକୁରକୁ ଠିକ୍ ଭାବେ ପାଳନ କରିପାରୁନାହାନ୍ତି ସେମାନଙ୍କ ଉପରେ ମୋଟା ଅଙ୍କର ଜରିମାନା ଲଗାଇବାକୁ କହିଛନ୍ତି ତଥାଗତ ।
ତେବେ ରାଜଧାନୀରେ ବିଦେଶୀ କୁକୁରଙ୍କ ଚାହିଦା ବଢୁଥିବାବେଳେ ବେଆଇନ ଭାବେ ଅନେକ ଲୋକ କୁକୁର ବେପାର ଚଳାଇଛନ୍ତି । କେବଳ ବ୍ୟବସାୟ ନୁହଁ ବେଆଇନ ଭାବେ କୁକୁରଙ୍କ ବଂଶ ବଢ଼ାଉଥିବା ନଜରକୁ ଆସୁଛି । ଭୁବନେଶ୍ୱରର ଲକ୍ଷ୍ମୀସାଗର ଅଂଚଳରେ ରମେଶ ଦାସ, ସରକାରୀ ଜାଗାରେ କୁକୁର ରଖିଥିବା ବେଳେ ବେଆଇନ ନିର୍ମାଣ ପାଇଁ ଘର ଭାଙ୍ଗିଦେଇଛି ବିଡିଏ । ଏବେ ବାଲିଅନ୍ତା ସ୍ଥିତ ରଙ୍ଗ ବଜାର ପାଖରେ ଏକ ଅସ୍ଥାୟୀ ଘରେ ସେ ରଖିଛନ୍ତି ୫୦ କୁକୁର । ୨୦ ବର୍ଷରୁ ଅଧିକ ହେବ କୁକୁର ରଖି ଆସୁଥିବା ରମେଶ ବିନା ପ୍ରଶିକ୍ଷଣରେ ବିନା ଲାଇସେନ୍ସରେ କୁକୁରଙ୍କ ବଂଶ ବିସ୍ତାର କରାଇ ଆସୁଛନ୍ତି । ତେବେ ଏଥିପାଇଁ କାହାର ଅନୁମତିର ଦରକାର ନାହିଁ ବୋଲି ସେ କହିଛନ୍ତି ।
ଭୁବନେଶ୍ୱରରେ ଗୋଟେ ପୋଷା କୁକୁର ଗୋଟେ ଛୁଆକୁ କାମୁଡିବା ପରେ କୁକୁର ପୋଷିବା ନେଇ ତେଜିଛି ବିବାଦ । ଆଉ ଏହାର ଭିତରେ କୁକୁର ରଖିବା ଆଳରେ ବେଆଇନ କୁକୁର ରଖିବା ଓ ବଂଶ ବିସ୍ତାର କରି ତାକୁ ବିକ୍ରି କରୁଥିବା ଅନେକ ବେପାରୀଙ୍କ କାରନାମା ବି ସାମ୍ନାକୁ ଆସୁଛି ।