ୟୁଏନଏସସି ବୈଠକରେ ଆତଙ୍କବାଦକୁ ନେଇ କଡା ଆଭିମୁଖ୍ୟ ସ୍ପଷ୍ଟକଲେ ଏସ୍ ଜୟଶଂକର, କହିଲେ ସୋସିଆଲ ମିଡିଆକୁ ହତିଆର କରୁଛନ୍ତି ଆତଙ୍କବାଦୀ
କନକ ବ୍ୟୁରୋ : ମାନବଜାତି ପାଇଁ ଆତଙ୍କବାଦ ସବୁଠୁ ବଡ ବିପଦ । ଏସିଆ ଓ ଆଫ୍ରିକାରେ ବଢୁଛି ଆତଙ୍କବାଦୀ କାର୍ଯ୍ୟକଳାପ । ସୋସିଆଲ ମିଡିଆକୁ ହତିଆର କରୁଛନ୍ତି ଆତଙ୍କବାଦୀ । ପାକିସ୍ତାନକୁ ଗ୍ରେ ଲିଷ୍ଟରୁ ବାହାର କରିବା ପରେ ଆତଙ୍କବାଦ କାର୍ଯ୍ୟକଳା ବୃଦ୍ଧି ପାଇଛି । ୟୁଏନଏସସି ବୈଠକରେ ଏଭଳି କିଛି ପ୍ରସଙ୍ଗ ଉଠାଇ ଚିନ୍ତା ପ୍ରକଟ କରିଛି ଭାରତ । ଭାରତୀୟ ବୈଦେଶିକମନ୍ତ୍ରୀ ଏସ ଜୟଶଙ୍କର ଆତଙ୍କବାଦ ପ୍ରସଙ୍ଗ ଉଠାଇ ପାକିସ୍ତାନ ଓ ଚୀନ ଉପରେ ବର୍ଷିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମିଳିତ ଜାତିସଂଘ ସୁରକ୍ଷା ପରିଷଦର ଆତଙ୍କବାଦ ନିରୋଧୀ ସମ୍ମିଳନୀରେ ଏଭଳି କିଛି କଥା କହି ଚିନ୍ତା ପ୍ରକଟ କରିଛି ଭାରତ । ଭାରତୀୟ ବୈଦେଶିକମନ୍ତ୍ରୀ ଏସ ଜୟଶଙ୍କର କହିଛନ୍ତି ଆତଙ୍କବାଦ କେବଳ କିଛି ନିଦ୍ଧିଷ୍ଟ ଦେଶମାନଙ୍କ ପାଇଁ ନୁହେଁ ସାରା ବିଶ୍ୱ ପାଇଁ ବଡ ବିପଦ । ବୈଦେଶିକମନ୍ତ୍ରୀ ଚୀନ ଓ ପାକିସ୍ତାନକୁ ଟାର୍ଗେଟ କରି ଏକଥା ମଧ୍ୟ କହିଛନ୍ତି କି ମିଳିତ ଜାତିସଂଘ ଆତଙ୍କବାଦୀଙ୍କ ଉପରେ ରୋକ ଲଗାଇବା ପାଇଁ ସମସ୍ତ ଚେଷ୍ଟା କରୁଛନ୍ତି । କିନ୍ତୁ କିଛି ରାଷ୍ଟ୍ରମାନଙ୍କର ଦୋମୁହାଁ ନୀତି ପାଇଁ ଏହା ସମ୍ପୂର୍ଣ୍ଣଭାବେ ସଫଳ ହୋଇପାରୁନି । ସମ୍ମିଳନୀରେ ଜୟଶଙ୍କର କିଛି ଗୁରୁତ୍ୱପୂର୍ଣ୍ଣ କଥା ଉପରେ ଆଲୋକପାତ କରିଛନ୍ତି ।
ଆତଙ୍କବାଦ ଉପରେ ବର୍ଷିଲେ ବୈଦେଶିକମନ୍ତ୍ରୀ:
• ଅତ୍ୟାଧୁନିକ ହତିଆର ଓ ଡ୍ରୋନ୍ ବ୍ୟବହାର କଲେଣି ଆତଙ୍କବାଦୀ
• ନିଜର କ୍ଷମତା ବୃଦ୍ଧି କରୁଛନ୍ତି ଆତଙ୍କବାଦୀ
• ପାକିସ୍ତାନ କରୁଛି ଟେରର ଫଣ୍ଡିଙ୍ଗ୍
• ସୋସିଆଲ ମିଡିଆକୁ ହତିଆର କରିଛି ଆତଙ୍କୀ ସଂଗଠନ
• କ୍ରମଶ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ପାଉଛି
• ଏସିଆ-ଆଫ୍ରିକାରେ ସବୁଠୁ ଅଧିକ ଆତଙ୍କ କାର୍ଯ୍ୟକଳାପ ବୃଦ୍ଧି ହେଉଛି
• ପାକିସ୍ତାନ ଗ୍ରେ ଲିଷ୍ଟରୁ ବାହାରିବା ପରେ ଆତଙ୍କବାଦ କାର୍ଯ୍ୟକଳାପ ବୃଦ୍ଧି ଆଶଙ୍କା
• ଚୀନ ଓ ପାକର ଦୋମୁହାଁ ନୀତି ଆତଙ୍କବାଦକୁ ପ୍ରୋତ୍ସାହିତ କରୁଛି
ଭାରତୀୟ ବୈଦେଶିକମନ୍ତ୍ରୀ ଏକଥା ମଧ୍ୟ କହିଛନ୍ତି କି ଆତଙ୍କବାଦ ବିରୋଧୀ ଲଢେଇରେ ସବୁ ରାଷ୍ଟ୍ରଙ୍କୁ ଏକାଠି ହେବାକୁ ପଡିବ । ଏମାନଙ୍କ ବିରୋଧରେ ଲଢେଇ ସବୁ ଦେଶମାନଙ୍କ ପାଇଁ ପ୍ରାଥମିକତା ହେବା ଉଚିତ । ପାକିସ୍ତାନ ସହ ଚୀନକୁ ପରୋକ୍ଷ ଭାବେ ଭାରତ ସମାଲୋଚନା କରିଛି । ମିଳିତ ଜାତିସଂଘ କିଛି କୁଖ୍ୟାତ ଆତଙ୍କବାଦୀଙ୍କୁ ବ୍ଲାକଲିଷ୍ଟ ଓ ଅର୍ନ୍ତଜାତୀୟ ଆତଙ୍କବାଦୀ ଭାବେ ଘୋଷଣା କରିବା ପାଇଁ ଯୋଜନା କରୁଛି କିନ୍ତୁ କିଛି ରାଷ୍ଟ୍ର ଏଥିରେ ପ୍ରତିବନ୍ଧକ ସାଜୁଥିବା କହିଛି ଭାରତ ।
ଆତଙ୍କବାଦ ବିରୋଧୀ ଲଢେଇ ପାଇଁ ସମ୍ମିଳନୀରେ ବଡ ଘୋଷଣା କରିଛି ଭାରତ । ମିଳିତ ଜାତିସଂଘ ସୁରକ୍ଷା ପରିଷଦର ସଦସ୍ୟମାନଙ୍କ ଭିତରେ କାଉଁଟର ଟେରୋରିଜିମ କମିଟି ସମ୍ମିଳନୀ ଦୁଇଦିନ ଧରି ଚାଲିବା ପରେ ଶନିବାର ଶେଷ ହୋଇଛି । ଆତଙ୍କବାଦୀଙ୍କ ମୂଳପୋଛ ପାଇଁ ୟୁଏନକୁ ଭାରତ ୫ଲକ୍ଷ ଡଲାର ଆର୍ଥିକ ସହାୟତା ଦେବ ବୋଲି ଘୋଷଣା କରିଛି ।
ଭାରତ ପ୍ରଥମ ଥର ପାଇଁ ମିଳିତ ଜାତିସଂଘର ଆତଙ୍କବାଦ ନିରୋଧୀ ସମ୍ମିଳନୀର ଆୟୋଜନ କରିଛି । ସମ୍ମିଳନୀରେ ବିଭିନ୍ନ ଦେଶର ବୈଦେଶିକ ଓ ପ୍ରତିରକ୍ଷାମନ୍ତ୍ରୀ ଯୋଗ ଦେଇ ଆତଙ୍କବାଦ ବିରୋଧୀ ଲଢେଇରେ ନିଜ ସହମତି ପ୍ରକାଶ କରିଛନ୍ତି ।