ଖାଲିସ୍ତାନୀ ଆତଙ୍କବାଦୀ ନିଜ୍ଜର ହତ୍ୟା ଘଟଣା । କାନାଡାକୁ ପାଠ ପଢାଇଲେ ଏସ୍. ଜୟଶଙ୍କର, ‘ଫାଇବ୍ ଆଇଜ୍ ଆଲାଆନ୍ସ’ଙ୍କୁ କଲେ ଟାର୍ଗେଟ୍
କନକ ବ୍ୟୁରୋ : ଖଲିସ୍ତାନୀ ଆତଙ୍କବାଦୀ ନିଜ୍ଜର ହତ୍ୟା ପରଠାରୁ ଭାରତ-କାନାଡା ଭିତରେ ସୃଷ୍ଟି ହୋଇଥିବା ତିକ୍ତତା ଦିନକୁ ଦିନ ଉକ୍ରଟ ହେବାରେ ଲାଗିଛି । ଏହାରି ଭିତରେ ମିଳିତ ଜାତିସଂଘରୁ କାନାଡା ଓ ଫାଇବ୍ ଆଇଜ୍ ଆଲାଆନ୍ସକୁ ଜୋରଦାର ଟାର୍ଗେଟ କରିଛନ୍ତି ବୈଦେଶିକ ମନ୍ତ୍ରୀ ଏସ୍.ଜୟଶଙ୍କର । ସେ କହିଛନ୍ତି – ‘କିଛି ନିର୍ଦ୍ଧିଷ୍ଟ ରାଷ୍ଟ୍ରଙ୍କ ଏଜେଣ୍ଡାରେ ଆଉ ବିଶ୍ୱ ଚାଲିବ ନାହିଁ । ଯେଉଁମାନେ ନିଜ ଏଜେଣ୍ଡାରେ ବିଶ୍ୱକୁ ଚଳାଇବାକୁ ଚାହୁଁଛନ୍ତି ସେମାନଙ୍କ ଦିନ ଶେଷ ହୋଇଯାଇଛି । ଭାରତ ବିଭିନ୍ନ ଦେଶ ସହ ସହଭାଗିତାରେ ବିଶ୍ୱର ବିକାଶ ଦିଗରେ କାର୍ଯ୍ୟ କରୁଛି ।’
Kanak News is now on WhatsApp
Join and get latest news updates delivered to you via WhatsApp
ଭାରତ ବିରୋଧରେ ସାଂଘାତିକ ଅଭିଯୋଗ ଆଣିଥିଲେ କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡ୍ୟୁ । ନିଜ୍ଜରଙ୍କ ହତ୍ୟାରେ ଭାରତୀୟ ଏଜେଂଟଙ୍କ ହାତ ଥିବା କାନାଡ଼ା ଅଭିଯୋଗ କରୁଥିବା ବେଳେ ଏହାକୁ ଭାରତ ଖଣ୍ଡନ କରିଛି । ଏହାରି ଭିତରେ କାନାଡାରେ ଖାଲିସ୍ତାନୀ ସମର୍ଥକଙ୍କ ଆନ୍ଦୋଳନ, ପ୍ରବାସୀ ଭାରତୀୟଙ୍କୁ ଧମକ୍ ନେଇ ବର୍ଷିଛନ୍ତି ଜୟଶଙ୍କର । ଜଷ୍ଟିନ୍ ଟ୍ରୁଡୁ ସରକାରଙ୍କୁ ଲକ୍ଷ୍ୟ କରି କହିଛନ୍ତି ଯେ, କାନାଡ଼ାରେ ଏବେ ଏମିତି ସ୍ଥିତି ହୋଇଛି ଯେ, ଭାରତୀୟ କୂଟନୀତିଜ୍ଞମାନଙ୍କୁ ଧମକ ଦିଆଯାଉଛି । ଦୂତାବାସକୁ ଆକ୍ରମଣ କରାଯାଉଛି । ସବୁଠୁ ବଡ଼ ଆଶ୍ଚର୍ଯ୍ୟ କଥା ହେଲା, ଏସବୁ ଗଣତନ୍ତ୍ରରେ ଘଟେ ବୋଲି କୁହାଯାଉଛି । ଏସବୁ ଦିଗ ପ୍ରତ କାନାଡ଼ା ସରକାର ଦୃଷ୍ଟି ଦେବା ଉଚିତ୍ ।
ନିଜ୍ଜର ହତ୍ୟାକୁ ନେଇ ଭାରତ ଉପରେ କାନାଡା ଦୋଷ ଲଦୁଥିବାବେଳେ ସାମ୍ନାକୁ ଆସିଛି ଚାଂଚଲ୍ୟକର ତଥ୍ୟ । ହରଦୀପ ସିଂହ ନିଜ୍ଜରକୁ ହତ୍ୟା କରି ଭାରତ ଉପରେ ଦୋଷ ଲଦିବାକୁ ଷଡଯନ୍ତ୍ର ରଚିଥିଲା ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସ୍ଆଇ । ଏଥିରେ ଭାରତର ଛବି ପ୍ରଭାବିତ ହେବା ସହ ଭାରତ-କାନାଡା ସମ୍ପର୍କରେ ବି ଫାଟ ସୃଷ୍ଟି ହେବ ବୋଲି ଷଡଯନ୍ତ୍ର କରିଥିଲା ପାକ୍ ଗୁଇନ୍ଦା ସଂସ୍ଥା । ।
ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରକୁ କାନାଡ଼ାର ବ୍ରିଟିଶ କଲମ୍ବିଆ ପ୍ରଦେଶରେ ଜୁନ୍ ୧୮ରେ ହତ୍ୟା କରାଯାଇଥିଲା । ୨ଟି ବାଇକରେ ଆସି ୬ ଜଣ ନିଜ୍ଜର ଉପରେ ଗୁଳିଚଳାଇଥିଲେ, ଫଳରେ ତାର ମୃତ୍ୟୁ ହୋଇଥିଲା । ତେବେ ଏଥିରେ ଭାରତୀୟ ଏଜେଂଟଙ୍କ ହାତ ଥିବା କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୁ ଅଭିଯୋଗ କରିବା ପରେ ଦୁଇ ଦେଶ ମଧ୍ୟରେ ଏକ ବଡ଼ ବିବାଦ ସୃଷ୍ଟି ହୋଇଛି ।