ମାଗଣା ଟିକା ଦାନ ପରେ ମଧ୍ୟ ୨୨% ନେଇଛନ୍ତି ପ୍ରିକସନ ଡୋଜ୍। ସାମ୍ନାକୁ ଆସିଛି ଏଭଳି କିଛି ତଥ୍ୟ।
କନକ ବ୍ୟୁରୋ: ଭାରତ ସରକାର ଜୁଲାଇ ୧୫ରୁ ସବୁ ବୟସ ବର୍ଗର ଲୋକଙ୍କ ପାଇଁ କରୋନାର ଟିକାକୁ ପ୍ରିକସନ ଡୋଜକୁ ମାଗଣା ଦେବାକୁ ଘୋଷଣା କରିଥିଲେ । ଏହା ୭୫ ଦିନିଆ ଅଭିଯାନ ଭାବେ ସାରା ଦେଶରେ ଆରମ୍ଭ ହୋଇଥିଲା । ଏହି ଅଭିଯାନ ଜରିଆରେ ୧୮ରୁ ୫୯ ବର୍ଷୀୟ ଲୋକଙ୍କୁ ପ୍ରିକସନ ଡୋଜ ଦିଆଯାଇଥିଲା । ୭୫ଦିନିଆ ଅଭିଯାନର ଶେଷ ତାରିଖ ରହିଛି ସେପ୍ଟେମ୍ବର ୩୦ । ତେବେ ସରକାରଙ୍କ ମାଗଣା ପ୍ରିକସନ ଡୋଜ ଦେବା ପରେ ମଧ୍ୟ ଏହା ନେବାରେ ଲୋକଙ୍କ ମଧ୍ୟରେ ଆଗ୍ରହ ନଥିବା ଦେଖିବାକୁ ମିଳିଛି । ଆଶା କରାଯାଉଥିଲା ଯେ ଲୋକେ ଉତ୍ସାହିତ ହୋଇ ଟିକା ନେବେ କିନ୍ତୁ ଏହା ଦେଖିବାକୁ ମିଳିନଥିଲା ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ଦେଶରେ ଏତେ ବଡ ଅଭିଯାନ ପରେ ମଧ୍ୟ ମାତ୍ର ୨୨.୨୪ ପ୍ରତିଶତ ଲୋକହିଁ ପ୍ରିକସନ ଡୋଜ ନେଉଛନ୍ତି । ସେହିଭଳି ୬୦ ବର୍ଷ ବର୍ଗଙ୍କ ଲୋକଙ୍କ ତୁଳନା ଯଦି ୧୮ରୁ ୫୯ ବର୍ଷ ବୟସ୍କଙ୍କ ସହ କରାଯାଏ ତେବେ ସେମାନେ ବହୁତ ଆଗରେ ରହିଛନ୍ତି । ୬୦ ବର୍ଷରୁ ଅଧିକ ବ୍ୟକ୍ତି ଯୁବବର୍ଗ ଠାରୁ ଅଧିକ ପ୍ରିକସନ ଡୋଜ ନେଉଛନ୍ତି । ୧୮ରୁ ୫୯ ବର୍ଷ ମଧ୍ୟରେ ୭୭ କୋଟି କରୋନା ଟିକା ନେଇଥିବା ବେଳେ ୧୭.୫୮ ପ୍ରତିଶତ ପ୍ରିକସନ ଡୋଜ ନେଇଛନ୍ତି । ସେହିଭଳି ୬୦ ବର୍ଷରୁ ଅଧିକ ଲୋକଙ୍କ ମଧ୍ୟରେ ୧୩.୭ କୋଟି ପ୍ରିକସନ ଡୋଜ୍ ନେଇଥିବା ବେଳେ ଏହା ୪୮.୫ ପ୍ରତିଶତ ରହିଛି ।
ବୟସ୍କଙ୍କ ପାଇଁ ପ୍ରି ଭ୍ୟାକସିନେସନ ଡ୍ରାଇଭ ଆରମ୍ଭ ହେବା ପୂର୍ବରୁ ଜୁଲାଇ ମଧ୍ୟଭାବ ପର୍ଯ୍ୟନ୍ତ ୧୮ରୁ ୫୯ ବର୍ଷୀୟ ବ୍ୟକ୍ତିଙ୍କ ପ୍ରିକସନ ଡୋଜ ନେବାର ହାର ୮ ପ୍ରତିଶତ ଥିଲା । ସେହିଭଳି ୬୦ ବର୍ଷରୁ ଅଧିକ ବ୍ୟକ୍ତିଙ୍କ ହାର ୨୭ ପ୍ରତିଶତ ଥିଲା । ଯେବେଠାରୁ ମାଗଣା ଟିକାଦାନ ପ୍ରକ୍ରିୟା ଆରମ୍ଭ ହେଲା ସେବେଠାରୁ ବର୍ତ୍ତମାନ ଯାଏ ୧୪.୬ କୋଟି ପ୍ରିକସନ ଡୋଜ ଦିଆଯାଇଛି ଏଥିରୁ ୧୨.୭ କୋଟି ଟିକା ୧୮ରୁ ୫୯ ବର୍ଷୀୟ ବ୍ୟକ୍ତି ନେଇଛନ୍ତି । ଭାରତରେ ବର୍ତ୍ତମାନ ସୁଦ୍ଧା ୨୦.୪୪ କୋଟି ପ୍ରିକସନ ଡୋଜ ପ୍ରଦାନ କରାଯାଇଛି ।