କନକ ବ୍ୟୁରୋ : ଆଉମାତ୍ର କେତେ ଘଣ୍ଟା ପରେ ଗୁଜରାଟର ଜଖାଓ ଠାରେ ଲ୍ୟାଣ୍ଡଫଲ କରିବାକୁ ଯାଉଛି । ହେଲେ ଏବେଠାରୁ ସମୁଦ୍ର ଭିତରେ ୨ରୁ ୩ମିଟର ଉଚ୍ଚରେ ଲହଡି ଉଠିବା ସହ ପ୍ରବଳ ବର୍ଷା ଆରମ୍ଭ ହୋଇଯାଇଛି । ବିପର୍ଯ୍ୟୟ ଗୁଜରାଟରୁ ଏବେ ୧୮୦ କିଲୋମିଟର ଦୂରରେ ରହିଛି । ହେଲେ ଏବେଠାରୁ ଗୁଜରାଟର କଚ୍ଛ, ମାଣ୍ଡବୀ ସମେତ ଅନେକ ଅଞ୍ଚଳରେ ତୀବ୍ର ଗତିରେ ପବନ ଆରମ୍ଭ ହୋଇଯାଇଛି । ପାଣିପାଗ ବିଭାଗର ସୂଚନା ମୁତାବକ ଏହି ବାତ୍ୟା ଅତ୍ୟାଧିକ ଶକ୍ତିଶାଳୀ । ବିପର୍ଯ୍ୟୟ ଗୁଜରାଟର କଚ୍ଛ ନିକଟରେ ଥିବା ଜଖାଓ ବନ୍ଦର ନିକଟରେ ଲ୍ୟାଣ୍ଡଫଲ କରିବା ପରେ ସେଠାରେ ଅନେକ କ୍ଷତି ଘଟାଇବ । ଏହାପରେ ମୁମ୍ବାଇରେ ବି ଏହାର ପ୍ରଭାବ ଦେଖିବାକୁ ମିଳିବ ।
Kanak News is now on WhatsApp
Join and get latest news updates delivered to you via WhatsApp
ବିପର୍ଯ୍ୟୟ ଯେତେବେଳେ ଜଖାଓ ବନ୍ଦର ନିକଟରେ ଲ୍ୟାଣ୍ଡଫଲ କରିବ ସେତେବେଳେ ପବନର ବେଗ ଘଣ୍ଟା ପ୍ରତି ୧୫୦ କିଲୋମିଟରରୁ ଅଧିକ ରହିବ ବୋଲି ପୂର୍ବାନୁମାନ କରାଯାଉଛି । ଲ୍ୟାଣ୍ଡଫଲ ପୂର୍ବରୁ ବାତ୍ୟା ବିପର୍ଯ୍ୟୟର ପ୍ରଭାବ ଗୁଜରାଟର କଚ୍ଛ, ଦେବଭୂମୀ ଦ୍ୱାରକା ଓ ଜାମନଗର ଅଞ୍ଚଳରେ ଅଧିକ କ୍ଷତି କରିବ ।
ସେପଟେ ବାତ୍ୟା ବିପର୍ଯ୍ୟୟକୁ ଦୃଷ୍ଟିରେ ରଖି ଗୁଜରାଟ ସରକାର ୭୪ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛନ୍ତି । କେବଳ କଚ୍ଛ ଜିଲ୍ଲାରୁ ୩୪ ହଜାରରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି । ସେପଟେ ଦ୍ୱାରକାରେ ଥିବା ଦ୍ୱାରକାଧୀଶ ମନ୍ଦିର ଓ ଗିର ସୋମନାଥ ମନ୍ଦିର ଗୁରୁବାର ଦିନ ଭକ୍ତଙ୍କ ପାଇଁ ବନ୍ଦ କରାଯାଇଛି ।
ଅନ୍ୟପଟେ ବାତ୍ୟା ସହିତ ଜଡିତ ବିପଦକୁ ନଜରରେ ରଖି ସରକାରଙ୍କ ତରଫରୁ ଏକ କଣ୍ଟ୍ରୋଲ ରୁମର ବ୍ୟବସ୍ଥା କରାଯାଇଛି । ସେପଟେ ଗୁଜରାଟର ୩୩ ଟି ଜିଲ୍ଲା ପାଇଁ ହେଲ୍ପ ଲାଇନ ନମ୍ବର ଜାରି କରାଯାଇଛି । ଏହାସହ ଲୋକଙ୍କୁ ସହାୟତା ଯୋଗାଇ ଦେବାକୁ ଏନଡିଆରଏଫର ଗୁଜରାଟ ଓ ମହାରାଷ୍ଟ୍ର ଟିମକୁ ନିୟୋଜିତ କରାଯାଇଛି । ଏନଡିଆରଏଫର ୧୮ ଟି ଟିମ୍ ଗୁଜରାଟରେ ନିୟୋଜିତ ହୋଇଥିବା ବେଳେ ଗୋଟିଏ ଟିମ ଦାଦର ନଗର ହବେଳୀ, ଦମନ ଓ ଡିଓରେ ନିୟୋଜିତ କରାଯାଇଛି ।