ବଢ଼ୁଛି ରାହୁଲ ଗାନ୍ଧୀଙ୍କ ଲୋକପ୍ରିୟତା : ପ୍ରଧାନମନ୍ତ୍ରୀ ଭାବେ ମୋଦୀଙ୍କୁ ଦେଖିବାକୁ ଚାହାନ୍ତି ୪୩ ଓ ରାହୁଲଙ୍କୁ ୨୭% ଲୋକ
କନକ ବ୍ୟୁରୋ : ବଢୁଛି ରାହୁଲ ଗାନ୍ଧୀଙ୍କ ଲୋକପ୍ରିୟତା । ଗତ କିଛି ଦିନ ଭିତରେ ରାହୁଲ ଗାନ୍ଧୀ ରାଜନୀତିରେ ଏମିତି ପରିପକ୍ୱ ଆଚରଣ ଦେଖାଇଛନ୍ତି ଯେ ତାଙ୍କର ଗ୍ରହଣୀୟତା ବଢିଯାଇଛି । ଭାରତ ଯୋଡ ଯାତ୍ରାରେ ପ୍ରାୟ ସାଢେ ୩ ହଜାର ୫୦୦ କିଲୋମିଟର ବୁଲିବା ପରେ ପରେ ଲୋକଙ୍କ ଭିତରେ ରାହୁଲଙ୍କ ଛବି ଉଜ୍ଜଳ ହୋଇଛି । ଦ୍ୱିତୀୟରେ ରାହୁଲ ଗାନ୍ଧୀଙ୍କ ସାଂସଦ ପଦ ରଦ୍ଦ ହେବା ଓ ସେ ସରକାରୀ ଘର ଛାଡିବା ଲୋକଙ୍କ ଭିତରେ ଏକ ଅନୁକମ୍ପା ତିଆରି କରିଛି ।
Kanak News is now on WhatsApp
Join and get latest news updates delivered to you via WhatsApp
ତୃତୀୟରେ କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସ ବିଜୟୀ ହେବା ଏବଂ ପ୍ରଚାର ବେଳେ ଲୋକଙ୍କ ସହିତ ବୁଲିବା ଆଦି ଘଟଣା ରାହୁଲଙ୍କ ଗ୍ରହଣୀୟତାକୁ ବଢାଇ ଦେଇଛି । ଲୋକନୀତି-ସେଣ୍ଟର ଫର୍ ଦ ଷ୍ଟଡି ଅଫ୍ ଡେଭ୍ଲପିଂ ସୋସାଇଟିଜର ସହଯୋଗରେ ଏନ୍ଡିଟିଭି ଦ୍ୱାରା କରାଯାଇଥିବା ଏହି ସ୍ୱତନ୍ତ୍ର ଜନମତ ସର୍ଭେରୁ ଜଣାପଡ଼ିଛି ଯେ ପ୍ରଧାନମନ୍ତ୍ରୀ ପଦ ପାଇଁ ନରେନ୍ଦ୍ର ମୋଦୀ ସର୍ବାଧିକ ସଂଖ୍ୟକ ଭାରତୀୟଙ୍କର ପ୍ରଥମ ପସନ୍ଦ । ଏହି ସର୍ଭେ ଅନୁଯାୟୀ କଂଗ୍ରେସ ନେତା ରାହୁଲ ଗାନ୍ଧିଙ୍କର ଲୋକପ୍ରିୟତା ବଢ଼ୁଥିଲେ ମଧ୍ୟ ମୋଦୀ ତଥାପି ଅପ୍ରତିଦ୍ୱନ୍ଦ୍ୱୀ ରହିଛନ୍ତି ।ବିଜେପିର ଭୋଟ ଭାଗ ୨୦୧୯ରେ ଥିବା ୩୭ ପ୍ରତିଶତ ଅପେକ୍ଷା ୨୦୨୩ରେ ୩୯ ପ୍ରତିଶତକୁ ବୃଦ୍ଧି ପାଇଛି ।
ସେହିପରି କଂଗ୍ରେସର ଭୋଟ ଭାଗ ୨୦୧୯ରେ ଥିବା ୧୯ ପ୍ରତିଶତରୁ ୨୦୨୩ରେ ୨୯ ପ୍ରତିଶତକୁ ବୃଦ୍ଧି ପାଇଛି । ୪୩ ପ୍ରତିଶତ ଲୋକ କହିଥିଲେ, ଯଦି ଆଜି ନିର୍ବାଚନ ହୁଏ, ତେବେ ନରେନ୍ଦ୍ର ମୋଦୀଙ୍କୁ ସେମାନେ ପୁନଶ୍ଚ ପ୍ରଧାନମନ୍ତ୍ରୀ ଭାବେ ଦେଖିବାକୁ ଚାହାନ୍ତି । ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ରାହୁଲ ଗାନ୍ଧିଙ୍କୁ ଏହି ପଦ ପାଇଁ ୨୭ ପ୍ରତିଶତ ଲୋକ ପସନ୍ଦ କରିଥିଲେ । ସର୍ବୋଚ୍ଚ ପଦ ପାଇଁ ଲୋକଙ୍କ ପସନ୍ଦରେ ଅନ୍ୟ ନେତାମାନେ ବହୁତ ପଛରେ ଅଛନ୍ତି ।