ବାଘ ଆତଙ୍କରେ ଥରହର ସୁନାବେଡ଼ା ଅଭୟାରଣ୍ୟ : ନଜର ରଖିବାକୁ ଲାଗିଲା ଆଉ ତିନୋଟି କ୍ୟାମେରା; ଏଯାଏଁ ଉଠିପାରୁନି ବାଘର ଫଟୋ
କନକ ବ୍ୟୁରୋ : ବାଘ ଆତଙ୍କରେ ଥରହର ନୂଆପଡ଼ା ଜିଲ୍ଲା ସୁନାବେଡ଼ା ଅଭୟାରଣ୍ୟ ଅଂଚଳବାସୀ । ବାରମ୍ବାର ବାଘ ଆତଙ୍କର ଖବର ଆସୁଥିବାବେଳେ ସ୍ଥାନୀୟ ଲୋକେ ଏନେଇ ଭୟଭୀତ ଅଛନ୍ତି । ଫଳରେ ଦିନ ସମୟରେ ମଧ୍ୟ ଲୋକଙ୍କ ତାଟି କବାଟ ବନ୍ଦ ରହୁଛି । ତେବେ ବାଘର ଟ୍ରାକିଂ ପାଇଁ ପୂର୍ବରୁ ୧୦ ଟି କ୍ୟାମେରା ଲାଗିଥିବାବେଳେ ଏବେ ଆଉ ତିନୋଟି କ୍ୟାମେରା ଲାଗିଛି । ହେଲେ ଏଯାଏଁ ବନ ବିଭାଗ ବାଘର ଫଟୋ ପାଇନଥିବା କହିଛି ।
Kanak News is now on WhatsApp
Join and get latest news updates delivered to you via WhatsApp
ଅଭୟାରଣ୍ୟର ଭିନ୍ନ ଭିନ୍ନ ଅଞ୍ଚଳରେ ଗୋଟିଏ ବାଘ ଏବଂ ବାଘୁଣୀ ଲଗାତର ଭାବେ ଜନବସତି ଉପରେ ଆକ୍ରମଣ କରୁଥିବା ଜଣାପଡ଼ିଛି । ଗତ ୧୯ ତାରିଖ ରାତିରେ ଅଭୟାରଣ୍ୟର କୋମନା ବ୍ଲକ ଜଳମଡ଼ାଇ ଗାଁରେ ଜଣେ ବୃଦ୍ଧାଙ୍କୁ ଘର ପଛପଟୁ ବାଘ ଟାଣିନେଇ ଖାଇଯାଇଥିଲା । ଏହି ଭୟ ମନରୁ ଲିଭି ନଥିବାବେଳେ ଗତକାଲି ତରିଆମହୁଆଭଟ୍ଟା ଗାଁର ମୁଷରଙ୍ଗୀ ଜଙ୍ଗଲରୁ ଚାଲିଆସିଥିବା ବାଘୁଣୀ ଗୋଟିଏ ବାଛୁରୀକୁ ଟାଣି ନେଇଛି ।
ଜଳମଡ଼ାଇରେ ବାଘ ଓ ତରିଆ ମହୁଆଭଟ୍ଟାରେ ବାଘୁଣୀ ମାତିଥିବାରୁ ଲୋକମାନେ ଖୁବ ଭୟଭୀତ ଅଛନ୍ତି । ଉଭୟ ଅଞ୍ଚଳରେ ମୋଟ ୧୩ଟି କ୍ୟାମେରା ଲଗାଇ ସ୍ଥିତି ଉପରେ ନଜର ରଖିଛି ବନ ବିଭାଗ । ହେଲେ ବାଘକୁ ଟ୍ରାକ କରିବା ଓ ଲୋକଙ୍କୁ ସୁରକ୍ଷା ଦେବାରେ ବନ ବିଭାଗ ବିଫଳ ହୋଇଛି । ବନ ବିଭାଗର ବିଫଳତା ଯୋଗୁଁ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରି ତୁରନ୍ତ ବାଘକୁ ଘଉଡ଼ାଇ ଗ୍ରାମବାସୀଙ୍କୁ ସୁରକ୍ଷା ଦେବାକୁ ଦାବି କରିଛନ୍ତି ।