କନକ ବ୍ୟୁରୋ : କେନ୍ଦୁଝରର ମାଗୁଣି ଚରଣ କୁଅଁରଙ୍କୁ ମିଳିଲା ପଦ୍ମଶ୍ରୀ । କଣ୍ଢେଇ ନାଚ ଗୁରୁ ମାଗୁଣି କୁଅଁରଙ୍କୁ ରାଷ୍ଟ୍ରପତି ପୁରସ୍କୃତ କରି ଶୁଭେଚ୍ଛା ଜଣାଇଛନ୍ତି । ଏହା ଏକ ଦୁର୍ଲଭ ପୁରସ୍କାର, ଭାଗ୍ୟରେ ଥିଲେ ମିଳେ ବୋଲି କହିଛନ୍ତି ମାଗୁଣି କୁଅଁର । ପୂର୍ବରୁ ସେ କଣ୍ଢେଇ ନାଚ ପାଇଁ ରାଷ୍ଟ୍ରପତି ପୁରସ୍କାର ସହ ରାଜ୍ୟ ତଥା ରାଜ୍ୟ ବାହାରୁ ଅନେକ ସମ୍ମାନ ଓ ପ୍ରଶଂସା ପାଇଛନ୍ତି । ଓଡ଼ିଶା ଓ କେନ୍ଦ୍ର ସଙ୍ଗୀତ ନାଟକ ଏକାଡେମୀ ପୁରସ୍କାର ସହ ୨୦୧୨ ମସିହାରେ ଓଡ଼ିଶା ସଂଗୀତ ନାଟକ ଏକାଡେମୀର ସର୍ବୋଚ୍ଚ ସମ୍ମାନ ‘କବି ସମ୍ରାଟ ଉପେନ୍ଦ୍ର ଭଞ୍ଜ ସମ୍ମାନ’ ପାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦୁଝର ପୁରୁଣା ବଜାରର ମାଗୁଣି କୁଅଁର ୧୫ ବର୍ଷ ବୟସରୁ କଣ୍ଢେଇ ନାଚ ପ୍ରଦର୍ଶିତ କରି ବହୁ ସମ୍ମାନ ସାଉଁଟିଛନ୍ତି । କଣ୍ଢେଇ ନାଚକୁ ବିଶ୍ୱ ଦରବାରରେ ପହଂଚାଇବାରେ ସଫଳ ହୋଇଛନ୍ତି । ଏବେ ପଦ୍ମଶ୍ରୀ ପାଇଥିବାରୁ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତାଙ୍କୁ ଟ୍ୱିଟ୍ କରି ଶୁଭେଚ୍ଛା ଜଣାଇଛନ୍ତି । ସମାଜରେ ଲୁକ୍କାୟିତ କାଠ କଣ୍ଢେଇ ନାଚରେ ପୌରାଣିକ କାହାଣୀ ଚିତ୍ରଣ କରି ଲୋକକଳାକୁ ଉଜ୍ଜିବିତ କରିବାରେ ତାଙ୍କର ଅବଦାନ ପ୍ରଶଂସନୀୟ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ।
ରାଷ୍ଟ୍ରପତି ଭବନରେ ରାଷ୍ଟ୍ରପତି ଦୌପ୍ରଦୀ ମୁର୍ମୁ ପଦ୍ମ ସମ୍ମାନ ପ୍ରଦାନ କରିଛନ୍ତି । ବର୍ଷ ୨୦୨୩ ପାଇଁ ଏହି ସମ୍ମାନ ପ୍ରଦାନ କରାଯାଇଛି । ପୁରସ୍କାର ପାଇଥିବା ଚେହେରା ମଧ୍ୟରେ ୧୯ ଜଣ ମହିଳା ଅଛନ୍ତି । ଆଦିତ୍ୟ ଗ୍ରୁପର ଚେୟାରମ୍ୟାନ୍ ତଥା ବିଶିଷ୍ଟ ଶିଳ୍ପପତି ଶ୍ରୀ କୁମାର ମଙ୍ଗଲମ୍ ବିରଲାଙ୍କୁ ବ୍ୟବସାୟ କ୍ଷେତ୍ର ପାଇଁ ପଦ୍ମଭୁଷଣ ମିଳିଛି । ପଦ୍ମ ପୁରସ୍କାର ପାଇବାରେ କୁମାର ମଙ୍ଗଳମ ବିର୍ଲା ହେଉଛନ୍ତି ବିର୍ଲା ପରିବାରର ଚତୁର୍ଥ ବ୍ୟକ୍ତି ।
ମହାରାଷ୍ଟ୍ର ଲୋକପ୍ରିୟ ଗାୟିକା ସୁମନ କଲ୍ୟାଣପୁରଙ୍କୁ ପଦ୍ମଭୁଷଣ ସମ୍ମାନରେ ସମ୍ମାନିତ କରାଯାଇଛି । ସୁମନ କଲ୍ୟାଣପୁର ଜଣେ ପ୍ରସିଦ୍ଧ ଗାୟିକା । ଓଡିଆ, ହିନ୍ଦୀ ସମେତ ଅନେକ ଭାଷାରେ ସୁମନ କଲ୍ୟାଣପୁର ହଜାର ହଜାର ଗୀତ ଗାଇଛନ୍ତି । କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ପୂର୍ବତନ ବୈଦେଶିକ ମନ୍ତ୍ରୀ ଏସ.ଏମ,କ୍ରିଷ୍ଣାଙ୍କୁ ପଦ୍ମ ବିଭୂଷଣ ମିଳିଛି । ବିଶିଷ୍ଟ ନିବେଶକ ରାକେଶ ଝୁନଝୁନୱାଲଙ୍କୁ ମରଣୋତର ଭାବେ ପଦ୍ମଶ୍ରୀ ଦିଆଯାଇଛି । ପ୍ରଥମ ପର୍ଯ୍ୟାୟରେ ୩ ଜଣଙ୍କୁ ପଦ୍ମ ବିଭୂଷଣ, ୪ ଜଣଙ୍କ ପଦ୍ମଭୂଷଣ ଓ ୪୭ ଜଣଙ୍କୁ ପଦ୍ମଶ୍ରୀ ପ୍ରଦାନ କରାଯାଇଛି ।
ପଦ୍ମଶ୍ରୀ ସମ୍ମାନରେ ସମ୍ମାନିତ ହୋଇଛନ୍ତି ଗୁଜରାଟ ଜୁନାଗଡ଼ର ହୀରାବାଇ ଇବ୍ରାହିମ୍ ଲୋବି । ଆଫ୍ରିକାର ସିଦ୍ଦି ଆଦିବାସୀ ସଂପ୍ରଦାୟରୁ ଆସିଥିବା ଲୋବି ଭାରତରେ ସିଦ୍ଦି ସଂପ୍ରଦାୟର ଉତ୍ଥାନ ପାଇଁ ଅନେକ କାର୍ଯ୍ୟ କରିଛନ୍ତି । ଏପର୍ଯ୍ୟନ୍ତ ସେ ୭ ଶହ ସିଦ୍ଦି ମହିଳା ଓ ଶିଶୁଙ୍କ ଜୀବନରେ ପରିବର୍ତନ ଆଣିପାରିଛନ୍ତି ।
ସେଥିପାଇଁ ତାଙ୍କୁ ଏହି ସମ୍ମାନ ପାଇଁ ଚୟନ କରାଯାଇଥିଲା । ପଦ୍ମଶ୍ରୀ ସମ୍ମାନ ପାଇ ସେ ଯେତେବେଳେ ପ୍ରଧାନମନ୍ତ୍ରୀ ମୋଦୀଙ୍କ ଆଡକୁ ଯାଇଥିଲେ ମୋଦୀ ତାଙ୍କୁ ହାତଯୋଡି ଓ ମୁଣ୍ଡ ନୁଆଁଇ ପ୍ରଣାମ କରିଥିଲେ । ପାଖରେ ବସିଥିବା କେନ୍ଦ୍ରମନ୍ତ୍ରୀ ଅମିତ ଶାହ, ସ୍ମୃତି ଇରାନୀ ଏବଂ ଲୋକସଭା ବାଚସ୍ପତି ଓମ୍ ବିର୍ଲା ମଧ୍ୟ ଲୋବିଙ୍କୁ ନମସ୍କାର କରିଥିଲେ ।