ଡଙ୍କାରୀ ପାହାଡ଼ରେ ଲାଗିଲା ଲଗାମ । ବିଭିନ୍ନ ପ୍ରସଙ୍ଗକୁ ନେଇ ଦୀର୍ଘ ଧରି ଥିଲା ଚର୍ଚ୍ଚାରେ, ୪ ଖାଦାନ ବନ୍ଦ, ୧୪୪ ଧାରା ଲାଗୁ
କନକ ବ୍ୟୁରୋ : ଯାଜପୁର ଧର୍ମଶାଳାର ଡଙ୍କାରୀ ପାହାଡରେ ଥିବା ଖାଦାନ ଉପରେ ଚଢାଉ । ଗ୍ରୀନ୍ ଟ୍ରିବୁନାଲଙ୍କ ନିର୍ଦ୍ଦେଶରେ ଆଜି ଚଢ଼ାଉ କରି ୪ଟି ପଥର ଖାଦାନକୁ ବନ୍ଦ କରିଛି ଜିଲ୍ଲା ପ୍ରଶାସନ । ପରିବେଶ ପ୍ରଦୂଷଣକୁ ଆଧାର କରି ୧୬ଟି ଖାଦାନ ଉପରେ ଚଢ଼ାଉ କରାଯାଇଛି । ବଡ କଥା ହେଉଛି ଏହି ଡଙ୍କାରୀ ଖାଦାନକୁ ନେଇ ଡାକ୍ତର ଦାମ ରାଉତ ଦୁର୍ନୀତି ଅଭିଯୋଗ ଆଣିଥିବା ବେଳେ କେନ୍ଦ୍ର ସରକାରଙ୍କ ପକ୍ଷରୁ ଏହି ଅଂଚଳରେ ତୈଳ ସଂରକ୍ଷଣ କେନ୍ଦ୍ର ପାଇଁ ପ୍ରସ୍ତାବ ରହିଛି । ଆଉ ଏସବୁ ଭିତରେ କାର୍ଯ୍ୟାନୁଷ୍ଠାନକୁ ନେଇ ପ୍ରତିକ୍ରିୟା ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ବେଆଇନ ବ୍ଲାଷ୍ଟିଂ, ପ୍ରଦୁଷଣ ଏବଂ ଦୁର୍ନୀତି ଭଳି ଅନେକ ପ୍ରସଙ୍ଗକୁ ନେଇ ଚର୍ଚ୍ଚାରେ ଥିବା ଯାଜପୁର ଡଙ୍କାରୀ ପାହାଡ଼ ଉପରେ ଲଗାମ ଲଗାଇଛି ପ୍ରଶାସନ । ଜିଲ୍ଲାପାଳ ଏବଂ ଏସପି ଦଳବଳ ନେଇ ଆଜି ଡଙ୍କାରୀ ପାହାଡ଼ ଉପରେ ଚଢ଼ାଉ କରିଛନ୍ତି । ଆଉ ଲିଜରେ ଥିବା ୪ଟି ସଇରାତ ବା ଖାଦାନକୁ ବନ୍ଦ କରିବା ସହ ୧୬ଟି ବେଆଇନ ଖାଦାନ ଉପରେ ଚଢ଼ାଉ କରିଛନ୍ତି । ଏହା ସହ ଜାରି ହୋଇଛି ୧୪୪ ଧାରା । ଯାହାକୁ ବିରୋଧ କରିଛି ଖଣିଜ ପରିବହନ ସଂଘ ।
ଗତ ଅକ୍ଟୋବର ୫ରେ ଡଙ୍କାରୀରେ ପହଂଚିଥିଲା ଏନଜିଟି ଟିମ୍ । ବେଆଇନ ବ୍ଲାଷ୍ଟିଂ ଏବଂ ପରିବେଶ ପ୍ରଦୂଷଣର ଅଭିଯୋଗ ପାଇବା ପରେ ଡଙ୍କାରୀ ପାହାଡ଼ ପହଂଚି ସରଜମିନ୍ ତଦନ୍ତ କରିଥିଲା ଜାତୀୟ ଗ୍ରୀନ୍ ଟ୍ରିବୁନାଲର ଦୁଇ ଜଣିଆ ଟିମ୍ । ଆଉ ଏ ସଂପର୍କିତ ଶୁଣାଣି ପରେ କାର୍ଯ୍ୟାନୁଷ୍ଠାନ ପାଇଁ, ପ୍ରଶାସନକୁ ନିର୍ଦ୍ଦେଶ ଦେଇଥିଲା ଏନଜିଟି । ଆଉ ଆଜି କାର୍ଯ୍ୟାନୁଷ୍ଠାନ ପରେ ଏହାକୁ ବିରୋଧ କରିଛି କ୍ରସର ମାଲିକ ସଂଘ ।
ଏହି ଡଙ୍କାରୀ ପାହାଡ଼ ପ୍ରସଙ୍ଗ ସେତେବେଳେ ଜୋର ଧରିଥିଲା, ଯେତେବେଳେ ଏହାକୁ ନେଇ ବିଧାନସଭାରେ ପ୍ରଶ୍ନ ଉଠାଇଥିଲେ ପୂର୍ବତନ ମନ୍ତ୍ରୀ ଡକ୍ଟର ଦାମୋଦର ରାଉତ । ଏଠି ଦୁର୍ନୀତି ନେଇ ଅଭିଯୋଗ ଆଣିବା ସହ କୋଟି କୋଟି ଟଙ୍କା ରାଜସ୍ୱହାନୀ ହେଉଥିବା ଅଭିଯୋଗ ହୋଇଥିଲା । ଏପଟେ କେନ୍ଦ୍ର ସରକାରଙ୍କ ପକ୍ଷରୁ ଏହି ଅଂଚଳରେ ତୈଳ ସଂରକ୍ଷଣ କେନ୍ଦ୍ର ପାଇଁ ପ୍ରସ୍ତାବ ରହିଛି । ଆଉ ଏତିକି ବେଳେ ପ୍ରଶାସନର କାର୍ଯ୍ୟାନୁଷ୍ଠାନ ପରେ ସାରା ରାଜ୍ୟର କ୍ରସର ବନ୍ଦ କରିଦେବା ପାଇଁ ଚେତାବନୀ ଦେଇଛି ଟ୍ରକ୍ ମାଲିକ ସଂଘ । ପ୍ରଶାସନର ଏହି କାର୍ଯ୍ୟାନୁଷ୍ଠାନ ସଂପର୍କରେ ଆମେ ଜିଲ୍ଲାପାଳଙ୍କ ପ୍ରତିକ୍ରିୟା ନେବା ପାଇଁ ଚେଷ୍ଟା କରିଥିଲେ ସୁଦ୍ଧା ଏହା ସମ୍ଭବ ହୋଇନଥିଲା ।